Masaligan Mo Bala ang Laygay sang Biblia?

‘Patihan ko bala ang ginasiling sini nga tawo?’ Mahimo amo sini ang ipamangkot mo sa imo kaugalingon kon ginatanyagan ka sing segunda-mano nga awto sang isa ka ahente ukon kon ginasaaran ka sang isa ka pulitiko nga nagapangampanya. Indi mo luyag nga uyangan ang imo kuarta kag tion sa mga produkto kag mga impormasyon nga wala sing pulos.

MAHIMO ipamangkot mo man sa imo kaugalingon: ‘May matun-an bala ako nga mapuslanon sa Biblia? Kon basahon ko kag tun-an ang Biblia, indi ayhan mauyang ang akon tion kag panikasog?’ Ang sabat sa sini nga mga pamangkot mabasa mismo sa isa ka bersikulo sang Biblia: “Ang kaalam ginapakamatarung sang iya mga binuhatan.” (Mateo 11:19) Masiling nga “kaalam” ukon mapuslanon ang isa ka laygay, kon maayo ang nangin resulta sang gin-aplikar ini nga laygay. Ang masunod amo ang panaysayon sang mga tawo nga naghinguyang sing tion nga tun-an ang Biblia. Ang ila mga komento magabulig sa imo sa pagpamat-od kon bala takus gid man nga maghinguyang ka sing tion nga basahon kag tun-an ining pinasahi nga libro.

Mga Pamangkot Tuhoy sa Kamatayon kag sa Pihak nga Kinabuhi

Ang taga-Estados Unidos nga si Karen, nagapati halin sang bata pa sia nga kon mapatay ang maayo nga tawo mapalangit ini. Apang sang mapatay ang iya iloy, ini nga pagpati wala gid makalugpay sa iya. Namangkot sia sa iya kaugalingon: ‘Karon nga yara na sa langit si Nanay, ano ayhan ang hitsura niya? Paano kami magkitaay pananglit makapalangit man ako? Kon mapatay ako, diin ayhan ako makadto?’

Maukod nga nagtuon si Karen sa Biblia upod sa mga Saksi ni Jehova. Natun-an niya nga ang mga patay daw nagakatulog lamang sing mahamuok kag wala ini nagapalangit. “Wala [sila] makahibalo sang bisan ano,” siling sang Manugwali 9:5. Apang, makita pa ayhan niya ang iya iloy?

Ang simple nga mga dinalan sang Biblia naghatag sa iya sing lugpay kag paglaum: “Dili kamo matingala sini; kay ang takna magaabut nga ang tanan nga yara sa mga lulubngan magapamati sang iya [ni Cristo] tingug kag magagowa.” (Juan 5:28, 29) Natun-an ni Karen nga paagi sa Iya Anak, banhawon sang Dios nga nag-inspirar sang Biblia ang mga patay diri mismo sa duta. “Ang panudlo sang Biblia tuhoy sa kamatayon kag pagkabanhaw rasonable gid,” siling niya.

Ano nga Relihion ang Husto?

Sang si Angela nga taga-Roma nag-edad sing 14 anyos, ginpangamuyuan sia sang ministro sang Pentecostal agod mabaton niya ang balaan nga espiritu. Pagkatapos sang pangamuyo, nakapamulong sia sa lainlain nga hambal. Apang, nabinagbinag sang iya mga ginikanan nga wala nagahisanto sa Biblia ang ginatudlo sang mga Pentecostal. Gani wala na sila magsimba sa Pentecostal, sa baylo nagsugod sila sa pagtuon sa Biblia upod sa mga Saksi ni Jehova.

Sang primero, nasubuan gid si Angela sang makita niya nga wala nagahisanto sa Biblia ang ginapanghimo sang iya anay relihion. Halimbawa, nabasa niya ang ginasiling sang Juan 17:3: “Ini amo ang kabuhi nga walay katapusan, nga pagkilalahon ka nila nga ikaw lamang ang matuud nga Dios, kag ang imo ginpadala nga si Jesu-Cristo.” Nahangpan ni Angela nga dapat niya anay makilala ang Dios antes sia kahamut-an sang Dios. “Ngaa ginpasagahay sang Dios ang iya espiritu sa akon kay halos indi ko sia gani kilala?” pamangkot niya. Si Angela nagsiling, “Nagapasalamat gid ako kay Jehova nga paagi sa iya inspirado nga Pulong ginpakita niya sa akon ang husto nga paagi sang pagsimba.”

