Ang Biblia Bala Isa Lang ka Maayo nga Libro?

• Ang Biblia nakalampuwas sa grabe nga mga pag-atake sang impluwensiado nga mga tawo. Halimbawa, sa pila ka Cristiano nga pungsod sang 1300-1500 C.E., “ang pagpanag-iya kag pagbasa sang Biblia sa bernakular nga lenguahe [ang lenguahe sang ordinaryo nga mga tawo] ginkabig gid subong pagbato kag pagpamatok sa simbahan,” siling sang libro nga An Introduction to the Medieval Bible. Ang mga iskolar nga nagbadbad sang Biblia sa bernakular nga lenguahe ukon nagpalapnag sa pagtuon sang Biblia nagrisgo sang ila kabuhi. Ang pila ginpatay.

• Bisan pa madamo sang kaaway ang Biblia, amo ini ang pinakalapnag nga napanagtag nga libro sa kasaysayan asta subong. Sing bug-os ukon sing bahin, ginbulubanta nga lima ka bilyon ka kopya ang naimprinta sa sobra 2,800 ka lenguahe. Maathag ini nga kinatuhayan sa mga libro sang pilosopiya, siensia, kag kaangay sini nga mga libro nga may limitado nga sirkulasyon kag sa malip-ot nga tion indi na mapuslanon.

• Ang Biblia nagbulig nga mapreserbar kag mapauswag ang pila ka lenguahe diin ginbadbad ini. Daku gid ang impluwensia sang German nga badbad ni Martin Luther sa sina nga lenguahe. Ang una nga edisyon sang King James Version ginlaragway nga “mahimo ang nagaisahanon nga pinakaimpluwensiado nga libro nga nabalhag” sa Ingles.

• Ang Biblia may “impluwensia gid sa kultura sang taga-Katundan, indi lang sa relihioso nga pagpati kag hilikuton, kundi pati man sa art, literatura, kasuguan, pulitika, kag iban pa nga tuman kadamo agod hinambitan.”—The Oxford Encyclopedia of the Books of the Bible.

Pila lamang ini ka kamatuoran nga nagpatuhay sa Biblia. Pero, ngaa daku gid ang impluwensia sini? Ngaa handa ang mga tawo nga irisgo ang ila kabuhi para sa sini? Ang madamo nga rason nagalakip sang masunod: Ang Biblia nagaunod sang mga panudlo sa moral kag espirituwal nga nagapakita sang tumalagsahon nga kaalam. Ang Biblia nagabulig nga mahangpan ang kabangdanan sang pag-antos kag pag-ilinaway sang mga tawo. Labaw sa tanan, nagasaad ang Biblia nga tapuson ini nga mga problema, kag ginasugid pa gani sini kon paano ini matabo.

Ang Biblia Nagahatag sing Laygay sa Moral kag sa Espirituwal

Ang sekular nga edukasyon importante. Pero ang “edukasyon . . . nga nagabutang sang mga inisyal sa punta sang imo ngalan . . . indi garantiya sang kaalam sa moral,” siling sang isa ka editoryal sa pamantalaan sa Canada nga Ottawa Citizen. Matuod, madamo nga edukado nga tawo—lakip ang mga negosyante kag mga pulitiko—ang nagapanonto, nagapangdaya, kag nagapangawat, amo nga “nadula gid ang pagsalig” sa ila, suno sa pagtuon sa bilog nga kalibutan nga ginbalhag sang Edelman, nga isa ka kompanya nga nagatuon sa kaangtanan sa publiko.

Ang Biblia nagapokus sa pagtudlo sa moral kag espirituwal. Nagahatag ini sing laygay sa “kon ano ang husto kag matarong kag bunayag, ang bug-os nga dalanon sang kaayo.” (Hulubaton 2:9) Sa pag-ilustrar, ang isa ka 23 anyos nga lalaki nga tawgon naton nga si Stephen, napriso sa Poland. Samtang sa prisuhan, nagtuon sia sing Biblia kag naapresyar niya ang praktikal nga laygay sini. “Nahangpan ko na karon kon ano ang buot silingon nga ‘padunggan ang imo amay kag ang imo iloy,’” sulat niya. “Natun-an ko man kon paano kontrolon ang akon balatyagon, labi na gid ang akon pagkamaakigon.”—Efeso 4:31; 6:2.

Ang prinsipio nga gin-aplikar gid ni Stephen amo ang mabasa sa Hulubaton 19:11: “Ang paghangop sang tawo nagapahaganhagan sang iya kaakig, kag katahom sa iya bahin nga palampason ang sala.” Sa karon, kon makaatubang si Stephen sing mabudlay nga sitwasyon, ginahunahuna niya ini sing kalmado kag ginaaplikar ang mga prinsipio sa Biblia nga makabulig sa iya. “Nasapwan ko nga ang Biblia amo ang pinakamaayo nga libro sang laygay,” siling niya.

