Ang Pagtamod sang Biblia

Dapat Bala Makigbahin ang mga Cristiano sa mga Selebrasyon sang Bag-ong Tuig?

“ANG hapon antes sang Bisperas sang Bag-ong Tuig tumalagsahon nga matawhay,” siling ni Fernando, isa ka doktor sa Brazil. “Nian, sa mga alas 11 sang gab-i, magasugod na sila sa pag-inabot​​—⁠ang wala untat nga pagdagsa sang mga pasyente nga ginbuno ukon gintiro, mga tin-edyer nga nasamaran sa mga aksidente sa salakyan, kag ang ginasakit nga mga asawa. Ang alkohol amo halos pirme ang kabangdanan.”

Sa pagbinagbinag sa ibabaw, indi katingalahan nga ginpatuhuyan sang isa ka pamantalaan sa Brazil ang nahauna nga adlaw sang tuig subong internasyonal nga adlaw sang hangover (ginabatyag pagkaaga bangod sang pagkahubog). Ang isa ka ahensia sang balita sa Europa nagasiling nga “Ang Bag-ong Tuig para sa isa ka hedonist (isa ka tawo nga ang ginahunahuna lamang amo ang kalipayan),” nagadugang nga ini “isa pa ka rutina sang walay katapusan nga pagpakig-away sang isa ka tawo batok sa alkohol.”

Ibutang ta, wala ginasaulog sang tanan ang Bag-ong Tuig paagi sa pag-inom sing lakas kag paghimo sing masingki nga mga buhat. Sa katunayan, madamo ang may makalilipay nga handumanan sa sini nga okasyon. “Sang mga bata pa kami, malangkagon namon nga ginahulat ang Bisperas sang Bag-ong Tuig,” siling ni Fernando, nga ginkutlo kaina. “Madamo pirme sing hampang, pagkaon, kag ilimnon. Sa tungang gab-i nagahaksanay kami, nagahalukay, kag nagatamyawanay sa isa kag isa sing ‘Malipayon nga Bag-ong Tuig!’ ”

Sing kaanggid, madamo sa karon ang nagabatyag nga wala sila nagapasobra sa ila pagsaulog sa Bag-ong Tuig. Walay sapayan sina, dapat usisaon sang mga Cristiano ang ginhalinan kag kahulugan sining bantog nga selebrasyon. Nagasumpakil bala ang selebrasyon sang Bag-ong Tuig sa mga panudlo sang Biblia?

Mga Katunayan sang Nagligad

Ang selebrasyon sang Bag-ong Tuig indi bag-o. Ginapakita sang dumaan nga mga inskripsion nga ginsaulog ini sa Babilonia sang maaga nga tuig sang ikatlo nga milenyo B.⁠C.⁠E. Ang selebrasyon, nga ginsaulog sang tungatunga-​sang-Marso, importante gid. “Sadto nga tion ginpat-od sang dios nga si Marduk ang madangatan sang pungsod sa masunod nga tuig,” siling sang The World Book Encyclopedia. Ang selebrasyon sang taga-Babilonia sang bag-ong tuig naglawig sing 11 ka adlaw kag naglakip sang mga halad, prosesyon, kag seremonya sa pertilidad.

Sadto, ginsugdan sang mga Romano ang ila tuig sa bulan sang Marso. Apang sang 46 B.⁠C.⁠E., ginmando ni Emperador Julio Cesar nga dapat ini magsugod sa nahauna nga adlaw sang Enero. Yadto nga adlaw gindedikar na kay Janus, ang dios sang ginsuguran, kag karon magatanda man ini sang nahauna nga adlaw sang tuig sang mga Romano. Gin-islan ang petsa, apang nagpadayon sa gihapon ang atmospera sang pagpangalipay. Sa nahauna nga adlaw sang Enero, ang mga tawo “nagapatuyang,” siling sang McClintock and Strong’s Cyclopedia, “kag nagahimo sing nagkalainlain nga sahi sang pagano nga mga disparatis.”

