PAGMAHAL SANG MGA BALAKLON—ANO ANG PUEDE MO HIMUON?

Mangin Maalwan

Kon nagapamigado ka bangod nagamahal ang presyo sang mga balaklon, posible nagapamensar ka nga indi ka puede mangin maalwan. Pero ang matuod, ang paghatag sa iban makabulig sa imo para masarangan ang kapigaduhon. Kag indi kinahanglan nga daku ang imo gastuhon para mangin maalwan ka.

KON NGAA IMPORTANTE INI

Ang kaalwan, bisan sa gamay lang nga mga paagi, nagapalipay sa aton kag nagabulig para magnami ang aton pamatyag. Ang pila ka doktor nagsiling nga ang paghatag may benepisyo sa aton panglawas kag mental health. Halimbawa, makapahaganhagan ini sang aton kabalaka kag stress, makapanubo sang presyon sang dugo, kag makabuhin pa gani sa mga palanakit sa lawas. Makapanami man ini sang aton tulog.

“Mas malipayon ang nagahatag sangsa nagabaton.”—Binuhatan 20:35.

Kon nagahatag kita sa iban, sa pinansial man ukon sa iban nga mga paagi, mas mahapos sa aton nga magpabulig sa ila kon kita naman ang nagakinahanglan. Si Howard nga taga-England nagsiling: “Ginatinguhaan gid namon sang akon asawa nga maghatag kag magbulig sa iban, gani wala kami nagabatyag nga kabug-atan kami sa ila kon kami naman ang nagakinahanglan.” Siempre, ang mga tawo nga maalwan wala gid nagapaabot nga balusan ang ila kaayo. Pero bangod sang ila kaalwan, makakita sila sang matuod nga mga abyan nga handa gid magbulig sa ila kon sila naman ang nagakinahanglan.

“Himua nga kinabatasan ang paghatag sa iban, kag sila magahatag sa inyo.”—Lucas 6:38.

ANG PUEDE MO HIMUON

Hatagi ang iban kon ano ang ara sa imo. Bisan pa pigado ka, may mahatag ka gihapon bisan paagi lang sa simple nga pagkaon. Nagaistar sa Uganda si Duncan kag pigado ang ila pamilya. Pero padayon sila nga nangin maalwan. Si Duncan nagsiling: “Kon Domingo, ginaagda namon sang akon asawa ang iban nga magkaon sa amon balay bisan simple lang ang amon handa. Nalipay gid kami nga makaupod sila.”

Siempre, kon nagahatag ka sa iban kinahanglan mo man mangin balanse. Kay basi sige ka lang hatag pero nagaantos na gali ang imo pamilya.—Job 17:5.

Testingi ini: Agdaha ang iban bisan sa simple lang nga kaonkaon, pulupangape, ukon gamay nga merienda. Kon may mga gamit ka nga wala mo na ginagamit, puede mo bala ini mahatag sa imo mga abyan ukon mga kaingod nga posible nagakinahanglan sini ukon makapanginpulos sa sini?

Makahatag ka sa iban pa nga paagi. Ang pila sa pinakamanami nga mga regalo nga mahatag naton indi lang kuarta. Halimbawa, puede naton mahatag ang aton tion kag mapakita nga nagaulikid kita sa iban paagi sa pagbulig sa ila. Puede man kita makahatag paagi sa aton ginahambal. Sugiri ang iban nga ginaapresyar mo sila kag palangga mo gid sila.

Testingi ini: Buligi ang iban sa ila mga ulubrahon sa balay, kon may mga kalay-uhon, ukon sa iban pa nga butang nga dapat nila asikasuhon. Puede ka makasulat sang card ukon puede mo man i-text ukon i-chat ang imo abyan, bisan para lang kamustahon sia ukon silingan nga nadumduman mo sia.

Kon maalwan ka, mangin mas malipayon ka.

“Indi man pagkalimti nga maghimo sing maayo kag magpaambit sa iban sing mga butang nga yara sa imo.”—Hebreo 13:16.

Mag-asawa nga nagabulig sa may edad na nga babayi sa pagpaninlo sa iya ugsaran. Ginatanyagan niya ang mag-asawa sang mainit nga mainom samtang nagapanguha sila sang mga dahon.