Indi Magduhaduha nga Ginapatawad Ka ni Jehova

1-2. Ano ang ginahimo ni Jehova kon nagahinulsol kita sa aton mga sala, kag ano ang aton ginabatyag bangod sini? (Tan-awa man ang piktyur.)

KABALO gid si Hari David kon ano ang ginabatyag sang isa kon ginakonsiensia sia sa iya nahimo nga mga sala sang una. (Sal. 40:12; 51:3; superskripsion) Kay sia mismo nakahimo sing serioso nga mga sala. Pero matuod gid sia nga naghinulsol, gani ginpatawad sia ni Jehova. (2 Sam. 12:13) Nalipay gid si David sang narealisar niya nga ginpatawad na sia ni Jehova.​—Sal. 32:1.

² Pareho kay David, malipay man kita kon marealisar naton nga ginapakitaan kita ni Jehova sing kaluoy kag ginapatawad. Bisan serioso pa ang aton nahimo nga sala, makapaumpaw gid mahibaluan nga handa si Jehova nga patawaron kita basta matuod kita nga nagahinulsol, ginatu-ad naton ang aton sala, kag ginatinguhaan gid naton nga indi na ini masulit. (Hulu. 28:13; Binu. 26:20; 1 Juan 1:9) Kag nalipay gid kita kay si Jehova nagapatawad sing bug-os. Buot silingon, kalimtan na niya ini nga daw wala lang ini natabo.​—Ezeq. 33:16.

3-4. Ano ang ginbatyag sang isa ka sister pagkatapos sia nabawtismuhan, kag ano ang binagbinagon naton sa sini nga artikulo?

³ Pero kon kaisa, nagaduhaduha ang iban kon ginpatawad gid man sila ni Jehova. Amo sina ang ginbatyag ni Jennifer. Gintudluan sia sang iya mga ginikanan parte kay Jehova sang bata pa sia. Pero sang tin-edyer na sia, naghimo sia sing malain kag ginatago niya ini sa iya mga ginikanan. Pero sang ulihi, naghimo sia sing mga pagbag-o, gindedikar niya ang iya kaugalingon kay Jehova, kag nagpabawtismo. Nagsiling sia: “Sang una, nakahimo ako sang seksuwal nga imoralidad, pirme ako nagapahubog, madali ako maakig, kag gusto ko gid nga magmanggaranon. Kabalo ako nga nagsiling ang Biblia nga paagi sa halad-gawad ni Jesus, mapatawad ni Jehova ang aton mga sala. Pero bisan pa naghinulsol na ako kag nangayo sing kapatawaran kay Jehova, indi gihapon ako kumbinsido nga ginpatawad na niya ako.”

⁴ Kon kaisa, nagabatyag ka man bala nga wala ka pa napatawad ni Jehova sa mga sala mo sang una? Dumduma ang kalipay nga nabatyagan ni David sang naeksperiensiahan niya ang kaluoy kag pagpatawad ni Jehova. Gusto ni Jehova nga amo man sina ang mabatyagan mo. Sa sini nga artikulo, binagbinagon naton kon ngaa indi kita dapat magduhaduha nga ginapatawad kita ni Jehova kag kon ano ang makabulig sa aton para mahimo naton ina.

NGAA INDI KITA DAPAT MAGDUHADUHA NGA GINAPATAWAD KITA NI JEHOVA?

5. Ano ang gusto ni Satanas nga patihan naton? Maghatag sing halimbawa.

⁵ Kon indi kita magduhaduha nga ginapatawad kita ni Jehova, indi kita madaya sang kabutigan ni Satanas. Dumduma nga himuon gid ni Satanas ang tanan para pauntaton kita sa pag-alagad kay Jehova. Halimbawa, tinguhaan gid niya nga papatihon kita nga indi na mapatawad ang aton mga sala. Binagbinaga ang natabo sa isa ka tawo sa Corinto nga ginsikway sa kongregasyon bangod nakahimo sia sang seksuwal nga imoralidad. (1 Cor. 5:1, 5, 13) Sang ulihi, ginhinulsulan niya ang iya sala. Pero gusto ni Satanas nga indi sia pagpatawaron sang mga kauturan kag indi sia pagbatunon sa kongregasyon. Gusto man ni Satanas nga magbatyag ang naghinulsol nga tawo nga indi mapatawad ang iya sala para “madaug [sia] sang tuman nga kasubo” kag mag-untat sia sa pag-alagad kay Jehova. Asta subong, gusto ni Satanas nga papatihon kita nga indi mapatawad ang aton mga sala para mag-untat kita sa pag-alagad kay Jehova. Pero, “nakahibalo gid kita sang iya mga pahito.”​—2 Cor. 2:5-11.

