Madamo ang nag-untat sa pagtambong sa relihioso nga mga hilikuton bangod wala sila nakatigayon sing bulig ukon lugpay sa espirituwal. Pero, ngaa dapat ka magtambong sa Cristianong mga miting sang mga Saksi ni Jehova? Ano ang maeksperiensiahan mo didto?

Malipay ka nga makaupod ang mahigugmaon kag mainulikdon nga mga tawo. Sang unang siglo, ang mga Cristiano gin-organisar sa mga kongregasyon, kag may mga miting sila para simbahon ang Dios, tun-an ang Kasulatan, kag palig-unon ang isa kag isa. (Hebreo 10:24, 25) Bangod sa gugma nila sa isa kag isa, nagabatyag sila nga kaupod nila ang ila matuod nga mga abyan—ang ila mga utod sa espirituwal. (2 Tesalonica 1:3; 3 Juan 14) Amo man sini ang amon ginahimo kag nabatyagan nga kalipay sa amon mga miting.

Matun-an mo kon paano sundon ang mga prinsipio sa Biblia. Pareho sang ginahimo sang mga tawo sa panahon sang Biblia, ang mga lalaki, mga babayi, kag mga kabataan nagatipon sing tingob. Ang kalipikado nga mga manunudlo nagabulig sa amon nga matun-an kon paano sundon ang mga prinsipio sang Biblia sa amon pagkabuhi. (Deuteronomio 31:12; Nehemias 8:8) Ang tanan makakanta kag makakomento, amo nga mapabutyag namon ang amon paglaum subong Cristiano.—Hebreo 10:23.

Magalig-on ang imo pagtuo sa Dios. Ginsilingan ni apostol Pablo ang isa sa mga kongregasyon sadto: “Nagahandum ako nga makita kamo, . . . agod may pagbayluhanay sing pagpalig-on sa tunga ninyo, sa kada isa paagi sa pagtuo sang isa, ang inyo pagtuo kag ang akon man.” (Roma 1:11, 12) Sa mga miting, ang amon pagpakig-upod sa pareho namon nga mga Saksi nagapalig-on sang amon pagtuo kag determinasyon nga sundon ang mga prinsipio sa Biblia.

Ginaagda ka namon nga magtambong sa amon masunod nga miting. Mahigugmaon ka gid namon nga abiabihon! Wala ini sing bayad kag wala sing nagapangolekta.

• Ano nga halimbawa ang ginasunod namon sa amon mga miting?

• Ano nga mga benepisyo ang amon natigayon sa pagtambong sa Cristianong mga miting?

Bisan pa maagi kami sa masiot nga kagulangan ukon masulay sa malain nga tiempo, regular kami nga nagatambong sa amon Cristianong mga miting. Ngaa ginatinguhaan gid sang mga Saksi ni Jehova nga makig-upod sa pareho nila nga mga Saksi bisan pa may mga problema sila kag kapoy na sa trabaho?

Nagabulig ini sa amon nga makilala pa gid ang isa kag isa. Nagsiling si Pablo nga “hunahunaon naton ang isa kag isa,” buot silingon ang tanan sa kongregasyon. (Hebreo 10:24) Nagakahulugan ini nga kilalahon sing maayo ang isa kag isa. Gani ginapalig-on sang apostol nga dapat kabalak-an ang iban. Paagi sa pagpakig-istorya sa iban nga Cristianong pamilya, nahibaluan namon nga ang pila sa ila nagmadinalag-on sa pag-atubang sa mga problema nga pareho sa amon, gani nakabulig man ini sa amon.

Nagapabakod ini sang amon pag-abyanay. Sa amon mga miting, indi lamang kami magkilalahay kundi suod man nga mag-abyanay. May mga tion nga ululupod kami nga nagakinasadya. Ano ang epekto sini sa amon? Mas ginapabaloran kag ginahigugma pa gid namon ang isa kag isa. Gani, kon may problema ang isa sa amon, ginabuligan dayon namon sia bangod sa matuod nga pag-abyanay. (Hulubaton 17:17) Paagi sa pagpakig-upod sa tanan nga miembro sang amon kongregasyon, ginapakita namon nga “pareho [kami] nga may pag-ulikid sa isa kag isa.”—1 Corinto 12:25, 26.

