Pagbusbos nga Walay Dugo—Isa ka Sugilanon sang Kadalag-an
Sa tapos mabalhag ang Enero 8, 2000, nga guwa sang Magmata! sa tema tuhoy sa wala-dugo nga pagbulong kag pagbusbos, nakabaton ang mga editor sining makapalig-on nga sulat.
“Ini nga guwa sang Magmata! nagpahanumdom sa amon sang isa ka kahimtangan nga gin-atubang namon nga mag-asawa sa amon anak nga si Janice. Wala magdugay nga mabun-ag sia, lima ka depekto sa tagipusuon ang nasayasat, ang labing malubha amo nga wala sa husto nga posisyon ang iya mayor nga mga ugat.a Sanglit kinahanglanon ang pagbusbos, nangita kami sing manugbusbos sa tagipusuon sang mga bata sa Buffalo, New York, E.U.A., nga handa mag-opera nga wala nagagamit sing dugo.
“Una nga gin-operahan si Janice sa edad nga apat ka bulan—isa ka closed-heart nga pagbusbos agod limitehan ang pag-ilig sang dugo pakadto sa iya mga baga. Pagligad sang lima ka bulan, gin-operahan sia sa ikaduha nga tion—sini nga tion isa ka open-heart nga pagbusbos nga gindesinyo agod pailigon sing nagakaigo ang iya dugo. Ang duha ka pagbusbos ginhimo nga wala naggamit sing dugo, kag nagmadinalag-on gid ini!
“Si Janice 17 anyos na karon kag maayo gid sing panglawas. Nagapasalamat gid kami sa maisog nga mga manugbusbos nga handa sa pagtahod sang amon panindugan may kaangtanan sa dugo. Sa pagkamatuod, sila amo ang gintawag ninyo sa Enero 8 nga guwa: ‘Mga Nanguna sa Pagbulong.’ Bilang sabat sa ginpamangkot sa sadto nga magasin, Ang pagbusbos nga walay dugo luwas-sa-peligro bala nga alternatibo? makasabat gid kami sing huo!”
[Footnote]
a Sa sini nga kahimtangan, ang posisyon sang ugat sang tagipusuon kag ang ugat sang baga nagbayluhanay. Sa amo, ang madamo sing oksiheno nga dugo nga dapat kuntani manalaytay sa bug-os nga lawas nagakadto lamang sa mga baga. Amo man sini nga kaso ang ginreport sa amon Abril 8, 1986, nga guwa sang Awake!, pahina 18-20.
[Laragway sa pahina 31]
Pagkatapos sang mga pag-opera sa iya
[Laragway sa pahina 31]
Si Janice kag ang iya mga ginikanan karon