6. Ano ang makabulig sa aton kon ginakonsiensia gihapon kita sa aton mga sala nga napatawad na ni Jehova?

⁶ Kon indi kita magduhaduha nga ginapatawad kita ni Jehova, indi na kita pagkonsiensiahon sa aton mga sala sang una. Kon makahimo kita sang sala, normal lang nga konsiensiahon kita. (Sal. 51:17) Maayo gid ina. Kay kon ginakonsiensia kita, mapahulag kita nga maghimo sing mga pagbag-o kag himuon ang husto. (2 Cor. 7:10, 11) Pero kon ginakonsiensia gihapon kita sa aton mga sala bisan madugay na naton ini ginhinulsulan, posible mangin rason ini nga mag-untat kita sa pag-alagad kay Jehova. Kon indi kita magduhaduha nga ginapatawad kita ni Jehova, maalagad naton sia sing malipayon kag may matinlo nga konsiensia. Kag amo gid ina ang gusto ni Jehova. (Col. 1:10, 11; 2 Tim. 1:3) Pero, ano ang makabulig sa aton para indi kita magduhaduha nga ginapatawad kita ni Jehova?

ANO ANG MAKABULIG SA ATON PARA INDI KITA MAGDUHADUHA NGA GINAPATAWAD KITA NI JEHOVA?

7-8. Paano ginpakilala ni Jehova ang iya kaugalingon kay Moises, kag ano ang masaligan naton base sa sini? (Exodo 34:6, 7)

⁷ Pamalandungi kon paano ginpakilala ni Jehova ang iya kaugalingon. Halimbawa, talupangda kon ano ang ginsiling ni Jehova kay Moises sa Bukid Sinai.a (Basaha ang Exodo 34:6, 7.) Madamo sing maayo nga kinaiya si Jehova, pero nagpakilala sia kay Moises bilang “isa ka Dios nga maluluy-on kag mainawaon.” Base sa sini, makasiling bala kita nga isa sia ka Dios nga wala nagapatawad sa iya mga sumilimba nga nakasala nga nagahinulsol? Indi gid. Kay kon himuon niya ina, mangin mapintas sia kag wala sing kaluoy nga Dios. Pero indi gid amo sina si Jehova.

⁸ Kon nagsiling si Jehova nga maluluy-on sia, mapatihan gid naton ina. Kay man, si Jehova indi makabutig. (Sal. 31:5) Gani masaligan gid naton ang iya ginhambal. Kon ginakonsiensia ka gihapon sa mga sala mo sang una, pamangkuta ang imo kaugalingon: ‘Nagapati gid bala ako nga si Jehova isa ka maluluy-on kag mainawaon nga Dios nga handa magpatawad sa kay bisan sin-o nga nakasala nga nagahinulsol? Indi bala nga dapat indi man ako magduhaduha nga ginpatawad na niya ako?’

9. Ano ang buot silingon nga ginpatawad na ang aton mga sala? (Salmo 32:5)

⁹ Pamalandungi kon ano ang ginsiling sang mga manunulat sang Biblia parte sa pagpatawad ni Jehova. Halimbawa, binagbinaga ang ginsiling ni David. (Basaha ang Salmo 32:5.) “Ginpatawad mo ang akon mga sala,” siling ni David. Ang Hebreo nga tinaga nga gin-translate “patawara” nagakahulugan sang “hakwata,” “kuhaa,” ukon “dal-a.” Sang ginpatawad ni Jehova si David, daw pareho lang nga ginhakwat niya ang mga sala ni David kag gindala palayo. Gani nalipay gid si David kay nahibaluan niya nga ginpatawad na sia sing bug-os ni Jehova. (Sal. 32:2-4) Mabatyagan man naton ina nga kalipay. Kon matuod gid kita nga nagahinulsol sa aton mga sala, indi na kita dapat makonsiensia sa mga sala nga ginhakwat na ni Jehova kag gindala palayo sa aton.

