Madinalag-on nga Konstruksion Antes sang Pandemic

Ginatos ka libo ang ginabawtismuhan kada tuig, gani kinahanglan naton ang dugang nga mga pasilidad para sa pagsimba. Bangod sini, ang mga Local Design/Construction Department sa bilog nga kalibutan nagplano nga magpatindog ukon mag-renovate sang sobra 2,700 ka tilipunan para sa pagsimba sa tion sang 2020 nga tuig sang pag-alagad.a

Pero bangod sa COVID-19 nga pandemic, wala madayon ini nga mga plano. Para maproteksionan ang aton mga kauturan kag masunod ang mga regulasyon sang gobierno, ginpauntat sang Publishing Committee sang Nagadumala nga Hubon ang kalabanan sining dalagku nga mga construction project sa bilog nga kalibutan. Bisan pa sa sini, sang 2020 nga tuig sang pag-alagad, sobra sa 1,700 ka tilipunan para sa pagsimba ang napatindog ukon na-renovate antes sang pandemic. Dugang pa, sobra 100 ka dalagku nga mga proyekto sang mga branch ang natapos. Binagbinaga kon paano nakabenepisyo ang aton mga kauturan sa duha ka natapos nga construction project.

Ang branch sa Cameroon. Ang branch sadto nga ara sa Douala gamay kaayo kag kinahanglan na gid sang bag-o kag mas manami nga branch. Plano sang Publishing Committee nga i-renovate ang branch, pero ang gasto sa paghimo sini mas mahal pa sangsa bili mismo sang propiedad. Ginbinagbinag man nila nga magpatindog sing bag-o nga bilding sa lain nga lugar ukon magbakal na lang sing human na nga bilding kag i-renovate ini, pero wala ini tanan nadayon.

Sa amo man nga mga tion, nabalitaan sang mga utod nga sa norte sang Douala, nagaplano ang gobierno nga maghimo sing karsada nga maagi sa kilid sang isa sa aton mga Assembly Hall. Kon may karsada na, mas mahapos na kadtuan ang propiedad kag makapatakod naman sang kuryente, tubig, Internet, kag iban pa, kag amo gid ina ang kinahanglan sang branch. Gani gin-aprobahan sang Nagadumala nga Hubon ang pagpatindog sing bag-o nga branch sa lote nga sakop sang Assembly Hall.

Nagbuligay ang mga Saksi kag mga kontraktor nga ginbayaran sang branch sa pagpatindog sini nga proyekto, amo nga daku nga tion kag kuarta ang nakinot. Ang matuod, sobra sa duha ka milyon ka dolyar (U.S.) ang nakinot asta nga natapos ini nga proyekto. Nakasaylo ang pamilya Bethel sa sining bag-o nga pasilidad antes nagsugod ang COVID-19 nga pandemic.

Nakabenepisyo gid ang mga Bethelite sa Cameroon kay kanami na sang ila ginaistaran kag ginaobrahan nga lugar, kag para sa ila ini nga branch regalo sa ila ni Jehova. Ang isa ka mag-asawa nagsiling: “Gusto namon nga magmapisan pa gid para mapakita namon nga ginapabaloran namon ini nga regalo.”

Ang Tojolabal Remote Translation Office (RTO) sa Mexico. Sa sulod sang madamo nga tinuig, ang translation team sang Tojolabal ara sa Central America nga branch, malapit sa Mexico City. Pero ang Tojolabal nga lenguahe ginahambal sa Altamirano kag Las Margaritas, nga halos 1,000 ka kilometro ang kalayuon halin sa branch. Bangod malayo sila sa sina nga lugar, nabudlayan ang mga translator kay indi nila pirme mabatian nga ginahambal ang ila lenguahe kag nabudlayan man ang branch sa pagpangita sang kalipikado nga mga kauturan para magbulig sa translation kag sa pagrekord.

Bangod sini nga mga rason, gusto sang Writing Committee sang Nagadumala nga Hubon nga sayluhon ang translation team sang Tojolabal sa lugar diin ginahambal mismo ini nga lenguahe. Gani nagdesisyon ang branch nga magbakal sang isa ka bilding kag i-renovate ini. Mas barato ini sangsa magpatindog ukon mag-arkila sang mga opisina.

Ang isa ka translator nagpaathag kon paano sia nakabenepisyo: “Sa pulo ka tuig ko nga pag-translate sa branch, wala gid ako sing naistorya nga pamilya nga nagahambal sang akon lenguahe. Pero subong, ang amon opisina ara na sa lugar nga halos ang tanan nagahambal sing Tojolabal. Makaistorya ako sa ila kada adlaw, madamo nga tinaga ang natun-an ko, kag nagnami gid ang akon trabaho.”

Mga Proyekto Para sa 2021 nga Tuig sang Pag-alagad

Sa 2021 nga tuig sang pag-alagad, may mga plano nga magpatindog sang 75 ka RTO kag mga pasilidad nga gamiton para sa Bible school, kon itugot sang kahimtangan. Padayunon ang pagpatindog sang walo ka dalagku nga mga proyekto sang mga branch, lakip ang bag-o nga proyekto sang world headquarters sa Ramapo, New York, pati man ang pagsaylo sang mga branch sang Argentina kag Italy. Dugang pa, sobra 1,000 ka Kingdom Hall ang kinahanglan ipatindog, sobra 6,000 ka tilipunan para sa pagsimba ang dapat na islan, kag 4,000 ka Kingdom Hall ang dapat i-renovate.

Sa diin naghalin ang ginagasto sa sini nga mga konstruksion kag pag-renovate? Ginsabat ni Brother Lázaro González, nga miembro sang Komite sang Sanga sa Central America, ini nga pamangkot sang ginabinagbinag nila ang proyekto parte sa Tojolabal Remote Translation Office. “Sa teritoryo sang amon branch, pigado ang mga tawo. Gani kon wala ang bulig sang mga kauturan halin sa bilog nga kalibutan, imposible gid nga makapatindog sing mga translation office para sa aton tumandok nga mga kauturan. Paagi sa mga donasyon sang aton mga kauturan, nasaylo ang mga translator sa mga lugar diin ginahambal ang ila lenguahe. Ginapasalamatan gid namon ang kaalwan sang mga kauturan sa bilog nga kalibutan.” Huo, ining mga construction project nangin posible bangod sang imo donasyon sa bug-os kalibutan nga hilikuton paagi sa donate.jw.org.