Wala kami sing mga klero nga ginabayaran sa amon organisasyon. Sa baylo, pareho sang ginhimo sang Cristiano nga kongregasyon sang una, ginapili man subong ang kalipikado nga mga gulang ukon manugtatap “agod bantayan ang kongregasyon sang Dios.” (Binuhatan 20:28) Ini nga mga gulang may mabakod nga kaangtanan kay Jehova nga nagapanguna sa kongregasyon kag nagabantay, “indi nga napilitan, kundi sing kinabubut-on; indi tungod sa gugma sa di-bunayag nga pagganar, kundi sing malangkagon.” (1 Pedro 5:1-3) Ano ang ginahimo sang mga gulang para sa kongregasyon?

Ginaatipan kag ginaproteksionan nila kami. Ginagiyahan kag ginaamligan sang mga gulang ang kongregasyon sa espirituwal. Bangod nahibaluan nila nga halin sa Dios ini nga responsibilidad, wala nila ginadominahan ang katawhan sang Dios, kundi interesado sila sa amon kaayuhan kag nagabulig para mangin malipayon kami. (2 Corinto 1:24) Pareho sang isa ka manugbantay nga ginaatipan sing maayo ang iya tagsa ka karnero, ginatinguhaan man sang mga gulang nga kilalahon ang kada miembro sang kongregasyon.—Hulubaton 27:23.

Ginatudluan nila kami kon paano himuon ang kabubut-on sang Dios. Kada semana, ang mga gulang nagadumala sang mga miting sang kongregasyon para mapabakod ang amon pagtuo. (Binuhatan 15:32) Nagapanguna man sila sa pagbantala kag nagahanas sa amon sa tanan nga bahin sang ministeryo.

Ginapalig-on nila ang kada isa sa amon. Para mapabakod ang kaangtanan sang kada isa kay Jehova, ginabisitahan kami sang mga gulang sa amon puluy-an ukon ginaistorya kami sa Kingdom Hall agod buligan kami kag paumpawan paagi sa Kasulatan.—Santiago 5:14, 15.

Luwas sa ila mga responsibilidad sa kongregasyon, kalabanan sang mga gulang may mga trabaho kag responsibilidad sa ila pamilya nga nagakinahanglan sang ila tion kag atension. Ginatahod gid namon ining mapisan nga mga gulang.—1 Tesalonica 5:12, 13.

• Ano ang responsibilidad sang mga gulang sa kongregasyon?

• Paano nagaulikid ang mga gulang sa amon?

Ginsambit sang Biblia ang duha ka grupo sang Cristiano nga mga lalaki nga may mga responsibilidad sa kongregasyon—“mga manugtatap kag mga ministeryal nga alagad.” (Filipos 1:1) Sa masami, ang kada kongregasyon may pila ka gulang kag ministeryal nga alagad. Ano ang responsibilidad sang mga ministeryal nga alagad?

Nagabulig sila sa mga gulang. Ang mga ministeryal nga alagad mahimo nga bataon ukon may edad na nga mga lalaki nga masaligan, maukod, kag may mabakod nga kaangtanan kay Jehova. Ginaatipan nila ang iban pa nga hilikuton sa kongregasyon. Gani ang mga gulang makakonsentrar sa ila mga responsibilidad nga tudluan kag palig-unon ang iban.

Nagahatag sila sing praktikal nga bulig. Ang iban nga ministeryal nga alagad ginaasayn nga mga atendant para abiabihon ang mga nagatambong sa mga miting. Ang iban nagaatipan sang sound, mga literatura, account sang kongregasyon, kag nagaasayn sang mga teritoryo sa mga miembro sang kongregasyon. Nagabulig man sila sa pagmentinar sang Kingdom Hall. Ginapangabay man sila sang mga gulang nga buligan ang mga tigulang. Ano man ang responsibilidad sang mga ministeryal nga alagad, ginatahod gid sila sang kongregasyon bangod sa ila kahanda sa pagtuman sini.—1 Timoteo 3:13.

Nangin maayo sila nga halimbawa subong Cristiano nga mga lalaki. Ginpili ang mga ministeryal nga alagad bangod sa ila Cristiano nga mga kinaiya. Ginapabakod nila ang amon pagtuo kon nagahatag sila sang mga bahin sa mga miting. Paagi sa ila maayo nga halimbawa sa pagbantala, nangin matutom pa gid kami sa sini nga hilikuton. Bangod sa ila kooperasyon sa mga gulang, nangin malipayon kag nahiusa ang kongregasyon. (Efeso 4:16) Sa ulihi, mahimo man sila mangin gulang.