10-11. Ano ang buot silingon nga si Jehova “handa sa pagpatawad”? (Salmo 86:5)

¹⁰ Basaha ang Salmo 86:5. Si David nagsiling nga si Jehova “handa sa pagpatawad.” Parte sa sini, ang isa ka reperensia sa Biblia nagsiling parte kay Jehova: “Nagapatawad gid [sia], ‘natural’ ini sa iya.” Ngaa masiling naton nga natural kay Jehova ang magpatawad? Ang kasugpon sina nga bersikulo nagpaathag: “Bugana [ikaw] sa mainunungon nga gugma para sa tanan nga nagapanawag sa imo.” Natun-an naton sa nagligad nga artikulo nga bangod sa mainunungon nga gugma ni Jehova, palangga gid niya kag indi gid niya pagbayaan ang iya matutom nga mga alagad. Bangod man sa sini nga gugma, si Jehova “nagapatawad sing bugana” sa tanan nga nakasala nga nagahinulsol. (Isa. 55:7) Kon nagaduhaduha ka nga ginapatawad ka ni Jehova, pamangkuta ang imo kaugalingon: ‘Nagapati gid bala ako nga si Jehova handa nga magpatawad sa tanan nga nakasala nga nagapangabay sang iya kaluoy? Gani indi bala dapat mangin kumbinsido man ako nga ginpatawad na niya ako bangod nangabay ako sang iya kaluoy?’

¹¹ Nalipay gid kita kay nahibaluan naton nga naintiendihan ni Jehova nga makasasala kita. (Sal. 139:1, 2) Mas maathag ini nga ginpakita sa isa pa ka salmo nga ginsulat ni David. Makabulig man sa aton ini nga salmo nga indi magduhaduha nga ginapatawad kita ni Jehova.

INDI PAGKALIMTI KON ANO ANG GINADUMDOM NI JEHOVA

12-13. Suno sa Salmo 103:14, ano ang ginadumdom ni Jehova parte sa aton, kag ano ang handa niya nga himuon bangod sini?

¹² Basaha ang Salmo 103:14. Nagsiling si David nga “ginadumdom [ni Jehova] nga kita yab-ok lamang.” Ginpaathag ni David ang isa ka rason kon ngaa handa si Jehova nga patawaron ang mga alagad niya nga nakasala nga nagahinulsol: Kabalo Sia nga makasasala kita. Para mas maintiendihan naton ini, binagbinagon pa gid naton ang ginsiling ni David.

¹³ Nagsiling si David nga “nahibaluan gid [ni Jehova] kon paano kita ginhimo.” Ginhimo niya si Adan “halin sa yab-ok sang duta.” Gani kabalo gid si Jehova kon ano ang kinahanglan sang mga tawo. Halimbawa, kinahanglan sang mga tawo magkaon, magtulog, kag magginhawa. Bisan ang perpekto nga mga tawo nagakinahanglan sini. (Gen. 2:7) Pero sang nagpakasala si Adan kag si Eva, may lain pa gid nga kahulugan ang mga tinaga nga halin kita sa yab-ok. Bilang ila mga kaliwat, mga yab-ok kita kay natawo kita nga indi perpekto kag kinahanglan naton pakigbatuan ang huyog sa paghimo sang sala. Nahibaluan gid ina ni Jehova. Pero sang nagsiling si David nga “ginadumdom” ini ni Jehova, buot silingon, handa gid sia pirme nga pakitaan kita sing kaluoy kay kabalo sia nga makasasala kita. Gani amo ini ang gusto ipaathag ni David: Kabalo si Jehova nga makasala gid kita kon kaisa. Pero kon makita niya nga matuod gid kita nga nagahinulsol, handa sia nga pakitaan kita sing kaluoy kag patawaron niya kita.​—Sal. 78:38, 39.

14. (a) Ano pa ang ginsiling ni David parte sa pagpatawad ni Jehova? (Salmo 103:12) (b) Paano ginpakita sang halimbawa ni David nga si Jehova nagapatawad sing bug-os? (Tan-awa ang kahon nga “Ginapatawad kag Ginakalimtan ni Jehova ang Aton mga Sala.”)

¹⁴ Ano pa gid ang matun-an naton sa Salmo 103 parte sa pagpatawad ni Jehova? (Basaha ang Salmo 103:12.) Nagsiling si David nga “subong nga malayo ang sidlangan sa katundan,” amo sina kalayo ang ginadal-an ni Jehova sang aton mga sala. Kabalo kita nga ang sidlangan amo ang pinakamalayo halin sa katundan, kag ining duha wala gid nagatabo. Ano ang ginasugid sini sa aton parte sa pagpatawad ni Jehova sa aton mga sala? Ang isa ka libro nagkomento parte sa sini nga bersikulo: “Kon ang aton sala ginadala sa malayo gid katama, makasalig kita nga indi na naton ini mapanimahuan, wala na gid ini sang agi, kag indi na gid ini madumduman.” Pamensara bala: Kon kaisa, may masimhutan kita nga nagapahanumdom sa aton sang isa ka hitabo. Pero kon nagapatawad si Jehova, daw pareho lang nga wala na gid sing baho nga nabilin nga magapahanumdom sa iya sang aton sala. Gani, indi na niya kita pagsukton liwat sa sini nga sala.​—Ezeq. 18:21, 22; Binu. 3:19.