Ginapalig-on ka namon nga pilion nga abyan ang nagahimo sang kabubut-on sang Dios. Makita mo ini nga mga abyan sa mga Saksi ni Jehova. Palihug indi pagtuguti ang bisan ano nga magpugong sa imo nga makig-upod sa amon.

• Ngaa importante gid sa amon nga makig-upod sa isa kag isa sa mga miting?

• San-o ka ayhan namon makaupod sa amon mga miting?

Ang mga nagatambong sa Cristianong mga miting sadto nagakanta, nagapangamuyo, kag nagabasa kag nagabinagbinag sang Kasulatan. Wala sila sing mga ritwal. (1 Corinto 14:26) Amo man sini ang ginahimo sa amon mga miting.

Ang mga instruksion nabase sa Biblia kag praktikal. Kon Sabado ukon Domingo, ang kada kongregasyon nagatipon para sa 30 minutos nga pamulongpulong base sa Biblia. Ginabinagbinag diri kon paano ang Kasulatan naangot sa aton kabuhi kag sa aton tion karon. Tanan kami ginapalig-on nga sundan ang pagbasa sa amon Biblia. Pagkatapos sini, may isa ka oras nga Pagtinuon sa “Ang Lalantawan.” Puede magkomento ang tanan sa topiko nga ginabinagbinag sa tulun-an nga edisyon sang Lalantawan. Makabulig ini sa amon nga sundon ang giya sang Biblia. Pareho nga topiko ang ginatun-an sa sobra 110,000 ka kongregasyon sa bilog nga kalibutan.

Ginabuligan kami para mag-uswag ang amon pamaagi sa pagtudlo. Nagatipon man kami sa tungatunga sang semana para sa programa nga may tatlo ka bahin nga natig-uluhan Ang Aton Cristianong Pagkabuhi kag Pagministeryo, base sa materyal nga makita sa bulanan nga Pagkabuhi kag Pagministeryo nga Workbook Para sa Miting. Ang una nga bahin sini nga miting, Mga Bahandi sa Pulong sang Dios, nagabulig sa amon nga mangin pamilyar sa isa ka bahin sang Biblia nga nabasa sing abanse sang kongregasyon. Dayon, ang Mangin Epektibo sa Ministeryo nagalakip sing mga pasundayag kon paano binagbinagon ang Biblia sa iban. May isa ka manuglaygay nga magaobserbar kag magabulig sa amon kon paano kami mag-uswag sa amon pagbasa kag pagpakighambal. (1 Timoteo 4:13) Ang katapusan nga bahin nga Pagkabuhi Bilang Cristiano nagabinagbinag kon paano namon maaplikar ang praktikal nga mga leksion sang mga prinsipio sa Biblia sa amon kabuhi. May pamangkot-kag-sabat ini nga pagbinagbinag nga nagapadalom sang amon paghangop sa Biblia.

Kon magtambong ka sa amon mga miting, sigurado nga malipay ka sa imo matun-an sa Biblia.—Isaias 54:13.

• Ano ang ginahimo sa mga miting sang mga Saksi ni Jehova?

• Diin sa amon mga miting ang gusto mo tambungan?

Ano ang natalupangdan mo sa mga piktyur sa sini nga brosyur? Indi bala nagabayo gid sing pormal ang mga Saksi ni Jehova kon magtambong sila sa ila mga miting? Ngaa importante gid sa amon ang pamayo kag pamustura?