• Ano ang mga kinaiya sang mga ministeryal nga alagad?

• Paano sila nagabulig para mangin organisado ang hilikuton sa kongregasyon?

Pirme ginasambit sa Cristianong Griegong Kasulatan si Bernabe kag si apostol Pablo. Mga nagalakbay nga manugtatap sila nga nagabisita sa mga kongregasyon sang una. Ngaa ginahimo nila ini? Bangod nabalaka gid sila sa kahimtangan sang pareho nila nga mga Cristiano. Nagsiling si Pablo nga gusto niya ‘balikan kag duawon ang mga kauturan’ para mahibaluan ang ila kahimtangan. Handa sia sa paglakbay sing ginatos ka kilometro para makadtuan kag mapalig-on sila. (Binuhatan 15:36) Amo man sini ang ginahimo sang mga nagalakbay nga manugtatap subong.

Nagakadto sila para pabakuron kami. Ang tagsa ka manugtatap sang sirkito nagaduaw sa 20 ka kongregasyon ukon sobra pa, nagatener sa kada kongregasyon sing isa ka semana makaduha ka beses kada tuig. Ang iya eksperiensia nagapabakod sa amon, pati na ang eksperiensia sa iya asawa kon minyo sia. Ginatinguhaan nila nga makilala ang mga bata kag tigulang, kag gusto gid nila nga makaupod kami sa ministeryo kag sa amon mga ginatun-an sa Biblia. Ini nga mga manugtatap nagaupod sa mga gulang sa pagduaw kag pagpalig-on sa iban, kag nagapamulongpulong sila sa mga miting kag asembleya para pabakuron kami.—Binuhatan 15:35.

Interesado sila sa tanan. Ang mga manugtatap sang sirkito interesado gid sa espirituwal nga kahimtangan sang mga kongregasyon. Ginamiting nila ang mga gulang kag ministeryal nga alagad para mahibaluan ang pag-uswag sang kongregasyon kag ginalaygayan sila kon paano tumanon ang ila mga responsibilidad. Ginabuligan nila ang mga payunir sa ila ministeryo, kag nalipay sila nga makilala ang mga bag-uhan kag mabatian ang ila pag-uswag sa espirituwal. Handa sila sa pagsakripisyo subong “isa ka masigkamanugpangabudlay para sa [amon] kaayuhan.” (2 Corinto 8:23) Dapat ilugon naton ang ila pagtuo kag katutom sa Dios.—Hebreo 13:7.

• Ngaa nagaduaw ang mga manugtatap sang sirkito sa mga kongregasyon?

• Paano ka makabenepisyo sa ila pagduaw?

Kon may kalamidad, ginaorganisar dayon sang mga Saksi ni Jehova ang pagbulig sa ila mga kauturan nga apektado. Nagapakita ini sang amon matuod nga gugma sa isa kag isa. (Juan 13:34, 35; 1 Juan 3:17, 18) Paano kami nagabulig?

Nagaamot kami sing kuarta. Sang may daku nga tiggulutom sa Judea, ang mga Cristiano sang una sa Antioquia nagpadala sing kuarta para buligan ang ila mga kauturan didto. (Binuhatan 11:27-30) Subong, kon mahibaluan namon nga may kabudlayan ang amon mga kauturan sa iban nga lugar, nagapadala man kami sing mga amot paagi sa lokal nga kongregasyon para buligan ang mga nagakinahanglan.—2 Corinto 8:13-15.

Nagahatag kami sing praktikal nga bulig. Ginapat-od sang mga gulang sa lugar nga naigo sang kalamidad nga luwas sa katalagman ang tanan nga miembro sang kongregasyon. Ang relief committee nagaorganisar para ang mga kauturan makatigayon sing pagkaon, matinlo nga tubig, bayo, bulong, kag ilistaran. Madamo nga Saksi nga eksperto sa pagpamanday ang nagaboluntaryo sa pagbulig sa mga nahalitan kag pagkay-o sang mga balay kag Kingdom Hall. Bangod sa amon paghiusa kag pagbinuligay pirme, makahatag dayon kami sing kinahanglanon nga bulig. Indi lamang ang “mga may labot sa [amon] sa pagtuo” ang amon ginabuligan, kundi ang iban man nga tawo, bisan ano man ang ila relihion.—Galacia 6:10.