15. Ano ang himuon naton kon ginakonsiensia gihapon kita sa aton mga sala sang una?

¹⁵ Paano ang ginsiling ni David sa Salmo 103 makabulig sa aton nga indi pagduhaduhaan nga ginapatawad kita ni Jehova? Kon pirme gihapon kita ginakonsiensia sa aton mga sala sang una, pamangkuton naton ang aton kaugalingon: ‘Nalipatan ko na bala nga ginadumdom ni Jehova nga indi ako perpekto amo nga handa gid sia magpatawad sa mga nakasala nga nagahinulsol pareho ko? Ginadumdom ko bala nga kon ginpatawad na ako ni Jehova ginakalimtan na niya ang akon sala kag indi na niya ini pagsukton sa akon liwat?’ Wala si Jehova nagapokus sa mga sala nga nahimo naton sang una. Gani dapat amo man kita. (Sal. 130:3) Kon indi naton pagduhaduhaan nga ginapatawad kita ni Jehova, indi na kita pagkonsiensiahon sa aton mga sala nga napatawad na niya. Gani, makapadayon kita sa pag-alagad sa iya sing malipayon.

16. Ngaa indi gid maayo kon pirme gihapon naton ginapamensar ang aton mga sala nga napatawad na ni Jehova? Maghatag sing halimbawa. (Tan-awa man ang piktyur.)

¹⁶ Binagbinaga ini nga halimbawa. Kon nagadrayb ang isa ka tawo, may mga tion nga nagatan-aw sia sa rearview mirror. Pero wala sia nagapokus sa sini kay posible gid nga maaksidente sia. Mas maayo gid kon magpokus sia sa dalan sa unahan. Sing kaanggid, ang panalagsa nga pagdumdom sa aton mga sala sang una makabulig man sa aton. May ara kita sing matun-an sa sini kag nagapabakod ini sang aton determinasyon nga indi na ini pagsuliton. Pero kon pirme gihapon naton ginapamensar ang aton mga sala nga napatawad na ni Jehova, madula naton ang kalipay sa pag-alagad sa iya kag indi naton sia maalagad sing bug-os. Mas maayo gid kon magpokus kita sa dalan sa unahan. Kay man, ara kita sa dalan nga nagapadulong sa bag-ong kalibutan nga ginpromisa sang Dios, diin ang malain nga mga butang “indi na pagdumdumon.”​—Isa. 65:17; Hulu. 4:25.

PADAYON NGA KUMBINSIHA ANG IMO TAGIPUSUON

17. Ngaa dapat padayon naton nga kumbinsihon ang aton tagipusuon nga palangga kita kag ginapatawad ni Jehova?

¹⁷ Dapat padayon naton nga kumbinsihon ang aton tagipusuon nga palangga kita kag ginapatawad ni Jehova. (1 Juan 3:19, footnote) Ngaa? Kay indi gid mag-untat si Satanas nga kumbinsihon kita nga indi kita palangga ni Jehova kag indi Niya kita pagpatawaron. Amo ini ang mga paagi ni Satanas para pauntaton kita sa pag-alagad kay Jehova. Kag samtang nagahilapit na ang katapusan, mapaabot naton nga himuon pa gid ni Satanas ang tanan kay kabalo sia nga malip-ot na lang ang iya tion. (Bug. 12:12) Pero indi gid kita magpadaug kay Satanas kag padayon kita nga mag-alagad sing matutom kay Jehova.

18. Ano ang puede mo himuon para makumbinsi ang imo tagipusuon nga palangga ka kag ginapatawad ni Jehova?

¹⁸ Para mangin kumbinsido ka pa gid nga palangga ka ni Jehova, sunda ang mga panugda nga ginbinagbinag sa nagligad nga artikulo. Para makumbinsi mo ang imo tagipusuon nga ginapatawad ka ni Jehova, dumduma kon paano ginpakilala ni Jehova ang iya kaugalingon. Pamalandungi ang mga ginasiling sang Biblia parte sa iya pagpatawad. Indi pagkalimti nga kabalo si Jehova nga indi ka perpekto kag handa sia nga pakitaan ka sing kaluoy. Kag dumduma nga nagapatawad sia sing bug-os. Kon himuon mo ini, mabatyagan mo ang kalipay bangod sigurado ka nga pakitaan ka ni Jehova sing kaluoy. Kag pareho ni David, makasiling ka man: “Salamat gid Jehova, kay ‘ginpatawad mo ang akon mga sala.’”—Sal. 32:5.