Kon Paano Mangayo sing Pasaylo

NGAA ISA KA HANGKAT?

Bag-o lang kamo nagbaisay sang imo tiayon. ‘Indi ako dapat mangayo sing pasaylo,’ siling mo sa imo kaugalingon. ‘Indi man ako ang may sala!’

Ginpabay-an mo na lang ini, pero yara gihapon ang kaakig. Gusto mo mangayo sing pasaylo, pero nabudlayan ka sa pagsiling sang simple nga mga tinaga nga “Pasayluha ako.”

NGAA NAGAKATABO INI?

Bugal. “Kon kaisa kabudlay magsiling sing ‘Pasayluha ako’ bangod sang akon bugal,” siling sang bana nga si Charles.a Bangod sa sobra nga bugal mahimo mahuya ka nga batunon nga may sala ka man.

Pagtamod. Mahimo maghunahuna ka nga dapat ka mangayo sing pasaylo kon ikaw ang may sala. Ang asawa nga si Jill nagsiling: “Kon nahibal-an ko nga ako gid ang may sala, mahapos lang magsiling nga ‘Pasayluha ako.’ Pero kon pareho kami nga nakahambal sing mga butang nga ginhinulsulan namon, mabudlay ini himuon. Ngaa abi ako ang mangayo sing pasaylo kon pareho kami nga may sala?”

Pamatyag mo indi ka dapat mangayo sing pasaylo kon sa banta mo ang imo tiayon amo gid ang nakasala. “Kon nagapati ka gid nga wala ka sing sala,” siling sang bana nga si Joseph, “ang indi pagpangayo sing pasaylo pamatuod nga wala ka sing sala.”

Gindak-an. Mahimo nagdaku ka sa pamilya nga talagsa lang nagapangayo sing pasaylo. Kon amo, mahimo nga nasaw-ahan ka nga akuon ang imo mga sala. Bangod wala ka naanad sa pagpangayo sing pasaylo sang bata ka pa, wala mo ini ginahimo sang daku ka na.

ANO ANG MAHIMO MO?

Hunahunaa ang imo tiayon. Hunahunaa ang tion nga may nangayo sing pasaylo sa imo kag bangod sini kanami sang imo pamatyag. Ngaa indi mo man ini pag-ipabatyag sa imo tiayon? Bisan pa wala ka nagapati nga ikaw ang may sala, makapangayo ka sing pasaylo bangod nasaklaw ang balatyagon sang imo tiayon ukon bangod sang indi hungod nga resulta sang imo ginhimo. Makabulig ini para maumpawan ang imo tiayon.​—Prinsipio sa Biblia: Lucas 6:31.

Hunahunaa ang inyo pag-asawahay. Indi pagtamda ang pagpangayo sing pasaylo nga kapierdihan mo kundi kadalag-an ini sang inyo pag-asawahay. Kay man, ang tawo nga nagahinakit “mas mabudlay daugon sangsa mabakod nga siudad,” siling sang Hulubaton 18:19. Kon posible gid man, mabudlay gid mapasag-uli ang paghidait sa sini nga kahimtangan. Apang kon mangayo ka sing pasaylo malikawan mo nga magdaku pa ang problema. Daw subong bala nga ginauna mo ang inyo pag-asawahay sangsa imo kaugalingon.​—Prinsipio sa Biblia: Filipos 2:3.

Mangayo dayon sing pasaylo. Mabudlay gid man mangayo sing pasaylo kon indi ikaw ang may sala. Pero ang sala sang imo tiayon indi rason nga magpakita ka sing indi maayo nga batasan. Gani indi mangalag-ag nga mangayo sing pasaylo kag maghunahuna nga pagligad sang tion malimtan lang ang problema. Kon mangayo ka sing pasaylo, mas mahapos man sa imo tiayon nga mangayo sing pasaylo. Kag kon pirme mo ini ginahimo, mangin mas mahapos ini para sa imo.​—Prinsipio sa Biblia: Mateo 5:25.

Pamatud-i nga sinsero ka. Ang pagrason sa imo ginhimo indi pareho sa pagpangayo sing pasaylo. Kag ang daw nagapang-insulto nga pagsiling, “Pasensia na nga sobra ka gali ka sensitibo sa sini” indi gid pagpangayo sing pasaylo! Batuna nga may salabton ka man kag nasakit mo ang balatyagon sang imo tiayon, may rason man sia nga masaklaw ukon wala.

Mangin realistiko. Mapainubuson nga batuna nga makahimo ka sing sala. Kay man, tanan kita makahimo sing sala! Bisan pa nagahunahuna ka nga wala ka sing sala sa natabo, dumduma nga ang imo bersion sang natabo mahimo nga wala nagasugid sang tanan nga natabo. “Ang una nga nagasugid sang iya kaso daw husto gid,” siling sang Biblia, “tubtob mag-abot ang iya kontra kag usisaon sia.” (Hulubaton 18:17) Mas mahapos sa imo nga mangayo sing pasaylo kon may realistiko ka nga pagtamod sa imo kaugalingon kag sa imo mga kakulangan.