“Pagtuytoy sang Espiritu sang Dios” Distrito nga Kombension sang mga Saksi ni Jehova
◼ LINIBO sa sining tatlo ka adlaw nga kombension, nga ginhiwat sa Estados Unidos sugod sang Mayo 23-25, ang ginhiwat man sa linibo ka siudad sa bug-os nga kalibutan. Sang 2007, kapin sa 12 milyones ang nagtambong sa 3,200 ka kombension!
Sa sini nga tuig diri sa Pilipinas, magasugod ang programa sa Biernes kag Sabado sa alas 8:20 sa aga paagi sa musika. Ang tema sa Biernes nga napasad sa Juan 16:13 amo, ‘Ang Espiritu Magatuytoy sa Inyo sa Bug-os nga Kamatuoran.’ Ang pamulongpulong nga mabatian sa sina nga aga nagalakip sang, “Ngaa Dapat Magpatuytoy sa Espiritu sang Dios?” kag “Pagpanghikot sang Balaan nga Espiritu sa Pagpanuga!” Ang simposium nga “Mga Matutom sang Una—Gintuytuyan sang Espiritu sang Dios” magalakip sang mga bahin nga “Sang Panahon ni Moises,” “Sang Adlaw sang mga Hukom,” kag “Sang Unang Siglo.” Ang keynote address nga, “Ang Papel sang Balaan nga Espiritu sa Pagtuman sa Katuyuan ni Jehova,” amo ang magatakop sa programa sa aga.
Ang una nga pamulongpulong sa Biernes sang hapon amo ang “Mga Sabat sa mga Pamangkot Tuhoy sa Balaan nga Espiritu,” pagasundan ini sang mga pamulongpulong nga “Ginausisa sang Espiritu . . . ang Madalom nga mga Butang sang Dios” kag “Mangin mga Manugpamati kag mga Manugtuman sang Pulong sang Dios.” Ang simposium nga “Mga Pamatan-on—Maglakat Suno sa Balaan nga Espiritu!” magalakip sa mga bahin nga “Sa Eskwelahan,” “Sa Ulubrahan,” “Sa Sulod sang Puluy-an,” “Sa Kongregasyon,” “Kon Nagalingawlingaw,” kag “Kon Nagaisahanon.” Magatakop ang programa paagi sa pamulongpulong nga “Mga Pamatan-on—Amligi ang Inyo Kaangtanan kay Jehova!” Mabuligan sini ang mga pamatan-on nga maamligan ang ila kaangtanan kay Jehova.
Ang tema sa Sabado nga programa amo ang ‘Magsab-ug Para sa Espiritu,’ nga napasad sa Galacia 6:8. Lakip sa programa sa aga amo ang tatlo ka bahin nga simposium nga may tema nga “Pagtuytoy sang Espiritu sang Dios sa Aton Ministeryo.” Ang programa sa aga matapos paagi sa pamulongpulong sa bawtismo, kag pagkatapos sini, bawtismuhan ang mga kandidato.
Ang una nga bahin sa Sabado sa hapon amo, “Ang mga Manunulat sang Biblia—‘Gintuytuyan sang Balaan nga Espiritu,’” kag pagasundan ini sang lima ka bahin nga simposium nga “Ginpabaskog sang Balaan nga Espiritu,” kag ang mga tema sini amo ang masunod, “Sa Pagbato sa Pagsulay,” “Sa Paglandas sa Kalapyo kag Pagluya sing Buot,” “Sa Pag-atubang sa Paghingabot,” “Sa Pagpamatok sa Makahalalit nga Pag-ipit sang mga Katubotubo,” kag “Sa Pagbatas sa Kabudlayan.” Matapos ang programa sa sina nga adlaw paagi sa matahom nga bahin nga natig-uluhan “Magpabilin Kamo sa Gugma sang Dios.”
Pasangkaron sa Domingo sang aga ang tema nga “Padayon sa Paglakat Suno sa Espiritu,” nga napasad sa Galacia 5:16. Binagbinagon sa siam ka bahin nga simposium nga “Palambua ang ‘Bunga sang Espiritu’” ang siam ka bunga sang espiritu nga ginsambit sa Galacia 5:22, 23. Matapos ang programa sa aga paagi sa pamulongpulong publiko nga “Aguma ang mga Pagpakamaayo Paagi sa Hari nga Ginatuytuyan sang Espiritu ni Jehova!” Ang una nga bahin sa sina nga hapon amo ang de-kostyum nga drama nga may tema nga, “Indi Pagbiyai ‘ang Imo Una nga Gugma.’” Ginapakita sini ang mga panimuot kag kahimtangan nga mahimo nagluntad sa tunga sang mga Cristiano sa hingapusan nga bahin sang unang siglo. Hinakpan ang kombension paagi sa pamulongpulong nga “Mainunungon nga Nagaalagad Upod sa Organisasyon nga Ginatuytuyan sang Espiritu ni Jehova.”
Subong pa lang, planuha na nga daan agod makatambong ka. Agod mahibaluan mo ang pinakamalapit nga hiwatan sang kombension sa inyo duog, makig-angot sa mga Saksi ni Jehova sa inyo lugar ukon magsulat sa manugbalhag sini nga magasin.