Pagbisita sa Kyrgyzstan

ANG Kyrgyzstan ginapalibutan sang matag-as nga kabukiran nga ang mga putukputukan nakulapan sing snow. Sakop ini sang Sentral nga Asia kag napalibutan sang Kazakhstan, Uzbekistan, Tajikistan, kag China. Kabukiran ang halos 90 porsiento sang pungsod. Ginapabugal sang Kyrgyzstan ang pinakamataas nga bahin sang kabukiran sang Tian Shan, nga 7,439 metros sa ibabaw sang nibel sang dagat. Kagulangan ang halos 4 porsiento sang kadutaan sang pungsod. Gani talalupangdon nga makita sa Kyrgyzstan ang isa sa pinakamalapad nga kagulangan sang walnut nga natural nga nagtubo.

Kilala nga maabiabihon kag matinahuron ang mga Kyrgyz. Sa Kyrgyzstan, ginagamit ang matinahuron nga porma sang “ikaw” sa pagpakig-istorya sa isa nga mas magulang, kag sa pagtanyag sa iya sang imo pulungkuan sa pangpubliko nga salakyan, subong man sang pinakaprominente nga pulungkuan sa lamesa.

Ang kalabanan nga pamilya may tatlo ukon mas madamo pa nga kabataan. Sa masami, ang agot nga bata nga lalaki ang nagapabilin upod sa iya mga ginikanan, bisan pa may asawa na sia, kay sia ang maatipan sa ila pagtigulang.

Gamay pa ang mga bata nga babayi, ginatudluan na sila sing mga ulubrahon sa balay para mangin maayo sila nga mga asawa. Pag-edad nila sing mga 15 anyos makasarang na sila sa pag-atipan sang panimalay. Kon magpakasal, kinaandan na nga may ginahanda para sa nobya. Lakip sa sini ang kobre-kama, habol, lainlain nga bayo, kag karpet nga ginhimo sing manomano. Ang nobyo nagahatag sing kuarta kag kasapatan bilang dote.

Sa tion sang mga selebrasyon kag mga lubong, nagaihaw sila sing karnero ukon kabayo. Ginalasa nila ini kag ginapartida. Ang partida nga mabaton sang mga bisita depende sa ila edad kag posisyon; sa liwat makita na naman sa sini nga tradisyon ang ila pagkamatinahuron. Dayon ginahanda ang popular nga pagkaon sang pungsod, ang beshbarmak. Nagakinamot sila kon magkaon sini.