Bisan sa karon, ang disparatis nga mga rituwal bahin man sang mga selebrasyon sang Bag-ong Tuig. Halimbawa, sa pila ka bahin sang Bagatnan nga Amerika, madamo ang nagasug-alaw sang Bag-ong Tuig samtang nagatindog sa ila tuo lang nga tiil. Ang iban nagahuyop sang mga torotot kag nagapalupok sang mga rebentador. Suno sa kinabatasan sang mga Czech, ang Bisperas sang Bag-ong Tuig amo ang paghigop sang sabaw sang linaga, samtang sa tradisyon sang mga Slovak, ang mga tawo nagabutang sang kuwarta ukon himbis sang isda sa idalom sang mantil sang lamesa. Ini nga mga rituwal, nga gindesinyo agod wala sing malain nga matabo kag magarantiyahan ang kabuganaan, nagahupot lamang sang dumaan nga pagpati nga ang pagsugod sang tuig isa ka tion sa pagpat-od kon ano ang madangatan.

Ang Pagtamod sang Biblia

Ang Biblia nagalaygay sa mga Cristiano nga “maglakat sing disente, indi sa magansal nga kinalipay kag paghinubog.”⁠a (Roma 13:​12-​14; Galacia 5:​19-​21; 1 Pedro 4:⁠3) Bangod ang selebrasyon sang Bag-ong Tuig masunson nga makilala paagi sa tuman nga pagpasobra nga ginatagudilian sang Biblia, ang mga Cristiano wala nagapakigbahin sa sini. Wala ini nagakahulugan nga ang mga Cristiano indi masinadyahon. Sa kabaliskaran, nakahibalo sila nga ang Biblia sulit-sulit nga nagasiling sa mga sumilimba sang matuod nga Dios nga magkalipay​​—⁠kag bangod ini sa pila ka rason. (Deuteronomio 26:​10, 11; Salmo 32:11; Hulubaton 5:​15-​19; Manugwali 3:​22; 11:9) Ginakilala man sang Biblia nga ang pagkaon kag pag-inom masami nga ginaupdan sang pagsinadya.​​—⁠Salmo 104:15; Manugwali 9:7a.

Apang, subong sang nakita na naton, ang mga selebrasyon sang Bag-ong Tuig naghalin sa pagano nga mga kinabatasan. Ang butig nga pagsimba mahigko kag kalangil-aran sa mata ni Jehova nga Dios, kag ginasikway sang mga Cristiano ang mga buhat nga may amo sina nga ginhalinan. (Deuteronomio 18:​9-​12; Ezequiel 22:​3, 4) Si apostol Pablo nagsulat: “Ano bala ang pag-updanay sang pagkamatarong kag pagkamalinapason? Ukon ano bala ang paghiambit sang kapawa sa kadudulman? Dugang pa, ano bala ang paghisantuanay sa ulot ni Cristo kag ni Belial?” Tungod sa maayo nga rason, si Pablo nagdugang: “Mag-untat kamo sa pagtandog sing di-matinlo nga butang.”​​—⁠2 Corinto 6:​14-​17a.

Nahangpan man sang mga Cristiano nga ang pagpakigbahin sa disparatis nga mga rituwal wala nagagarantiya sing kalipay kag kabuganaan​​—⁠ilabi na kay ang pagpakigbahin sa sini nga mga selebrasyon wala nagapahamuot sa Dios. (Manugwali 9:​11; Isaias 65:​11, 12) Dugang pa, ang Biblia nagapaandam sa mga Cristiano nga maghaganhagan kag magpugong sang kaugalingon sa ila paggawi. (1 Timoteo 3:​2, 11) Maathag nga indi nagakaigo sa isa nga nagpangangkon nga nagasunod sa mga panudlo ni Cristo nga makigbahin sa isa ka selebrasyon nga nagapakita sing sobra nga kagansal.

Makagalanyat man kag makakulunyag sa igbalatyag ang selebrasyon sang Bag-ong Tuig, ang Biblia nagasugo sa aton nga ‘mag-untat sa pagtandog sa di-matinlo nga butang’ kag “tinluan ang aton kaugalingon sang tagsa ka dagta sang unod kag espiritu.” Para sa mga nagatuman, si Jehova makalilipay nga nagagarantiya: “Batunon ko kamo. . . . Ako mangin inyo amay, kag kamo akon mangin mga anak.” (2 Corinto 6:⁠17b⁠–​​7:1) Sa pagkamatuod, nagasaad sia sing dayon nga mga pagpakamaayo kag kabuganaan sa mga mainunungon sa iya.​​—⁠Salmo 37:⁠18, 28; Bugna 21:​3, 4, 7.

[Nota]