May kilala ka bala nga mga Saksi ni Jehova? Ang pila sa amon mahimo kaingod mo, kaupod sa trabaho, ukon klasmeyt. Ukon basi naistorya ka na namon parte sa Biblia. Sin-o gid bala kami, kag ngaa ginasugid namon sa iban ang amon mga ginapatihan?

Pareho man kami sa iban nga tawo. Lainlain ang amon ginhalinan kag kahimtangan sa kabuhi. Ang iban sa amon lain ang relihion sang una, kag ang iban naman wala nagapati sa Dios. Pero antes kami nangin Saksi, gin-usisa namon sing maayo ang mga panudlo sang Biblia. (Binuhatan 17:11) Nakumbinse kami sa amon mga natun-an, kag personal nga nagdesisyon nga simbahon si Jehova nga Dios.

Nakabenepisyo kami sa pagtuon sa Biblia. Pareho sa iban, may mga problema man kami kag mga kaluyahon. Pero sang ginsunod namon ang mga prinsipio sang Biblia, nagbag-o gid ang amon kabuhi. (Salmo 128:1, 2) Amo ini ang isa ka rason kon ngaa ginasugid namon sa iban ang maayo nga mga butang nga natun-an namon sa Biblia.

Ginatuman namon ang mga prinsipio halin sa Dios. Ang mga prinsipio nga ginatudlo sang Biblia nagabulig sa amon nga mangin malipayon, matinahuron, bunayag, kag mainayuhon. Ini nga mga prinsipio nagabulig man sa amon nga mangin maayo nga pumuluyo kag nagapalig-on nga maghiusa ang pamilya kag mapakita ang maayo nga pamatasan. Bangod kumbinsido kami nga “ang Dios wala sing ginapasulabi,” ginakabig namon ang isa kag isa nga mga utod kag wala kami nagadampig sa pulitika ukon sa bisan ano nga rasa. Bisan pa lainlain ang amon kahimtangan sa kabuhi kag rasa, may ara kami paghiusa.—Binuhatan 4:13; 10:34, 35.

• Ngaa ang mga Saksi ni Jehova pareho man sa iban nga tawo?

• Ano nga mga prinsipio sa Biblia ang natun-an sang mga Saksi?

Madamo ang nagahunahuna nga ang mga Saksi ni Jehova bag-o lang nga relihion. Pero sobra 2,700 ka tuig na ang nagligad, ang mga alagad sang matuod nga Dios gintawag nga iya “mga saksi.” (Isaias 43:10-12) Apang asta sang 1931, gintawag kami nga mga Estudyante sang Biblia. Ngaa mga Saksi ni Jehova ang ginpili namon nga ngalan?

Nagapakilala ini sa amon Dios. Sa dumaan nga mga sinulatan, ang ngalan sang Dios nga Jehova mabasa sing linibo ka beses. Sa madamo nga translation, ini nga ngalan gin-islan sing mga titulo, pareho sang Ginuo ukon Dios. Pero ginpakilala sang matuod nga Dios ang iya personal nga ngalan nga Jehova kay Moises paagi sa pagsiling: “Ini amo ang akon ngalan sa gihapon.” (Exodo 3:15) Paagi sini, nakilala Sia nga lain sa butig nga mga dios. Nalipay gid kami nga gamiton ang balaan nga ngalan sang Dios.

Nagapahibalo ini sang amon hilikuton. Halin sa matarong nga tawo nga si Abel, madamo nga tawo sadto ang nagtuo kay Jehova. Pagligad sang ginatos ka tuig, sanday Noe, Abraham, Sara, Moises, David, kag iban pa nangin bahin man sang “tuman kadaku nga panganod sang mga saksi.” (Hebreo 11:4–12:1) Pareho sang isa nga nagatestigo sa korte pabor sa inosente nga tawo, luyag man namon isugid ang kamatuoran parte sa amon Dios.

Ginailog namon si Jesus. Gintawag si Jesus sang Biblia nga “matutom kag matuod nga saksi.” (Bugna 3:14) Si Jesus mismo nagsiling nga ‘ginpakilala niya ang ngalan sang Dios’ kag ‘nagpanaksi sa kamatuoran’ parte sa Dios. (Juan 17:26; 18:37) Gani, dapat gamiton sang matuod nga mga sumulunod ni Jesus ang ngalan ni Jehova kag ipakilala ini. Amo gid sini ang ginahimo sang mga Saksi ni Jehova.

• Ngaa ginpili sang mga Estudyante sang Biblia ang ngalan nga mga Saksi ni Jehova?

• Daw ano na kadugay nga may mga saksi si Jehova sa duta?

• Sin-o ang talalupangdon gid nga saksi ni Jehova?

Gintagna sang Biblia nga sa tapos mapatay si Jesus, magaluntad ang butig nga mga manunudlo sa tunga sang unang siglo nga mga Cristiano kag magapatiko sang kamatuoran sa Biblia. (Binuhatan 20:29, 30) Sang ulihi, amo gid sini ang natabo. Ginsamuan nila ang mga panudlo ni Jesus sang pagano nga mga panudlo, kag nagluntad ang di-matuod nga mga Cristiano. (2 Timoteo 4:3, 4) Paano namon napat-od subong nga husto ang amon paghangop sa kon ano gid ang ginatudlo sang Biblia?

