Mga Kinaiya nga Mapuslanon Tubtob San-o​—Pagkabunayag

PRINSIPIO SA BIBLIA: “Sin-o ang makaduaw sa [iya sang Dios] tolda? . . . Ang isa nga nagakabuhi nga wala sing kasaypanan, nagahimo sing matarong kag nagahambal sing kamatuoran sa iya tagipusuon.”—Salmo 15:1, 2.

MGA BENEPISYO: Ginapabaloran sang kalabanan nga tawo ang pagkabunayag kag integridad. Pero ano kon mag-utwas ang oportunidad nga makaganar ang isa ka tawo sa indi bunayag nga paagi kag indi sia madakpan? Sa sini nga sitwasyon, importante ang tagipusuon, ang nasulod nga pagkatawo.

Ang obra ni Raquel amo ang pagpamalaklon sing mga suplay. Nagsiling sia: “Ginatanyagan ako sing kickback sang pila ka ahente. Nagpromisa sila nga kon sa ila ako mabakal, ihatag nila sa akon ang ‘diskuento’ sa baylo nga sa kompanya nga ginaobrahan ko. Apang gindumdom ko ang laygay sang Biblia parte sa pagkabunayag gani nangindi ako. Nabalitaan ini sang akon boss, gani nagdugang pa ang iya kompiansa sa akon.”

Kon natintar si Raquel nga batunon ang tanyag, mahimo nga nakaganar sia. Apang ano kon matukiban ini sang iya amo? May obra pa bala gihapon si Raquel? Kag paano kon mangita sia sing obra sa ulihi? Mas importante kay Raquel ang iya konsiensia kag pagtahod sa kaugalingon. “Ang maayo nga ngalan mas maayo nga pilion sangsa madamo nga manggad; ang pagtahod mas maayo sangsa pilak kag bulawan,” siling sang Hulubaton 22:1.

Si Jessie bunayag man kag masaligan, gani maayo ang iya reputasyon sa iya amo. Ang mga benepisyo? Wala lamang sia ginhimo nga manedyer kundi ginhatagan pa sia sing dugang nga kahilwayan sa iskedyul sang iya obra. Gani, may dugang sia nga tion para sa iya asawa kag mga anak kag sa espirituwal nga mga hilikuton.

Ang iban nga mga amo nagakuha sing mga empleyado sa mga grupo nga kilala sa ila pagkabunayag. Halimbawa, ang manedyer sang isa ka kompanya sa Pilipinas nagsulat sa opisina sang mga Saksi ni Jehova didto nga nagaagda sa mga Saksi nga mag-aplay sa pag-obra sa ila. “Mapisan [sila], bunayag, kag dedikado,” siling niya. Pero ang dapat padunggan sa sini amo si Jehova nga Dios nga nagatudlo sa aton nga ‘dumtan ang malain’ kag ‘higugmaon ang maayo.’—Amos 5:15.