3 Indi Mangampo

Madamo ang nagapati nga kinahanglan sing 21 ka adlaw para maandan ang isa ka batasan. Pero ang matuod, ginapakita sang pagtuon nga ang iban nga tawo mas madasig makahimo sing mga pagbag-o kag ang iban naman mas mahinay. Maluyahan ka bala sing buot bangod sini?

Hunahunaa ini: Ibutang ta nga gusto mo mangin batasan ang pag-ehersisyo sing tatlo ka beses kada semana.

• Sa una nga semana, nahimo mo ini.

• Sa ikaduha nga semana, napaslawan ka sing isa ka bes.

• Sa ikatlo nga semana, nahimo mo na naman ini.

• Sa ikap-at nga semana, kaisa ka lang makaehersisyo kag haluson pa.

• Sa ikalima nga semana, nahimo mo na naman ini, kag nangin regular na ini kada semana.

Nalab-utan sing lima ka semana antes mo naandan ang bag-o nga batasan. Daw kadugay, pero kon mahimo mo ini, malipay ka gid nga nakapalambo ka sing bag-o kag maayo nga batasan.

Ginapalig-on kita sang Biblia nga indi mangampo dayon. Ang importante indi kon pila ka beses kita napukan ukon napaslawan, kundi kon pila ka beses kita nagbangon.

ANO ANG MAHIMO MO?

• Indi ka maghunahuna nga kon napaslawan ka sing makaisa, wala ka na gid sing tsansa. Paabuta nga bisan nagatinguha ka, mapaslawan ka kon kaisa.

• Magpokus sa mga tion nga nagmadinalag-on ka. Halimbawa, kon nagatinguha ka nga pauswagon ang imo paagi sa pagpakig-istorya sa imo kabataan, pamangkuta ang imo kaugalingon: ‘San-o ang ulihi nga tion nga gusto ko singgitan ang akon kabataan, pero nakapugong ako? Ano na lang ang ginhimo ko? Paano ko ini mahimo liwat?’ Ini nga mga pamangkot makabulig sa imo nga magpokus sa imo mga kadalag-an imbes sa imo mga kapaslawan.

Gusto mo bala mahibaluan kon paano ang mga prinsipio sa Biblia makabulig sa iban pa nga bahin sang imo kabuhi, pareho sang kon paano mapahaganhagan ang kabalaka, mangin malipayon ang pamilya, kag mabatyagan ang matuod nga kalipay? Makig-istorya sa mga Saksi ni Jehova, ukon kadtui ang amon website nga jw.org/hil.