Nagahatag kami sing paumpaw paagi sa Kasulatan. Ang mga biktima sang kalamidad nagakinahanglan gid sing paumpaw. Sa sina nga tion, ginapabakod kami ni Jehova, “ang Dios nga may bug-os nga paglugpay.” (2 Corinto 1:3, 4) Nalipay kami nga isugid sa mga nasubuan ang mga promisa sang Biblia, nagapasalig sa ila nga sa indi madugay dulaon sang Ginharian sang Dios ang tanan nga trahedya nga nagaresulta sa kasakit kag pag-antos.—Bugna 21:4.

• Ngaa makabulig dayon ang mga Saksi sa tion sang kalamidad?

• Ano nga mga paumpaw halin sa Kasulatan ang mahatag namon sa ila?

Antes mapatay si Jesus, nakaupod niya ang iya apat ka disipulo nga sanday Pedro, Santiago, Juan, kag Andres. Samtang ginasaysay ni Jesus ang mga tanda sang iya presensia sa katapusan nga mga adlaw, namangkot sia sa ila: “Sin-o gid ang matutom kag mainandamon nga ulipon nga gintangdo sang iya agalon sa pagdumala sa iya panimalay, sa paghatag sa ila sang ila pagkaon sa nagakaigo nga tion?” (Mateo 24:3, 45; Marcos 13:3, 4) Ginpasalig ni Jesus ang iya mga disipulo nga subong ila “agalon,” may itangdo sia nga ulipon nga padayon nga magaaman sing espirituwal nga pagkaon sa iya mga sumulunod sa tion sang katapusan. Sin-o ining ulipon?

Gamay nga grupo sang hinaplas nga mga sumulunod ni Jesus. Ang “ulipon” nakilal-an subong ang Nagadumala nga Hubon sang mga Saksi ni Jehova. Ini ang nagaaman sing espirituwal nga pagkaon sa nagakaigo nga tion sa tanan nga sumilimba ni Jehova. Nagasalig kami nga ang matutom nga ulipon padayon nga magaaman sa amon sing “bastante nga pagkaon sa nagakaigo nga tion.”—Lucas 12:42.

Ginaatipan sini ang panimalay sang Dios. (1 Timoteo 3:15) Ginhatagan ni Jesus ang ulipon sing mabug-at nga responsibilidad sa pag-atipan sa mga hilikuton sang organisasyon ni Jehova diri sa duta, pareho sa pagtatap sa materyal nga mga pagkabutang sini, pagdumala sa pagbantala nga hilikuton, kag pagtudlo sa amon paagi sa mga kongregasyon. Gani para mahatag sa amon ang amon mga kinahanglanon sa nagakaigo nga tion, “ang matutom kag mainandamon nga ulipon” nagaaman sing espirituwal nga pagkaon paagi sa mga balasahon nga ginagamit namon sa ministeryo, kag paagi sa mga programa nga ginapresentar sa amon mga pagtilipon kag mga asembleya.

Ang ulipon matutom sa kamatuoran sa Biblia kag sa sugo nga ibantala ang maayong balita, kag mainandamon sa pag-atipan sa mga pagkabutang ni Jesus sa duta. (Binuhatan 10:42) Ang mga buluhaton sini nag-uswag kag bugana ini nga nagahatag sing espirituwal nga pagkaon bangod sa pagpakamaayo ni Jehova.—Isaias 60:22; 65:13.

• Sin-o ang gintangdo ni Jesus nga magpakaon sa iya mga disipulo sa espirituwal?

• Paano ang ulipon nangin matutom kag mainandamon?

Sang unang siglo, ang gamay nga grupo sang “mga apostoles kag [sang] mga gulang nga lalaki sa Jerusalem” nag-alagad subong nagadumala nga hubon agod maghimo sing importante nga mga desisyon para sa bug-os nga hinaplas sang Cristianong kongregasyon. (Binuhatan 15:2) Nakahimo sila sing desisyon nga ginaugyunan sang tanan paagi sa pagbinagbinag sa ginasiling sang Kasulatan kag pagsunod sa panuytoy sang espiritu sang Dios. (Binuhatan 15:25) Ini nga paagi ginasunod gihapon subong.