Mga Laygay nga Nagpabag-o sang Kabuhi

“Madali ako maakig,” siling ni Gabriel nga taga-India. “Kon mag-init gani ang ulo ko, nagasinggitan ako kag ginapahurabog ko ang mga pagkabutang. Nagapanakit man ako kag nagapamuyayaw. Ang pagtuon sa Biblia nakabulig sa akon nga kontrolon ang akon kaugalingon. Karon, kalmado na ako bisan pa sa mapiot nga kahimtangan.”

Nabasa ni Gabriel ang mga teksto subong sang Hulubaton 16:32 nga nagasiling: “Ang makuli sa pagpangakig maayo pa sa gamhanan, kag ang nagagahum sang iya espiritu sang sa nagaagaw sing banwa.” Ini nga teksto nakabulig man kay Dhiraj nga malandas ang pagkamaakigon. Nagsiling sia: “Nabuligan ako sini nga teksto nga marealisar nga kon magpadala ka sa imo kaakig, nadaug ka sang imo kaluyahon, apang kon mapunggan mo ang imo kaakig, ginapakita sini nga mabakod ka.”

Si Philip nga taga-Bagatnan nga Aprika, isa ka kriminal. Ang pagpakig-away, pagpangawat, kag ang pagpamuyayaw kinaandan na lang sa iya. Nagakapriso sia bangod sa mga krimen nga ginpanghimo niya. Walay sapayan sini, luyag gid ni Philip nga makilala ang Dios. Sang nagtuon sia sa Biblia upod sa mga Saksi ni Jehova, nagtubo ang iya handum nga alagdon ang Dios, gani namat-od sia nga magbag-o. Gin-untatan niya ang iya malain nga paggawi kag wala na sia nakig-angot pa sa iya mga kaupdanan anay nga kriminal. Ano nga mga teksto sa Biblia ang nagbulig sa iya nga magbag-o?

Ginpakita sa iya sang mga Saksi ni Jehova ang ginsiling ni Jesus sa Juan 6:44: “Walay tawo nga makakari sa akon kon indi sia pagbuyukon sang Amay nga nagpadala sa akon.” Si Philip nagsiling, “May nakita si Jehova nga maayo sa akon amo nga ginbuyok niya ako sa sining mahigugmaon nga paghiliutod.” Indi man malipatan ni Philip ang mga rekord sa Biblia tuhoy sa kaluoy ni Jehova sa mahinulsulon nga mga makasasala. “Paagi sa sini nga mga rekord, nakita ko nga rasonable si Jehova sa pagpakig-angot sa di-himpit nga mga tawo nga nagahinulsol,” siling ni Philip.—2 Samuel 12:1-14; Salmo 51.

Ang taga-Australia nga pamatan-on nga si Wade, palahubog, adik, sugarol, kag imoral. Pagdumdom niya amo ini ang makapahalipay sa iya, apang indi gali. Isa ka adlaw nasugilanon niya ang mga Saksi ni Jehova kag ginbaton niya ang wala sing bayad nga pagtuon sa Biblia. Ano ang natun-an ni Wade?

“Natandog gid ako kon paano si Jesus nakig-angot sa mga tawo,” siling ni Wade. “Mainayuhon sia, maluluy-on, kag mahigugmaon sa tanan nga tawo, ilabi na sa mga bata. Samtang nagadugang ang akon ihibalo tuhoy sa iya, nagatubo pa gid ang akon handum nga ilugon sia. Natun-an ko man sa Biblia kon paano mangin maayo nga tawo kag kon paano ko pa mapauswag ang akon personalidad.” Apang kamusta naman ang malain nga mga butang nga nahimo niya? Si Wade nagpadayon: “Suno sa natun-an ko sa Biblia, kon hinulsulan ko ang akon mga sala kag tadlungon ang akon pagkabuhi, patawaron ako sang Dios. Ang matuod, mahimo ako magkabuhi sing dayon sa paraiso sa duta. Nalangkag gid ako sa pag-abot sina nga tion!” (Mateo 5:5) Ginbayaan na ni Wade ang tanan niya nga bisyo kag nagaalagad sia karon kay Jehova nga may matinlo nga konsiensia.

Ang bag-o mo lang nabasa nga mga komento, panaysayon sang mga tawo nga naghandum nga bag-uhon ang ila kabuhi. Gintun-an nila sing maayo ang Biblia agod mahibaluan nila kon bala ang mga panudlo sini makabulig sa ila nga malubad ang ila mga problema kag masabat ang ila mga pamangkot. Nakumbinsi sila nga masaligan kag praktikal ang mga laygay sang Biblia bangod natigayon nila ang maayo nga resulta sang gin-aplikar nila ini. Ngaa indi mo ini pagtilawan?

