Ang Kaalam nga Nagaamlig

BISAN pa may pila ka bentaha kon manggaranon ka, ang manggad makahatag man sing mga problema, ilabi na bangod sang aton makatalagam nga tion. (2 Timoteo 3:1-5) Sa pila ka pungsod, ang manggaranon, lakip ang mga turista nga daw manggaranon kon tulukon nangin puntariya sang mga kawatan kag sang mga kidnaper nga nagapangayo sing ransom.

Tuhoy sa isa ka indi mauswagon nga pungsod, ang isa ka balita nagsiling: “Ang masingki nga mga kinawatay, pagpangdaya kag pagpangidnap nagahimo sa manggaranon kag imol nga magkaaway. Ang mga restawran may naarmasan nga mga guardia; ang mga pader sang balay sang mga manggaranon may tunukon nga mga alambre, dalagku nga mga suga, mga kamera, kag mga guardia.” Amo man sini sa madamo pa nga mga pungsod.

Pero siling sang Biblia, “wala gani sing nagapamahog sa imol.” Paano ikaw makabenepisyo sa sining bilidhon nga kaalam? Kon nagaistar ka sa lugar nga bantog sa krimen kag kasingki ukon kinahanglan ka nga magkadto sa sini nga lugar, likawi nga daw manggaranon ka tulukon agod indi ka makatawag sing igtalupangod. Hunahunaa sing maayo kon ano ang imo isuksok kag bitbiton sa publiko, ilabi na kon kitaon gid ini. “Makita sang tawo nga maalamon ang katalagman,” siling sang Hulubaton 22:3, “apang ang kulang sing kinaalam nagadiretso lang kag nagaantos sang malain nga resulta.”

Ang kaalam nga narekord sa Biblia nagapakita nga nagaulikid sa aton ang Manunuga. Luyag niya nga wala sing malain nga matabo sa aton. Ini nga “kaalam pangamlig,” siling sang Manugwali 7:12, kay “makatipig ini nga buhi sa tawo nga may yara sini.”