Ginagamit sila sang Dios sa paghimo sang iya kabubut-on. Ang hinaplas nga mga utod nga lalaki nga miembro sang Nagadumala nga Hubon nagapabalor gid sa Pulong sang Dios kag eksperiensiado sa pagtatap sa espirituwal kag organisasyonal nga mga hilikuton. Nagatipon sila kada semana para istoryahan ang kinahanglanon sang mga kauturan sa bilog nga kalibutan. Pareho sang unang siglo, ang mga instruksion nga nabase sa Biblia ginaaman paagi sa mga sulat ukon sa mga nagalakbay nga manugtatap. Paagi sini mahiusa ang panghunahuna kag hilikuton sang katawhan sang Dios. (Binuhatan 16:4, 5) Ginadumalahan man sang Nagadumala nga Hubon ang paghanda sang espirituwal nga pagkaon kag pagtangdo sa mga utod nga lalaki sing pila ka responsibilidad. Ginapalig-on man nila ang tanan nga unahon ang pagbantala sang Ginharian.

Ginasunod nila ang panuytoy sang espiritu sang Dios. Ang Nagadumala nga Hubon nagapatuytoy sa Soberano sang Uniberso, si Jehova, kag sa Ulo sang kongregasyon, si Jesus. (1 Corinto 11:3; Efeso 5:23) Ang mga miembro sini wala nagahunahuna nga mga lider sila sang katawhan sang Dios. Upod sa hinaplas nga mga Cristiano, “padayon [sila] nga nagasunod sa Kordero [si Jesus] bisan diin sia magkadto.” (Bugna 14:4) Ginapasalamatan gid sang Nagadumala nga Hubon ang aton mga pangamuyo para sa ila.

• Sin-o ang nagadumala nga hubon sang unang siglo?

• Paano nagapatuytoy sa Dios ang Nagadumala nga Hubon subong?

Ang Bethel isa ka Hebreo nga ngalan nga nagakahulugan sing “Balay sang Dios.” (Genesis 28:17, 19) Nagakaigo gid ini nga ngalan para sa mga tinukod nga ginpatindog sang mga Saksi ni Jehova sa bilog nga kalibutan. Diri ginadumalahan kag ginasuportahan ang pagbantala nga hilikuton. Ang Nagadumala nga Hubon nagaalagad sa ulong talatapan sa New York State, U.S.A. Sila ang nagatatap sa hilikuton sang mga sanga talatapan sa madamo nga pungsod. Subong grupo, ang mga nagaalagad sa sining mga talatapan ginatawag nga pamilya Bethel. Pareho sang isa ka pamilya, isa lang ang ila ilistaran, kag ulupod sila nga nagaobra, nagakaon, kag nagatuon sa Biblia.—Salmo 133:1.

Isa ka pinasahi nga lugar sang pamilya nga may masinakripisyuhon nga mga miembro. Sa kada pasilidad sang Bethel, may mga Cristianong lalaki kag babayi nga nagagamit sang ila daku nga tion sa paghimo sang kabubut-on sang Dios kag sa intereses sang Ginharian. (Mateo 6:33) Wala sila sing sueldo pero libre ang ila dalayunan kag pagkaon, kag may allowance sila para sa ila personal nga mga kinahanglanon. Ang kada isa may obra, ayhan sa opisina, kusina, ukon kalan-an. Ang iban naman nagaobra sa imprintahan ukon hilimuan sang libro, ukon nagapaninlo, nagapanglaba, nagamentinar, kag iban pa.

Isa ka masako nga lugar nga nagasuporta sa pagbantala sang Ginharian. Ang panguna nga katuyuan sang Bethel amo ang pagpalapnag sang kamatuoran sa Biblia sa madamo nga tawo. Ini nga brosyur isa ka halimbawa sini. Ginsulat ini sa idalom sang paggiya sang Nagadumala nga Hubon, kag ginpadala paagi sa kompyuter sa ginatos ka grupo sang translator sa bilog nga kalibutan. Gin-imprinta ini sa madasig nga mga imprintahan sa pila ka Bethel, kag ginpadala sa sobra 110,000 ka kongregasyon. Sa tagsa ka bahin sini nga hilikuton, ang pamilya Bethel may importante nga papel sa pinakahilingagawon nga buluhaton—ang pagbantala sang maayong balita.—Marcos 13:10.