Para ipakita ang pagtahod sa amon Dios. Ang Dios wala nagatulok sa itsura sang isa. (1 Samuel 16:7) Pero kon magsimba kami sa iya, gusto gid namon nga ipakita ang pagtahod sa iya kag sa pareho namon nga mga Saksi. Kon mag-atubang ka sa hari ukon presidente, ginasiguro mo gid nga presentable ka tan-awon bangod may pagtahod ka sa iya. Amo man sini ang amon ginabatyag kon magtambong kami sa amon mga miting. Gusto namon ipakita ang pagtahod sa “Hari sang mga pungsud,” si Jehova nga Dios, kag sa lugar nga ginatipunan namon sa pagsimba.—Jeremias 10:7.

Para ipakita ang maayong pamatasan nga natun-an namon. Ginapalig-on sang Biblia ang mga Cristiano nga mangin “maligdong kag maugdang” sa ila pamayo. (1 Timoteo 2:9, 10, Biblia sang Katilingban sang mga Kristiano) Ang isa nga “maugdang” wala nagasuksok sing bayo nga makakuha sing atension, nagapangganyat, ukon nagapakita sang pribado nga bahin sang lawas. Ang isa naman nga “maligdong” wala nagasuksok sing baraghal nga bayo. Pero bisan may amo sini nga prinsipio, may kahilwayan ka gihapon nga magpili. Ang amon maayo nga pamayo nagapatahom ukon ‘nagapuni sa panudlo sang aton Manluluwas’ kag ‘nagahimaya sa Dios.’ (Tito 2:10; 1 Pedro 2:12) Paagi sa pagpamayo sing pormal, makita sang iban kon paano namon ginasimba si Jehova.

Bisan wala ka sing pormal nga bayo puede ka gihapon makatambong sa Kingdom Hall. Indi man kinahanglan nga malahalon ang imo bayo. Importante nga nagakaigo ini, matinlo, kag presentable.

• Ngaa importante sa amon ang pormal nga pamayo kon nagasimba kami sa Dios?

• Ano nga mga prinsipio ang nagagiya sa amon pamayo kag pamustura?

Kon nagatuon ka sa Biblia upod sa mga Saksi ni Jehova, mahimo ginahandaan mo sing abanse ang inyo ginatun-an. Amo man sini ang dapat mo himuon antes ka magtambong sa miting sa kongregasyon. Makabenepisyo ka pa gid kon himuon mo ini sing regular.

Hibalua kon san-o kag diin ka magtuon. Ano ang pinakamaayo nga tion nga makakonsentrar ka sa pagtuon? Sa kaagahon bala, antes ka mag-obra, ukon sa gab-i kon tulog na ang imo kabataan? Bisan indi ka makapadugay sa pagtuon, magpat-od sing tion kon daw ano kalawig ka matuon, kag indi pagtuguti nga may magtublag sa imo. Mangita sing malinong nga lugar, kag patya ang radyo, telebisyon, kag cell phone. Makabulig sa imo ang pagpangamuyo antes sang pagtuon para madula sa imo hunahuna ang mga problema sina nga adlaw kag makakonsentrar ka sa pagtuon sa Pulong sang Dios.—Filipos. 4:6, 7.

Markahi ang imo ginatun-an, kag maghanda sing komento. Hibalua anay ang pinakatema sang imo pagatun-an. Tan-awa ang tig-ulo sang artikulo ukon kapitulo, binagbinaga kon ano ang kaangtanan sang kada subtitulo sa tema, kag usisaa ang mga piktyur kag repaso nga mga pamangkot nga nagapadaku sang panguna nga mga punto. Dayon basaha ang mga parapo, kag pangitaa ang sabat sa mga pamangkot. Basaha ang ginsambit nga mga teksto, kag hibalua kon paano ini naangot sa imo ginatun-an. (Binuhatan 17:11) Kon makita mo ang sabat, kuriti ukon markahi ang mga tinaga nga makabulig sa imo nga madumduman ang sabat. Sa tion sang miting, puede ka magbayaw kag magkomento sing malip-ot.

