TOPIKO SA KOBER
Paano Mo Mapauswag ang Imo Batasan?
SANG nagtunog ang alarm clock ni Austin, natuyo pa sia. Pero nagbangon sia dayon, nagsuksok sang iya bayo nga pang-ehersisyo nga ginhanda niya sang gab-i pa lang, kag nag-jogging. Ginahimo niya ini sing tatlo ka beses kada semana sa sulod na sang isa ka tuig.
Bag-o lang nagbaisay si Laurie kag ang iya bana. Naakig gid sia kag naugot. Gani nagkadto sia dayon sa kusina, nagkuha sang isa ka putos nga tsokolate, kag gin-ubos ini. Amo sini pirme ang iya ginahimo kon akig sia.
Sa ano magkapareho sanday Austin kag Laurie? Natalupangdan man nila ukon wala, ginahimo nila ang ila naandan na. Amo na ini ang ila batasan.
Sa imo bahin, may maayo man bala nga mga batasan nga gusto mo pauswagon? Mahimo gusto mo mag-ehersisyo sing regular, magtulog sing bastante, ukon pirme makig-istorya sa imo mga pinalangga.
Ukon basi gusto mo untatan ang malain nga batasan, pareho sang pagpanigarilyo, pagkaon sang madamo nga junk food, ukon malawig nga paggamit sing Internet.
Ang matuod, ang malain nga batasan mahapos sugdan pero mabudlay untatan!
Gani paano mo mapauswag ang imo maayo nga batasan kag mauntatan ang malain? Binagbinaga ang tatlo ka panugda base sa mga prinsipio sa Biblia.