Nag-abot ang tion nga ginpahayag ni Jehova ang kamatuoran. Gintagna niya nga ‘sa tion sang katapusan magadugang ang ihibalo.’ (Daniel 12:4) Sang 1870, natun-an sang isa ka gamay nga grupo nga nagapangita sang kamatuoran nga madamo nga doktrina sang simbahan ang wala nabase sa Biblia. Gani, gin-usisa nila ang orihinal nga mga panudlo sang Biblia, kag ginbuligan sila ni Jehova nga mahangpan ini.

Gintun-an sing maayo sang sinsero nga mga tawo ang Biblia. Ang maukod nga mga Estudyante sang Biblia, ang pagtawag sa amon sadto, naggamit sing pamaagi sang pagtuon nga ginagamit man namon subong. Gintun-an nila ang Biblia sing topiko por topiko. Kon may mabasahan sila nga mabudlay intiendihon, ginapangita nila sa iban nga bersikulo ang paathag sini. Kon ang ila paghangop nagasanto sa iban nga teksto sa Biblia, ginasulat nila ini. Paagi sa pagpaathag mismo sang Biblia, nasapwan nila liwat ang kamatuoran parte sa ngalan sang Dios, sa iya Ginharian, sa iya katuyuan para sa mga tawo kag sa duta, sa kahimtangan sang mga patay, kag sa paglaum nga pagkabanhaw. Bangod sini nahilway sila sa butig nga mga panudlo kag mga buhat.—Juan 8:31, 32.

Sang 1879, narealisar sang mga Estudyante sang Biblia nga dapat ipalapnag na ang kamatuoran. Gani sa sina nga tuig, ginsugdan nila ang paghimo sang magasin nga Ang Lalantawan Nagabantala sang Ginharian ni Jehova nga ginahimo namon gihapon subong. Karon, ginasugid namon ang kamatuoran sa Biblia sa 240 ka kadutaan kag sa mga 750 ka lenguahe. Nangin bugana na gid ang matuod nga ihibalo subong!

• Sang mapatay si Jesus, ano ang natabo sa kamatuoran sa Biblia?

• Paano ang kamatuoran sa Pulong sang Dios nasapwan liwat?

Tinuig na nga nagagamit, nagaimprinta, kag nagapanagtag ang mga Saksi ni Jehova sing lainlain nga bersion sang Biblia. Pero nakita namon nga kinahanglan maghimo sing bag-o nga translation nga makabulig sa mga tawo nga matun-an ang “sibu nga ihibalo tuhoy sa kamatuoran,” nga amo ang kabubut-on sang Dios sa tanan. (1 Timoteo 2:3, 4) Gani sang 1950, ginpagua ang bahin sang amon Biblia sa moderno nga lenguahe, ang Bag-ong Kalibutan nga Badbad. Masaligan kag sibu gid ang pagtranslate sini sa sobra 130 ka lenguahe.

Kinahanglan ang Biblia nga mahapos hangpon. Nagabag-o ang mga lenguahe, kag madamo nga translation ang naggamit sing indi maathag ukon dinumaan nga mga tinaga. May natukiban man nga dumaan nga mga manuskrito nga mas sibu kag kaanggid sa orihinal nga sinulatan, nga nakabulig para mahangpan sing maayo ang Hebreo, Aramaiko, kag Griego nga mga lenguahe nga gingamit sa pagsulat sa Biblia.

Kinahanglan ang translation nga sibu gid sa Pulong sang Dios. Indi dapat pagbag-uhon sang mga translator ang kaundan sang Biblia, kundi dapat nila sundon ang orihinal nga sinulatan. Pero sa kalabanan nga bersion, ang balaan nga ngalan nga Jehova gindula sa Balaan nga Kasulatan.

Kinahanglan ang Biblia nga nagapadungog sa Awtor sini. (2 Samuel 23:2) Sa Bag-ong Kalibutan nga Badbad, ang ngalan ni Jehova ginbalik sa kon diin ini mabasa sa pinakadumaan nga manuskrito sang Biblia sing mga 7,000 ka beses, subong sang ginapakita sang halimbawa sa ubos. (Salmo 83:18) Bangod gintun-an gid sing maayo ini nga Biblia sa sulod sang mga tinuig, kanami gid sini basahon kay maathag nga ginasugid sini ang panghunahuna sang Dios. Bisan wala ka sang Bag-ong Kalibutan nga Badbad sa imo lenguahe, ginapalig-on ka namon nga basahon ang Pulong ni Jehova adlaw-adlaw.—Josue 1:8; Salmo 1:2, 3.

• Ngaa kinahanglan maghimo kami sing bag-o nga translation sang Biblia?

• Ano ang dapat mo himuon kada adlaw para mahibaluan ang kabubut-on sang Dios?