Si Maria, nga isa sa mga Saksi ni Jehova, gin-insulto sa publiko sang nagapamatok nga babayi, nga nagaeskandalo gid. Pero imbes nga magbalos, kalmado sia nga nagpadayon sa paglakat. Sang ulihi, nakonsiensia ang babayi sa iya ginhimo kag ginpangita ang mga Saksi. Pagligad sang mga isa ka bulan, nagkitaay gid man sila, ginhakos niya si Maria kag nangayo sing pasaylo. Dugang pa, narealisar niya nga kalmado kag may pagpugong sa kaugalingon si Maria bangod sang iya relihioso nga pagtuluuhan. Ang resulta? Ang nagapamatok anay nga babayi kag ang lima ka miembro sang iya pamilya gintun-an sa Biblia sang mga Saksi ni Jehova.

“Ang kaalam ginapamatud-an nga matarong paagi sa mga resulta sini,” siling ni Jesucristo. (Lucas 7:35) Gani, ang mga prinsipio sa Biblia epektibo gid! Nagabulig ini sa aton agod mangin maayo kita nga tawo. Nagahatag ini sing kaalam sa tawo nga kulang sing kinaalam, nagapasadya sa tagipusuon, kag nagapasanag sa mga mata paagi sa pagpaathag sa moral kag espirituwal.—Salmo 19:7, 8.

Ang Biblia Nagapaathag sang Pag-antos kag Pag-ilinaway

Kon nagatuon sang epidemia, ginahibalo sang mga nagapangusisa kon ano ang ginahalinan sini—kon ano rason sang paglapnag. Maaplikar man ini nga prinsipio agod mahangpan ang rason sa pag-antos kag pag-ilinaway sang mga tawo. Sa liwat, daku gid ang mabulig sang Biblia, kay may rekord ini sang pinakadumaan nga kasaysayan, ang tion nga nagsugod ang aton mga problema.

Ginapakita sang libro sang Genesis nga nagsugod ang problema sang nagrebelde ang una nga mga tawo batok sa Dios. Naghimo sila sang ila kaugalingon nga mga talaksan sa moral—kinamatarong nga iya lamang sang aton Manunuga. (Genesis 3:1-7) Sugod sadto, makapasubo nga ang mga tawo sa kabilugan nangin independiente man. Ang resulta? Ang kasaysayan sang mga tawo nagapakita, indi sang kahilwayan kag kalipay, kundi sang pag-ilinaway, pagpigos, kag pagbinahinbahin sa moral kag espirituwal. (Manugwali 8:9) Husto gid ang ginasiling sang Biblia: “Wala sing ikasarang ang tawo sa pagtuytoy sang iya tikang.” (Jeremias 10:23) Ang maayong balita amo nga malapit na lang madula ang epekto sang pagrebelde sang tawo.

Ang Biblia Nagahatag sing Paglaum

Ang Biblia nagapasalig sa aton nga ang Dios indi magtugot nga magpadayon ang kalainan kag ang pag-antos, bangod ginahigugma niya ang mga nagatahod sa iya awtoridad kag mga talaksan. Ang mga malauton ‘magaantos sang resulta sang ila ginhimo.’ (Hulubaton 1:30, 31) Sa pihak nga bahin, “ang mga mahagop magapanubli sang duta, kag mangin malipayon gid sila sa bugana nga paghidait.”—Salmo 37:11.

Tumanon sang Dios ang iya katuyuan nga mangin mahidaiton ang duta paagi sa “Ginharian sang Dios.” (Lucas 4:43) Ina nga Ginharian isa ka bug-os kalibutan nga gobierno, kag paagi sa sini ipakita sang Dios ang iya kinamatarong subong Soberano sang mga tawo. Gin-angot ni Jesus ang Ginharian sa duta sang nagsiling sia sa iya modelo nga pangamuyo: “Magkari ang imo Ginharian. Matuman ang imo kabubut-on sa duta.”—Mateo 6:10.

Huo, ang mga sakop sang Ginharian sang Dios magahimo sang kabubut-on sang Dios, nga nagakilala sa Manunuga subong may kinamatarong nga Manuggahom imbes nga mga tawo. Madula na ang korapsion, kakagod, kaimulon, pagpasulabi sa rasa, kag inaway. Literal na nga may isa ka kalibutan, isa ka gobierno, kag isa ka talaksan sa moral kag espirituwal.—Bugna 11:15.

Importante ang pagtudlo agod makita inang bag-o nga kalibutan. “Ang kabubut-on [sang Dios] amo nga ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran,” siling sang 1 Timoteo 2:3, 4. Ina nga kamatuoran nagalakip sang mga panudlo sang Biblia parte sa ginatawag naton nga palatukuran sang Ginharian—ang mga kasuguan kag prinsipio nga ginapatuman sini, kag ang halimbawa sini mabasa sa Sermon sa Bukid ni Jesucristo. (Mateo, kapitulo 5-7) Samtang ginabasa mo ining tatlo ka kapitulo, handurawa kon mangin ano ang kabuhi kon ang tanan nagaaplikar sang kaalam ni Jesus.

Dapat bala kita makibot nga ang Biblia amo ang pinakalapnag nga napanagtag nga libro? Indi gid! Ang mga panudlo sini maathag nga naghalin sa Dios. Kag ang lapnag nga sirkulasyon sini nagapakita sang handum sang Dios nga ang mga tawo sa tanan nga lenguahe kag pungsod makatuon parte sa iya kag makabenepisyo sa mga pagpakamaayo sang iya Ginharian.—Binuhatan 10:34, 35.