Pagbisita sa Nicaragua

MASAMI ginatawag sang mga tawo ang Nicaragua nga duta sang mga linaw kag mga bulkan. Yari diri ang pinakadaku nga linaw sa Sentral Amerika—ang Lake Nicaragua. Ginatawag ini sang tumandok nga mga tribo nga Cocibolca, buot silingon “Matam-is nga Dagat.” May ginatos ini ka isla kag amo lamang ini ang tab-ang nga linaw nga may mga bagis, mga isda nga espada, kag bulanbulan.

Sa Nicaragua man makita ang isa sa pinakaligwin nga mga rehiyon sa Sentral Amerika—ang Mosquito Coast. Sisentay singko kilometros ang kalabaon sini kag ang daku nga bahin sini nagapangalihid sa nasidlangan nga baybayon pakadto sa kaingod nga Honduras. Ang Miskito (isa pa ka ngalan sang Mosquito) isa sa pila ka tumandok nga grupo sang mga tawo sa Nicaragua nga ang kasaysayan nagsugod pa antes mag-abot ang mga taga-Europa sang ika-16 nga siglo.

Ang Miskito may suod nga kaangtanan sa isa kag isa kag may pinasahi nga mga kustombre. Halimbawa, sa Miskito nga lenguahe wala sing ginagamit nga pormal nga tinaga sa pagtawag kaangay sang “Mister” ukon “Miss.” Sa mga uma, ginatawag sang mga pamatan-on ang mga may edad nga “Tiyoy” ukon “Tiyay” bisan indi nila paryente. Ang madugay na nga kustombre sang Miskito amo nga ang babayi nagatamyaw sa iya suod nga mga abyan ukon paryente paagi sa pagbesobeso. Dayon, ang babayi nga nag-una sa pagtamyaw magaginhawa sing madalom.