• Sin-o ang nagaalagad sa Bethel, kag paano sila ginaatipan?

• Anong hilingagawon nga buluhaton ang ginasuportahan sang mga ulubrahon sa Bethel?

Ang mga miembro sang Bethel nagaobra sa lainlain nga departamento nga nagaatipan sa pagbantala nga hilikuton sang isa ukon kapin pa ka pungsod. Mahimo nagaobra sila sa translation, nagaimprinta sing mga magasin, nagahimo sing mga libro, nagatago sing mga literatura, nagahimo sing audio/video nga mga rekording, ukon nagaatipan sa mga kinahanglanon sang isa ka lugar.

Ginadumalahan sang Komite sang Sanga ang mga hilikuton. Ginsalig sang Nagadumala nga Hubon ang pagdumala sa kada sanga talatapan sa Komite sang Sanga nga ginahuman sang tatlo ukon mas madamo pa nga kalipikado nga gulang. Ginapahibalo nila pirme sa Nagadumala nga Hubon ang mga pag-uswag kag mga problema sa lugar nga ila ginadumalahan. Diri ginabase sang Nagadumala nga Hubon kon ano nga mga topiko ang dapat binagbinagon sa palaabuton nga mga publikasyon, miting, kag mga asembleya. Ang mga tiglawas sang Nagadumala nga Hubon ginapadala sa pagbisita sa mga sanga talatapan kag paghatag sing giya sa mga Komite sang Sanga. (Hulubaton 11:14) May isa ka espesyal nga programa nga ginahanda lakip na ang isa ka pamulongpulong sang tiglawas sang ulong talatapan para palig-unon ang mga Saksi sa sina nga lugar.

Nagasuporta sa mga kongregasyon. Ang pagporma sang bag-o nga mga kongregasyon ginaaprobahan sang responsable nga mga utod nga lalaki sa sanga talatapan. Sila ang nagatatap sang hilikuton sang mga payunir, misyonero, kag mga manugtatap sang sirkito nga nagaalagad sa sini nga lugar. Sila man ang nagaorganisar sang mga asembleya, kombension, pagtukod sang bag-o nga mga Kingdom Hall, kag pagpadala sang mga literatura sa mga kongregasyon. Ang tanan nga ginahimo sa talatapan nagaamot sa kadalag-an sang pagbantala nga hilikuton.—1 Corinto 14:33, 40.

• Paano ang mga Komite sang Sanga nagabulig sa Nagadumala nga Hubon?

• Ano ang ginahimo sa sanga talatapan?

Para mapahibalo namon sing epektibo ang “maayong balita” sa “tagsa ka pungsod kag tribo kag hambal kag katawhan,” nagahimo kami sing mga literatura sa mga 750 ka lenguahe. (Bugna 14:6) Paano namon ini nahimo? Paagi sa bulig sang mga manunulat sa bilog nga kalibutan kag sang grupo sang mapisan nga mga translator. Tanan sila mga Saksi ni Jehova.

Ang artikulo ginasulat sa Ingles. Ang Nagadumala nga Hubon amo ang nagatatap sa hilikuton sang Writing Department sa amon ulong talatapan. Ini nga departamento ang nagahatag sang mga asaynment para sa mga manunulat sa ulong talatapan kag sa iban man nga sanga talatapan. Bangod may lainlain nga ginhalinan kag kultura ini nga mga manunulat, ang amon mga balasahon may lainlain man nga topiko para sa tanan nga tawo.

Ang artikulo ginapadala sa mga translator. Kon matapos na kag maaprobahan ang artikulo, ginapadala ini paagi sa kompyuter sa mga grupo sang translator sa bilog nga kalibutan nga amo ang naga-translate, naga-check, kag naga-proofread. Nagapili sila sing husto ukon “matadlong nga mga polong sang kamatooran” para makuha ang eksakto nga kahulugan sang Ingles.—Manugwali 12:10.

Ang mga kompyuter nagapadasig sang hilikuton. Indi mabuslan sang kompyuter ang mga manunulat kag translator. Pero mapadasig sini ang hilikuton sa pag-translate. Gani, nagdesinyo ang mga Saksi ni Jehova sang Multilanguage Electronic Publishing System (MEPS). Ginapasulod diri ang gin-translate nga artikulo sa ginatos ka lenguahe upod sa mga piktyur sini, kag ginahanda para imprintahon.