Paagi sa pagtuon sa mga topiko nga ginabinagbinag kada semana sa mga miting, madugangan ang imo “talaguan sing bahandi” sang ihibalo sa Biblia.—Mateo 13:51, 52.

• Paano ka makahanda sa mga miting?

• Ano ang himuon mo para makakomento ka sa mga miting?

Halin sang una, gusto ni Jehova nga magtipon ang kada pamilya para mapabakod ang ila relasyon sa iya kag sa isa kag isa. (Deuteronomio 6:6, 7) Amo kon ngaa ang mga Saksi ni Jehova may ginatigana gid nga tion kada semana para magsimba bilang pamilya. Ginabinagbinag nila sa matawhay nga tion ang espirituwal nga mga butang nga para gid sa ila mga kinahanglanon. Bisan nagaisahanon ka, puede mo gamiton ina nga tion para tun-an ang topiko sa Biblia nga gusto mo.

Makabulig ini para mangin suod kay Jehova. “Magpalapit kamo sa Dios, kag magapalapit sia sa inyo.” (Santiago 4:8) Makilala pa gid naton si Jehova kon matun-an naton ang iya mga kinaiya kag mga buhat nga mabasa sa Biblia. Ang isa ka paagi para masugdan ang pangpamilya nga pagsimba amo ang ululupod nga pagbasa sang Biblia sing matunog, ayhan ginasunod ang iskedyul sa Pagkabuhi kag Pagministeryo nga Miting. Mahimo i-asayn sa kada miembro ang isa ka bahin nga basahon niya, kag binagbinagon sang tanan kon ano ang ila natun-an.

Makabulig ini para mangin suod ang kada miembro sang pamilya. Mangin suod ang mga bana kag asawa, subong man ang mga ginikanan kag kabataan, kon nagatuon sila sa Biblia subong pamilya. Dapat makalilipay ini nga tion nga ginapaabot sang tanan kada semana. Ang mga ginikanan mahimo magpili sang praktikal nga mga topiko nga pagabinagbinagon depende sa edad sang kabataan, ayhan ginagamit ang artikulo sa Ang Lalantawan kag Magmata! ukon ang aton website nga jw.org. Mahimo ninyo istoryahan ang problema sang kabataan sa eskwelahan kag kon paano nila ini atubangon. Magtan-aw sing isa ka programa nga ginapagua sa JW Broadcasting (tv.jw.org) dayon binagbinaga ninyo ini. Puede ninyo praktison ang mga kanta nga gamiton sa mga miting kag maayo man kon may merienda pagkatapos sang pagtuon.

Ining pinasahi nga tion nga ginagamit kada semana sa pagsimba kay Jehova subong pamilya, makabulig sa tanan nga malipay sa pagtuon sa Pulong sang Dios. Pakamaayuhon gid ni Jehova ang inyo mga pagtinguha.—Salmo 1:1-3.

• Ngaa may iskedyul gid kami para sa pangpamilya nga pagsimba?

• Ano ang himuon sang mga ginikanan para mangin makalilipay ini nga tion sa pagtuon?

Ngaa malipayon gid ini nga mga tawo? Nagatambong sila sa isa sa amon mga asembleya. Pareho sa mga alagad sang Dios sang una nga ginsugo nga magtipon sing tatlo ka beses kada tuig, nalipay man kami nga magtipon. (Deuteronomio 16:16) Kada tuig, may tatlo kami ka pagtilipon: duha ka tig-isa ka adlaw nga mga sirkito nga asembleya kag tatlo ka adlaw nga rehiyonal nga kombension. Ngaa nagatambong kami sa sini nga mga pagtilipon?

