PAGMAHAL SANG MGA BALAKLON—ANO ANG PUEDE MO HIMUON?
Mag-adjust sa Sitwasyon
Kon amat-amat ang pagmahal sang presyo sang mga balaklon, posible indi naton ini matalupangdan ilabi na kon nagadaku man ang aton sueldo. Pero kon gulpi naman magmahal ang presyo sang mga balaklon kag amo lang gihapon ang aton sueldo, mahimo mabalaka gid kita kag ma-stress, ilabi na kon may ginasagod kita nga pamilya.
Indi naton mapunggan ang pagmahal sang presyo sang mga balaklon. Pero makabulig gid sa aton kon batunon naton nga indi naton ini makontrol.
KON NGAA IMPORTANTE INI
Kon ginabaton dayon naton nga indi naton makontrol ang pagmahal sang mga balaklon, mas mahapos para sa aton nga . . .
mangin kalmado. Kon kalmado kita, makapamensar kita sing maayo kag makahimo sing mas maayo nga mga desisyon.
malikawan ang indi maalamon nga mga buhat. Halimbawa, indi gid maalamon kon pawalaan naton ang aton mga balayran ukon magpagusto kita bakal sang mga butang nga indi ta man kinahanglan.
malikawan nga makigbais sa miembro sang aton pamilya parte sa kuarta.
mabal-an kon ano ang dapat naton himuon para mabakal ang mga butang nga kinahanglan gid naton kag kon paano kita makakinot para mabuhinan ang aton gasto.
ANG PUEDE MO HIMUON
Mag-adjust dayon. Kon magmahal ang presyo sang mga balaklon, maalamon gid nga buhinan ang aton mga galastuhan kon posible. May mga tawo nga nagagasto sing sobra sangsa ila masarangan, amo nga nagabudlay ang ila sitwasyon. Kay man, daw pareho lang ini sa paglangoy kontra sa direksion sang nagahuganas nga suba. Siempre gusto mo man mahatag ang kinahanglanon sang imo pamilya kag maatipan sila. Pero tandai ini: Mas kinahanglan sang imo pamilya ang imo gugma, tion, kag atension sangsa bisan ano pa nga butang.
Kon pilion naton ang pagkabuhi nga sobra sa aton masarangan, daw pareho lang ini sa paglangoy kontra sa direksion sang nagahuganas nga suba