Ang inspirado nga mga pulong sang una nagasiling: “Bulahan ang tawo nga makakita sing kaalam, kag ang tawo nga makaagum sing paghangup, kay ang pagdaug sini maayo pa sang sa pagdaug sang pilak kag ang kapuslanan sini sang sa bulawan nga bus-og. Bilidhon pa sia sang sa mga rubi, kag wala sing bisan ano sang mga butang nga imo mahandum mapaanggid sa iya. Ang kalawigon sang mga adlaw yara sa iya mga kamut nga too; sa iya kamut nga wala yara ang mga manggad kag kadungganan. Ang iya mga dalanon mga dalanon sang pagkahamuut, kag ang tanan niya nga banas paghidait. Sia kahoy sang kabuhi sa mga nagakapyot sa iya; bulahan ang tagsatagsa nga nagahawid sa iya.”—Hulubaton 3:13-18.

[Kahon/Retrato sa pahina 25]

KON PAANO ANG ISA KA BILANGGO NABULIGAN SANG BIBLIA

Si Bill kag ang iya asawa malipayon gid. Apang, antes sang ila una nga anibersaryo sa kasal, ginbilanggo sia bangod sa sala nga ginhimo niya pila ka tuig antes sini.

Sang mabaton ni Bill nga wala na sia sing kahilwayan, namat-od sia nga gamiton sing mapuslanon ang iya tion samtang yara sia sa bilangguan. “Sa teheras lang ako nagatener kag nagabasa sing Biblia,” siling niya. Gin-aplikar man niya ang iya mga natun-an. “Mabuot ako kag mainabyanon sa mga kaupod ko sa selda kag nakita nila nga indi ko luyag mag-entra sa ila malain nga ginahimo. Nagasiling sila tuhoy sa akon: ‘Luyag ni Bill nga mag-isahanon lang sia, agod mabasa niya ang Biblia kag makilala ang Dios. Wala sia sing gamo nga tawo.’

“Bangod kilala nila ako nga mabuot, wala nila ako ginadalahig sa mga ginamo. Nakita man sang mga guardia nga wala ako nagapasaway sa ila. Gani, ginapaobra nila ako pirme sa mga lugar nga malayo sa grupo sang mga bilanggo. Ang pag-aplikar sang mga natun-an ko sa Biblia daku gid nga proteksion sa akon.”

Nagtambong si Bill sa mga miting sang mga Saksi ni Jehova sa sulod mismo sang bilangguan kag makunyagon nga ginpaambit niya sa iban nga mga bilanggo ang iya natun-an. Gintugmawan sia subong isa sang mga Saksi ni Jehova didto mismo sa bilangguan. Tuhoy sa iya nagligad, sia nagsiling: “Gin-uyangan ko ang halos 50 ka tuig sang akon kabuhi, apang luyag ko na karon magbag-o. Kumbinsido ako nga mahimo lamang ini sang isa ka bilanggo kon iaplikar niya ang mga panudlo sang Biblia. Kag matun-an mo lamang sing sibu ang Biblia paagi sa pagtuon upod sa mga Saksi ni Jehova. Ang ila relihion amo lamang ang nagatudlo sing kamatuoran tuhoy sa Biblia. Amo lamang sina ang himuon mo.”

Karon nga nakagua na si Bill sa bilangguan, masako sia nga nagaalagad upod sa isa ka kongregasyon sang mga Saksi ni Jehova sa Estados Unidos. Sila sang iya asawa padayon nga nagatuon sa Pulong sang Dios kag ginaaplikar nila ini sa ila kabuhi. Ginapabaloran gid nila ang ginasiling sang Isaias 48:17, 18, NW: “Ako, si Jehova, amo ang imo Dios, ang Isa nga nagatudlo sa imo agod makabenepisyo ka, ang Isa nga nagatuytoy sa imo sa dalanon nga dapat mo laktan. O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.”

[Retrato sa pahina 23]

Karen, E.U.A.

[Retrato sa pahina 23]

Angela, Romania

[Retrato sa pahina 24]

Dhiraj, India

[Retrato sa pahina 24]

Gabriel, India

[Retrato sa pahina 24, 25]

Si Philip kag ang iya pamilya, Bagatnan nga Aprika

[Retrato sa pahina 24]

Wade, Australia