Ang Masiri nga Kolor sang Pollia Berry

ANG gamay nga berry nga pamilya sang tanom nga Pollia condensata, nga masapwan sa Aprika, amo ang may pinakamasiri nga kolor nga blue nga makita sa tanom. Pero ang matuod, wala sing blue nga kolor ang bahin sang bunga sini. Ano ang sekreto sang masiri sini nga kolor?

Binagbinaga: Ang mga selula sa panit sini nga berry may mapino nga mga lanot nga nagaraya pareho sang posporo. Ini nga mga lanot nagaporma sing nagasampaw nga mga anib, kag ang kada sampaw nagaligdas gamay, amo nga nagaporma ini sang spiral nga korte. Ang mga lanot mismo indi blue. Naga-blue ang kolor kon tan-awon bangod sa porma sang pagsampawanay sang mga lanot. Gani ang pagplastar sini amo ang rason kon ngaa masiri, nagabadlak, kag daw nagainggat ang kolor sini nga berry. Ang kalabanan nga selula daw blue kon tan-awon. Pero sa lain nga anggulo, daw green, pink, ukon yellow ini kon tan-awon bangod sa tama ka gamay nga pagbag-o sa pagsampawanay sang mga anib. Dugang pa, kon usisaon gid ini, ang kolor sini indi klaro kundi buron, pareho sa kolor sang piktyur sa kompyuter.

Bangod ang Pollia nga mga berry wala sing kolor, wala nagalus-aw ang kolor sini bisan pa mapulak na ini. Ang matuod, ang pila ka berry nga gin-ipo sobra isa ka gatos ka tuig na ang nagligad, daw pareho lang gihapon sa preska nga berry ang kolor! Suno sa mga researcher bisan pa puro lang liso ang unod sang berry, ginaamag ini gihapon sang mga pispis sa palibot.

Nagapati ang mga sientipiko nga ang pamaagi sang Pollia nga berry sa pagpagua sang kolor makabulig para makahimo sang mga lugom nga wala nagalus-aw kag mga dokumento nga indi mapeke.

Ano sa banta mo? Ang masiri nga kolor sang Pollia nga berry resulta bala sang ebolusyon? Ukon gindesinyo ini?