Ngaa ginahimo gid namon ini, bisan pa sa mga lenguahe sang pila lamang ka libo nga tawo? Bangod kabubut-on ni Jehova nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.”—1 Timoteo 2:3, 4.

• Paano ginasulat ang amon mga publikasyon?

• Ngaa gina-translate ang amon mga literatura sa madamo nga lenguahe?

Ang amon organisasyon nagabalhag kag nagapanagtag sing minilyon ka Biblia kag mga publikasyon kada tuig nga wala ginabaligya. Nagapatindog kami kag nagamentinar sing mga Kingdom Hall kag mga talatapan sang mga Saksi. Ginasuportahan man namon ang linibo ka Bethelite kag misyonero, kag nagahatag kami sing bulig sa tion sang kalamidad. Gani mahimo mamangkot ka, ‘Paano ini tanan ginasuportahan?’

Wala sing espesipiko nga balayran, diesmos ukon ikanapulo, kag pagpangolekta. Bisan pa daku ang ginagasto sa amon pagbantala nga hilikuton, wala kami nagapangayukayo. Sobra isa ka gatos ka tuig na ang nagligad, ang ikaduha nga isyu sang magasin nga Lalantawan nagsiling nga nagapati kami nga si Jehova ang nagasakdag sa amon kag “indi gid [kami] magpakilimos ukon makitluoy sing bulig sa mga tawo” kag halin sang una wala gid namon ginhimo ini!—Mateo 10:8.

Ang amon mga hilikuton ginasuportahan sang boluntaryo nga mga donasyon. Madamo ang nagaapresyar sa amon programa sang pagtudlo sa Biblia, gani nagahatag sila sing donasyon. Ang mga Saksi nalipay man sa paghatag sang ila tion, kusog, kuarta, kag iban pa nga pagkabutang para suportahan ang kabubut-on sang Dios sa duta. (1 Cronica 29:9) Sa Kingdom Hall kag sa amon mga asembleya kag kombension, may mga kahon para sa mga luyag maghatag sing donasyon. Ukon mahimo man maghatag sing donasyon paagi sa amon website nga jw.org/hil. Ang kalabanan nga nagadonar imol lang, pareho sang babayi nga balo nga ginhinambitan ni Jesus nga naghulog sing duha ka diutay nga sensilyo sa bahandian sang templo. (Lucas 21:1-4) Gani ang bisan sin-o mahimo “magpain sang bisan pila” sing regular para iamot suno sa “ginpamat-od niya sa iya tagipusuon.”—1 Corinto 16:2; 2 Corinto 9:7.

Kumbinsido kami nga padayon nga pahulagon ni Jehova ang tagipusuon sang mga tawo nga gusto ‘magpadungog sa iya sang ila mga pagkabutang’ para suportahan ang hilikuton sang Ginharian agod matuman ang iya kabubut-on.—Hulubaton 3:9.

• Ngaa lain gid ang amon organisasyon sa iban nga relihion?

• Paano ginagamit ang boluntaryo nga mga donasyon?

Subong sang ginapakita sang ngalan nga Kingdom Hall, ang panguna nga panudlo sang Biblia nga ginabinagbinag diri nasentro sa Ginharian sang Dios. Amo ini ang tema sang ministeryo ni Jesus.—Lucas 8:1.

Sentro ini sang matuod nga pagsimba sa isa ka lugar. Diri ginaorganisar ang pagbantala sing maayong balita sang Ginharian. (Mateo 24:14) Lainlain ang kadakuon kag desinyo sang Kingdom Hall. Pero simple lang ini tanan, kag ginagamit sing duha ukon mas madamo pa nga kongregasyon. Sining karon lang, nakapatindog kami sing linibo ka bag-o nga Kingdom Hall (nagaaberids sing lima kada adlaw) para sa nagadamo nga kongregasyon. Paano ini nahimo?—Mateo 19:26.

Paagi sa mga donasyon nga ara sa komon nga pundo. Ini nga mga donasyon ginapadala sa sanga talatapan para ang kuarta mapahulam sa mga kongregasyon nga kinahanglan magpatindog ukon magpakay-o sing Kingdom Hall.

