Gindesinyo Bala Ini?
Ang Makini sa Enerhiya nga Boxfish
Agod makahimo sing salakyan nga mas mabakod, mas makini sa gasolina ukon krudo, kag indi makahalit sa aton palibot, daw indi mapatihan nga ang mga manughimo sing salakyan nakakuha sing inspirasyon sa idalom sang tubig! Ang boxfish, nga masami nga makita sa mga coral reef sa tropiko nga mga baybayon, nangin maayo nga modelo sa paghimo sang salakyan nga mamag-an pero mas mahapos makasumalang sa mabaskog nga hangin.
Binagbinaga: Ang boxfish madasig maglangoy. Sa isa ka segundo makalangoy ini sa distansia nga anom ka pilo sang kalabaon sang iya lawas. Pero ang iya kadasigon indi bangod sa iya kusog. Daw indi mapatihan nga ang daw kahon nga korte sini amo gali ang nagpahapos sa iya paglangoy. Sa pagkamatuod, ang mga enhinyero naghimo sing boxfish nga modelo sang salakyan kag ginpaagi ini sa isa ka tanel nga may mabaskog nga hangin. Diri nila nakita nga ini nga desinyo mas mahapos makasumalang sa hangin kon ikumparar sa iban nga gamay nga mga salakyan.
Matig-a ang lawas sang boxfish kag halos wala ini sing unod, amo nga mabakod ini kag mamag-an. May magagmay nga mga alimpuros nga nagaporma sa palibot sang isda, agod indi sia madala bisan masulog ang tubig. Amo nga ang boxfish makahulag sing maayo kag indi dali mahalitan.
Nagapati ang mga enhinyero nga ang pag-ilog sa boxfish makabulig sa ila nga makahimo sing salakyan nga mas hilway sa katalagman kag makini sa gasolina ukon krudo, pero mamag-an. “Ang matuod,” siling sang nagapanguna sa research nga si Dr. Thomas Weber, “nakibot gid kami nga ang daw kahalam-utan tulukon nga isda amo pa ang nangin modelo sa paghimo sing salakyan nga mas mahapos makasumalang sa hangin kag makini sa gasolina ukon krudo.”
Ano sa banta mo? Natabuan lang bala ang korte kahon nga lawas sang boxfish? Ukon may nagdesinyo sini?
[Credit Lines sang retrato sa pahina 10]
Boxfish: © Hal Beral/V&W/SeaPics.com; car: Mercedes-Benz USA