Ngaa Yari Kita Diri?

Ano ang kahulugan sang kabuhi?

MAGLUWAS sa sini nga mga pamangkot, ang iban namangkot pa gid: Magaedad lang bala kita sing 70 ukon 80 ka tuig dayon mapatay? Ukon makapaabot pa kita sing mas malawig kag mas makaalayaw nga kabuhi?​—Salmo 90:9, 10.

Ginapamangkot naton ini sa tion nga marealisar naton nga malip-ot gid ang kabuhi. Siempre pa, indi na kinahanglan nga mabutang anay sa ital-ital ang aton kabuhi antes kita mamangkot sini. Ginapamangkot man ini sang iban kon nalugaw-an sila ukon samtang ginahunahuna nila ang ila nahimuan sa kabuhi.

Si Dave may daku sing sueldo nga trabaho, may matahom nga apartment, kag pirme nagalipaylipay upod sa iya mga abyan. Nagsiling sia: “Isa ka gab-i, nagalakatlakat ako pauli halin sa party sang hinali lang nagsulod sa akon pensar ‘Amo lang bala sini ang kabuhi?​—Magakabuhi lang bala ako sing malip-ot dayon mapatay? Ukon basi may iban pa nga katuyuan ang kabuhi?’ Napamangkot ko ini bangod nabatyagan ko nga daw may kulang gid sa akon kabuhi sadto.”

Sa iya libro nga Man’s Search for Meaning, si Viktor Frankl nagsiling nga ginpamangkot ini sang iban niya nga mga kaupod nga nakalampuwas sa Holocaust (tion nga ginpamatay ang mga Judiyo) sang makagua sila sa prisuhan. Pagpauli nila, nahibaluan sang iban sa ila nga napatay na ang ila mga pinalangga sa kabuhi. Si Frankl nagsulat: “Daw ano kasakit para sa isa nga sa adlaw sang katumanan sang iya mga ginalauman, kabaliskaran gali ini sangsa iya ginapaabot!”

Ang mga Nagapamangkot

Ang mga tawo halin pa sang una nagapamangkot na kon ngaa yari kita diri. Mabasa naton sa Biblia ang tuhoy sa mga tawo nga nagpamangkot kon ano ang katuyuan sang ila kabuhi. Sang nadula ang tanan niya nga manggad, napatay ang tanan niya nga kabataan, kag nagmasakit sing grabe, si Job namangkot: “Ngaa bala nga wala ako mapatay kutub sa tiyan, ukon mabugtoi sing ginhawa sang ginbun-ag ako sang akon iloy?”​—Job 3:11.

Amo man sini ang ginbatyag ni propeta Elias. Sang pamatyag niya nga sia na lang ang nagaalagad sa Dios, nanganduhoy sia: “Tuman na; karon, O GINOO, kuhaa ang akon kabuhi.” (1 Hari 19:4) Natural lang ini nga balatyagon. Sa pagkamatuod, ginlaragway sa Biblia si Elias nga “isa ka tawo nga may balatyagon kaangay sang aton.”​—Santiago 5:17.

Isa ka Madinalag-on nga Pagkabuhi

Ginpaanggid ang kabuhi sa isa ka paglakbay. Subong nga mahimo ka maglakbay bisan pa wala ka sing pat-od nga kaladtuan, mahimo ka man magkabuhi nga wala sing katuyuan. Kon matuod ini sa imo bahin, mahimo matabo sa imo ang ginsiling sang isa ka kilala nga manunulat nga si Stephen R. Covey tuhoy sa mga tawo nga nagasinako lang agod mabatyagan nila nga may katuyuan ang ila kabuhi. Nagsulat sia nga may mga tawo nga “nakatigayon sing kadalag-an nga wala sing kapuslanan, kadalag-an nga natigayon nila kabaylo sa mga butang nga narealisar nila sang ulihi nga amo gali ang mas importante para sa ila.”

Indi bala nga wala sing pulos ang magdalidali sa paglakbay kon indi man lang pat-od ang imo kaladtuan? Sing kaanggid, ang pagsinako agod lamang mabatyagan nga may katuyuan ang kabuhi magadala lang sing kalugaw-an.

Kinaandan lamang sa tanan nga tawo, bisan ano man ang iya gindak-an kag edad nga magpamangkot kon ngaa yari kita diri. Bangod ini sa aton duna nga kinahanglanon nga indi mapun-an sang materyal nga mga butang. Amo ini ang aton kaangtanan sa Dios. Binagbinaga kon ano ang ginhimo sang iban agod makita nila ang katuyuan sang kabuhi.

[Blurb sa pahina 4]

Ang pagsinako agod lamang mabatyagan nga may katuyuan ang kabuhi magadala lang sing kalugaw-an

[Retrato sa pahina 3]

Namangkot si Job kon ngaa ginbun-ag pa sia

[Retrato sa pahina 4]

Si Elias may “balatyagon kaangay sang aton”