Paagi sa mga boluntaryo nga lainlain sing ginhalinan ukon kahimtangan kag wala sila sing sueldo. Sa madamo nga lugar may mga Kingdom Hall Construction Group. Ini nga mga grupo sang mga alagad kag mga boluntaryo nagasaylosaylo sa mga kongregasyon sang isa ka pungsod, bisan sa malayo nga mga lugar, para buligan ang lokal nga mga kongregasyon sa pagpatindog sang ila Kingdom Hall. Sa iban nga lugar, ang kalipikado nga mga Saksi ginatangdo para dumalahan ang pagpatindog kag pagkay-o sang mga Kingdom Hall sa isa ka rehiyon. Bisan pa madamo nga eksperto halin sa iban nga lugar ang nagabulig sa kada Kingdom Hall nga ginatukod, ang kalabanan sa mga boluntaryo mga miembro mismo sang kongregasyon. Nagamadinalag-on ini tanan bangod sa bulig sang espiritu ni Jehova kag sa tinagipusuon nga pagboluntaryo sang iya katawhan.—Salmo 127:1; Colosas 3:23.

• Ngaa ginatawag nga Kingdom Hall ang amon tilipunan sa pagsimba?

• Ngaa makapatindog kami sing mga Kingdom Hall sa bilog nga kalibutan?

Ang kada Kingdom Hall sang mga Saksi ni Jehova nagarepresentar sang balaan nga ngalan sang Dios. Gani, para sa amon ang pagtinlo kag pagmentinar sini isa ka pribilehiyo kag importante nga bahin sang amon pagsimba. Ang tanan puede magbulig.

Magboluntaryo sa pagpaninlo pagkatapos sang miting. Kada tapos sang miting nagabuligay kami sa pagpanglimpyo sang Kingdom Hall. Kada semana, ginalimpyuhan pa gid ini sing mas maid-id. Ginadumalahan sang isa ka gulang ukon ministeryal nga alagad ang pagpanglimpyo kag ginasiguro nga nasunod ang listahan sang mga tilinluan. May nagaboluntaryo sa pagpanilhig, pagpanglampaso ukon pag-vacuum sang salog, pagpanarapo, pag-areglar sang mga pulungkuan, pagpanglimpyo sang kasilyas, bintana, kag espiho, paghaboy sang basura, ukon pagtinlo sa gua lakip na sa parkingan kag hardin. Kada tuig may kabug-usan pa gid nga pagpanglimpyo. Ginapabulig man namon ang amon mga kabataan para makatuon sila sa pagtahod sa amon tilipunan sa pagsimba.—Manugwali 5:1.

Magboluntaryo kon may mga kalay-uhon. Kada tuig, ginainspeksion sing maid-id ang tanan nga bahin sang Kingdom Hall. Amo ini ang ginabasihan sang regular nga pagmentinar sa tilipunan para malikawan ang indi kinahanglanon nga mga gasto. (2 Cronica 24:13; 34:10) Ang matinlo kag namentinar sing maayo nga Kingdom Hall nagakaigo gid nga lugar para simbahon ang Dios. Paagi sa pagpakigbahin sa sini nga hilikuton, ginapakita namon nga ginahigugma namon si Jehova kag ginapabaloran gid ang amon tilipunan sa pagsimba. (Salmo 122:1) Nagahatag man ini sing maayo nga impresyon sa mga tawo sa komunidad.—2 Corinto 6:3.

• Ngaa wala gid namon ginapabay-an ang amon mga tilipunan sa pagsimba?

• Ano ang amon mga kahimusan para mangin matinlo ang amon Kingdom Hall?

Gusto mo bala mag-research para madugangan ang imo ihibalo sa Biblia? May gusto ka bala hibaluon parte sa isa ka teksto ukon karakter, lugar, ukon butang nga imo nabasahan sa Biblia? Ukon gusto mo bala mahibaluan kon paano ang Pulong sang Dios makabulig sa imo personal nga mga problema? Kon amo, tilawi nga bisitahan ang librarya sang Kingdom Hall.

