Mga Saksi ni Jehova sa New Zealand—Mahidaiton kag Debotado nga mga Cristiano?

Sang Oktubre 21, 1940, gindeklarar sang gobierno sang New Zealand ang mga Saksi ni Jehova nga isa ka organisasyon nga nagapamatok sa gobierno kag makatalagam sa publiko. Nagresulta ini sang madamo nga kabudlayan sa mga Saksi ni Jehova, pero wala ini nagpaluya sa ila. Halimbawa, padayon sila sa pagtipon para magsimba bisan may risgo nga dakpon sila kag kasuhan sang mga awtoridad.

Natalupangdan sang indi Saksi nga si Andy Clarke, ang iya asawa nga si Mary nga aton utod, nga determinado sa pagtambong sang mga miting bisan makatalagam ini. Nahadlok sia nga basi dakpon ang iya asawa. Wala ginaupdan ni Andy si Mary sa mga miting, pero sugod sadto ginaupdan na niya sia. Ginsilingan niya Mary, “Ti, kon dakpon ka nila, dapat dakpon man nila ako e!” Sugod sadto, gintambungan ni Andy ang kada miting upod sa iya asawa. Sang ulihi, si Andy nangin Saksi man ni Jehova. Ang determinasyon nga ginpakita ni Mary bisan may paghingabot ginpakita man sang madamo nga Saksi sa New Zealand sang World War II.

Nagpadayon Sila

Isa ka adlaw ginpauntat sang pulis ang 78-anyos nga si John Murray samtang nagapakig-istorya parte sa Biblia sa iya pagpamalaybalay. Ginsentensiahan sia sang korte kay nagapakigbahin sia sa hilikuton sang isa ka organisasyon nga nagapamatok kuno sa gobierno. Madamo pa ang ginkasuhan nga mga Saksi sa korte; ang pila ginmultahan, kag ang iban ginpriso asta tatlo ka bulan.

Nangindi ang mga Saksi sa pagserbisyo sa militar bangod sang ila konsiensia nga nahanas sa Biblia. (Isaias 2:4) Tungod sini, sang inaway naeksperiensiahan nila ang tuman nga kabudlayan sang ginpatawag ang kalabanan sa ila para magserbisyo sa militar. Sa baylo nga magserbisyo sa militar, ginpili sang mga 80 ka Saksi nga ipadala sila sa mga detention camp asta natapos ang inaway. Pero bisan sang pagmaltratar kag sobra nga katugnaw kon tigtulugnaw, nagpadayon ining mga utod sa pagsimba kay Jehova didto.

Wala nag-uyang sing tion ang mga Saksi sa mga detention camp nga himuon sing regular ang ila hilikuton sa pagsimba kay Jehova. Daw isa sila ka kongregasyon didto, may regular sila nga mga miting kag kahimusan sa pagbantala sa mga kaupod nila nga priso. Ginpasugtan pa gani ang mga Saksi nga maghiwat sang mga asembleya nga ginaguardiahan sa pila ka kampo. Ang pila ka priso nakatuon sang kamatuoran sa Biblia kag nabawtismuhan sa mga kampo.

Si Bruce, ang kinagot nanday Mary kag Andy nga ginsambit kaina, nagkabig sang iya pagkapriso nga kahigayunan para makatuon pa gid parte sa Biblia. Nagsiling sia, “Para sa akon, daw nagaeskwela lang ako sa kampo kay maistorya ko sing maayo ang eksperiensiado nga mga utod kag makatuon sa ila.”

Sang 1944, nagpamat-od ang gobierno nga buy-an ang pila sa ila. Pero, wala magpasugot ang mga militar kay kumbinsido sila nga ang mga Saksi indi gid mag-untat sa pagpakig-istorya parte sa ila pagtuo sa iban. Siling nila sa ila report: “Nakontrol diutay ang ila pagkapanatiko sang ginpriso sila, pero indi gid ini makapabag-o sa ila.”

Indi Makatalagam sa Publiko

Bangod sang pag-ban sa mga Saksi, may pila nga nangin interesado parte sa mga Saksi. Sang ulihi, narealisar sang kalabanan nga ang mga Saksi ni Jehova indi gali makatalagam sa publiko. Natun-an nila nga ang mga Saksi mabuot, kag mahidaiton nga mga Cristiano. Nagresulta ini sa pagdamo sang mga Saksi sa New Zealand, halin sa 320 sang 1939 nangin 536 sila sang 1945!

May mga bes nga ang pila ka opisyal nagapati nga indi makatarunganon ang pag-ban sa mga Saksi ni Jehova. Isa ka huwes ang nag-dismiss sang kaso sang isa ka brother nga nadakpan nga nagabantala sang napamatian niya ang kaso. Nagsiling sia: “Suno sa akon ginapatihan kag nahangpan sa kasuguan, indi ko gid mabaton nga tawgon nga kriminal ang isa nga nagapanagtag sang Biblia.”

Sang gin-untat ang pag-ban sang natapos ang inaway, mas determinado ang mga Saksi nga buligan ang iban nga matun-an ang parte sa Ginharian sang Dios. Sang 1945, isa ka sulat halin sa branch office sang mga Saksi ni Jehova ang ginpadala sa tanan nga kongregasyon sa New Zealand, nga nagsiling: “Dapat nga mangin mataktikanhon ang kada isa, mangin mainabyanon, kag magpakita sang kaayo sa tanan. Likawi nga makigdebate kag makigbais. Dumduma nga ang mga tawo aton maistorya sinsero sa ila ginapatihan kag nagatinguha man sila nga sundon ini. . . . Ang kadam-an sa ila mga ‘karnero’ sang Ginuo nga kinahanglan naton giyahan pakadto kay Jehova kag sa iya ginharian.”

Subong, padayon ang mga Saksi ni Jehova sa New Zealand sa pagpaambit sang mensahe sang Biblia sa mga tumandok kag mga turista. Isa ka adlaw, sa sulod lang sang pila ka oras, ang apat ka Saksi sa Turangi nakaistorya sa 67 ka nagbisita halin sa 17 ka pungsod!

Ginakilala gid sang mga taga-New Zealand ang mga Saksi ni Jehova subong mahidaiton kag debotado nga mga Cristiano nga nagapabalor kag nagakabuhi suno sa mga talaksan sang Biblia. Ginatos ang ginabawtismuhan bilang Saksi ni Jehova kada tuig. Sang 2019, kapin sa 14,000 ka Saksi ang malipayon nga nagaalagad kay Jehova sa sining pungsod sa bagatnan.