Mga Pamangkot Gikan sa mga Bumalasa

Antes mapatay si Jesus, ginsiling niya ang ginhambal ni David sa Salmo 22:1. Ano ang gusto ipahangop ni Jesus?

Sang lapit na lang mapatay si Jesus, ginsiling niya ang mabasa sa Mateo 27:46: “Dios ko, Dios ko, ngaa ginpatumbayaan mo ako?” Sang ginsiling ini ni Jesus, gintuman niya ang tagna sa Salmo 22:1 nga ginhambal ni salmista David. (Mar. 15:34) Indi gid husto kon hunahunaon naton nga ginsiling ini ni Jesus bangod naglain ang iya buot ukon bangod nagluya ang iya pagtuo sadto nga tion. Nahangpan gid ni Jesus ang rason kon ngaa dapat sia mapatay, kag handa sia nga himuon ini. (Mat. 16:21; 20:28) Kabalo man sia nga indi sia ‘pag-amligan’ ni Jehova. (Job 1:10) Paagi sa sini, mapamatud-an ni Jesus nga magapabilin sia nga matutom asta sa iya kamatayon bisan pa tuman ini kabudlay.—Mar. 14:35, 36.

Gani ano ang gusto ipahangop ni Jesus sang ginsiling niya ini nga salmo? Indi kita sigurado sang sabat sa sini, pero maayo kon binagbinagon naton ang pila ka posibilidad.a

Sang ginsiling ini ni Jesus, posible nga ginapahangop niya nga indi pagpunggan ni Jehova ang pagpatay sa iya. Dapat ihatag ni Jesus ang iya kabuhi bilang gawad, kag dapat tugutan ni Jehova nga mapatay si Jesus para “matilawan niya ang kamatayon para sa tagsa ka tawo.”—Heb. 2:9.

Sang ginsiling ni Jesus ang isa ka bahin sini nga salmo, posible nga gusto niya nga hunahunaon sang iban ang bilog nga salmo. Kinaandan na nga ginasaulo sang mga Judiyo sadto nga tion ang madamo nga salmo. Kon mabatian nila ang isa ka bersikulo sang isa ka salmo, madumduman nila dayon ang bilog nga salmo. Kon amo sini ang gusto ni Jesus, posible nga nabuligan niya ang iya mga sumulunod nga mga Judiyo nga madumduman ang madamo nga tagna sa sini nga salmo parte sa iya kamatayon. (Sal. 22:7, 8, 15, 16, 18, 24) Madumduman man nila nga ang katapusan nga mga bersikulo sini nga salmo nagadayaw kay Jehova bilang Hari sa bug-os nga duta.—Sal. 22:27-31.

Sang ginsiling ni Jesus ang ginhambal ni David, posible nga ginapahangop niya nga wala sia sing sala. Antes ginpatay si Jesus, ilegal sia nga ginbista kag ginsentensiahan nga nakasala sing pagpasipala. (Mat. 26:65, 66) Dalidali nga ginhimo ini nga pagbista sing gab-i na kag wala nasunod ang ginapatuman sang kasuguan. (Mat. 26:59; Mar. 14:56-59) Sang ginsiling ni Jesus ang nasulat sa salmo, mahimo nga ginapatalupangod niya nga wala sia sing nahimo nga sala kag wala sing rason nga patyon sia.

Posible nga ginapahanumdom man ni Jesus sa iban nga bisan pa gintugutan sia nga mag-antos, indi buot silingon nga wala na nalipay si Jehova sa iya. Ang manunulat sini nga salmo amo si David. Sang namangkot si David kon ngaa ginpatumbayaan sia sang Dios, indi buot silingon nga nagluya ang iya pagtuo sa Dios. Kay man, nagsiling sia dayon nga nagasalig sia nga luwason ni Jehova ang iya katawhan, kag padayon sia nga ginpakamaayo ni Jehova. (Sal. 22:23, 24, 27) Amo man sini ang naeksperiensiahan ni Jesus nga ginatawag nga “Anak ni David.” Bisan pa ara sia sa usok sang pag-antos, indi buot silingon nga wala na nalipay si Jehova sa iya.—Mat. 21:9.

Posible nga nasubuan gid si Jesus kay indi sia pag-amligan ni Jehova para mapamatud-an niya sing bug-os nga matutom sia. Indi katuyuan ni Jehova nga mag-antos kag mapatay ang iya Anak. Pero kinahanglan ini matabo sa iya Anak bangod nagrebelde si Adan kag si Eva. Wala sing nahimo nga sala si Jesus, pero dapat sia mag-antos kag mapatay para masabat ang ginkuestyon ni Satanas kag para magawad niya ang nadula ni Adan. (Mar. 8:31; 1 Ped. 2:21-24) Mangin posible lang ini kon indi pag-amligan ni Jehova si Jesus sa sini nga tion.

Posible nga gusto ni Jesus nga hunahunaon sang iya mga sumulunod ang rason kon ngaa gintugutan ni Jehova nga mapatay sia sa usok sang pag-antos.b Kabalo si Jesus nga ang pagpatay sa iya sa usok sang pag-antos nga daw isa ka kriminal mangin kasandaran sa madamo. (1 Cor. 1:23) Kon hunahunaon sang iya mga sumulunod kon ano gid ang rason kon ngaa ginpatay sia, mangin maathag sa ila ang kahulugan sang iya kamatayon. (Gal. 3:13, 14) Gani tamdon nila sia nga ila Manluluwas, kag indi isa ka kriminal.

Ano man ang rason ni Jesus kon ngaa ginsiling niya ini, kabalo sia nga ginahimo niya ang kabubut-on ni Jehova kon mapatay sia sa usok sang pag-antos. Wala madugay pagkatapos ginhambal ni Jesus ini nga salmo, nagsiling sia: “Natuman na!” (Juan 19:30; Luc. 22:37) Bangod wala gin-amligan ni Jehova si Jesus sadto nga tion, natuman ni Jesus ang tanan nga ginsugo sa iya nga himuon niya sa duta. Natuman man niya ang tanan nga ginsulat parte sa iya “sa Kasuguan ni Moises, sa sinulatan sang mga Manalagna, kag sa mga Salmo.”—Luc. 24:44.