May mga kagamitan ini sa pag-research. Siguro wala ka sing kompleto nga publikasyon base sa Biblia nga ginbalhag sang mga Saksi ni Jehova sa imo lenguahe. Pero ang librarya sang Kingdom Hall nagaunod sing pinakabag-o nga mga publikasyon. May lainlain man ini nga bersion sang Biblia, diksionaryo, kag iban pa nga reperensia. Puede mo magamit ang librarya antes kag pagkatapos sang mga miting. Kon may kompyuter sa librarya, posible nga may Watchtower Library ini. Isa ini ka program nga nagaunod sang koleksion sang amon mga publikasyon kag may pamaagi ini para mahapos makita ang impormasyon parte sa isa ka topiko, tinaga, ukon teksto.

Mapuslanon ini sa mga estudyante sang Pagkabuhi kag Pagministeryo nga Miting. Mahimo mo gamiton ang librarya sang Kingdom Hall kon nagahanda ka sang imo mga bahin. Ang manugtatap sang Pagkabuhi kag Pagministeryo nga Miting amo ang nagatatap sang librarya. Ginapat-od niya nga mabutang diri ang pinakabag-o nga mga publikasyon kag maareglar ini sing maayo. Makapatudlo ka sa iya ukon sa imo manunudlo sa Biblia kon paano pangitaon ang impormasyon nga imo kinahanglan. Pero indi puede ipagua sa Kingdom Hall ang mga libro. Siempre pa, dapat naton halungan sing maayo ang mga libro kag indi ini pagsulatan.

Para makita mo ang “ihibalo sang Dios,” ang Biblia nagsiling nga dapat handa ka nga pangitaon ini “subong sang mga bahandi nga natago.” (Hulubaton 2:1-5) Gani, makabulig gid sa imo ang librarya sang Kingdom Hall.

• Ano nga mga galamiton sa pag-research ang ara sa librarya sang Kingdom Hall?

• Sin-o ang makabulig sa imo nga magamit sing maayo ang librarya?

Ginsilingan ni Jesucristo ang iya mga sumulunod: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” (Mateo 5:16) Para mahimo ini, ginagamit namon ang moderno nga teknolohiya, lakip na ang Internet. Ang amon website nga jw.org amo ang opisyal nga kuluhaan sing impormasyon parte sa mga ginapatihan kag hilikuton sang mga Saksi ni Jehova. Ano ang makita mo diri?

Mga sabat sang Biblia sa kinaandan nga mga pamangkot. Mahimo mo mahibaluan ang sabat sang pila ka importante nga pamangkot sang mga tawo. Halimbawa, ang mga tract nga Madula Pa Ayhan ang Pag-antos? kag Mabuhi Pa Bala ang mga Patay? matigayon online sa sobra 600 ka lenguahe. Makita mo man ang Bag-ong Kalibutan nga Badbad sa sobra 130 ka lenguahe kag ang pila ka bulig sa pagtuon sa Biblia, pati na ang libro nga Ano Gid ang Ginatudlo sang Biblia? kag ang bag-o nga mga isyu sang Ang Lalantawan kag Magmata! Madamo sa sini nga publikasyon ang puede basahon, pamatian, ukon i-download sa mga format subong sang MP3, PDF, ukon EPUB. Puede mo gani ini i-print kag ipabasa sa interesado nga tawo sa iya lenguahe. May ara man mga video sa madamo nga sign language. Ma-download man ang audio drama sang pagbasa sa Biblia, drama sa Biblia, kag matahom nga mga musika.

Matuod nga impormasyon parte sa mga Saksi ni Jehova. Makita man diri ang pinakabag-o nga balita kag mga video clip parte sa amon bug-os kalibutan nga hilikuton, mga hitabo nga nakaapektar sa mga Saksi ni Jehova, kag ang amon pagbulig sa mga biktima sang kalamidad. Makita mo man ang iskedyul sang nagahilapit nga mga kombension kag pila ka impormasyon parte sa amon mga sanga talatapan.

Paagi sini, ginapaiwag namon ang kapawa sang kamatuoran asta sa pinakamalayo nga bahin sang duta. Nagabenepisyo ang mga tawo sa tanan nga kontinente, lakip na sa Antarctica. Ginapangamuyo namon nga “ang pulong ni Jehova padayon nga maglapnag sing madasig” sa bug-os nga kalibutan, para sa kahimayaan sang Dios.—2 Tesalonica 3:1.

• Paano ang jw.org nagabulig sa madamo nga tawo nga matun-an ang kamatuoran sa Biblia?

• Ano ang gusto mo mahibaluan sa amon website?