Nagapabakod ini sang amon paghiliutod bilang Cristiano. Pareho sa mga Israelinhon nga nagadayaw kay Jehova “sa daku nga pagtilipon,” nalipay man kami nga simbahon sia sing ululupod sa espesyal nga mga okasyon. (Salmo 26:12; 111:1, Biblia sang Katilingban sang mga Kristiano) Makilala kag makaupod namon ang mga Saksi sa iban nga kongregasyon ukon sa iban nga mga lugar. Kon udto, ululupod kami nga nagapanyaga sa ginahiwatan sang asembleya, amo nga nagasadya pa gid ini nga pagtilipon. (Binuhatan 2:42) Diri namon maeksperiensiahan ang gugma nga nagapahiusa sa amon ‘bug-os kalibutan nga paghiliutod.’—1 Pedro 2:17.

Nagapabakod ini sa amon sa espirituwal. Ang mga Israelinhon nakabenepisyo sang “naintiendihan nila ang mga mensahe” sang Kasulatan nga ginpaathag sa ila. (Nehemias 8:8, 12, Ang Pulong sang Dios, APD) Ginapabaloran man namon ang instruksion sa Biblia nga nabaton namon sa amon mga asembleya. Ang kada programa may tema nga nabase sa Biblia. Paagi sa makapabakod nga mga pamulongpulong, simposium, kag mga demonstrasyon, matun-an namon kon paano himuon ang kabubut-on sang Dios. Makapabakod man ang mga eksperiensia sang mga Cristiano nga nagmadinalag-on sa pag-atubang sang mga kabudlayan. Sa mga rehiyonal nga kombension, nangin matuod pa gid sa amon ang mga kasaysayan sa Biblia paagi sa de-kostyum nga mga drama nga nagatudlo sa amon sang praktikal nga mga leksion. Sa mga asembleya, ginabawtismuhan ang mga nagdedikar sang ila kabuhi sa Dios.

• Ngaa makalilipay ang mga asembleya?

• Ano ang imo mabenepisyo kon magtambong ka sa asembleya?

Antes napatay si Jesus, sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 24:14) Paano matuman ining pagbantala sa bug-os nga kalibutan? Paagi sa pagsunod sa ginhimo ni Jesus sang diri sia sa duta.—Lucas 8:1.

Ginatinguhaan namon nga maistorya ang mga tawo sa ila puluy-an. Ginhanas ni Jesus ang iya mga disipulo sa pagbantala sing maayong balita sa mga balay. (Mateo 10:11-13; Binuhatan 5:42; 20:20) Ining mga manugbantala sang unang siglo ginhatagan sing mga teritoryo nga ila bantalaan. (Mateo 10:5, 6; 2 Corinto 10:13) Subong, ginahatagan man ang kada kongregasyon sing mga teritoryo nga ila bantalaan kag ginahimo ini sing organisado. Paagi sini, matuman namon ang sugo ni Jesus nga “magbantala sa mga tawo kag magpanaksi sing maid-id.”—Binuhatan 10:42.

Ginatinguhaan namon nga maistorya ang mga tawo bisan diin. Nangin halimbawa si Jesus sa pagbantala sa mga tawo sa publiko nga mga lugar, pareho sa higad sang dagat ukon sa bubon. (Marcos 4:1; Juan 4:5-15) Ginaistorya man namon ang mga tawo parte sa Biblia bisan diin—sa mga dalan, balaligyaan, parke, ukon sa telepono. Kon may kahigayunan, ginaistorya man namon ang amon mga kaingod, kaupod sa trabaho, klasmeyt, kag mga paryente. Paagi sini, nangin posible sa minilyon ka tawo sa bilog nga kalibutan nga mabatian ang maayong balita parte sa “kaluwasan.”—Salmo 96:2.

Indi bala maayo nga isugid mo man sa imo pamilya kag mga abyan ang maayong balita sang Ginharian sang Dios kag ang mga kaayuhan nga mahatag sini sa ila sa palaabuton? Dapat himuon mo ini gilayon!

• Ano nga “maayong balita” ang dapat ibantala?

• Paano ginailog sang mga Saksi ni Jehova ang pamaagi ni Jesus sa pagbantala?

Ang termino nga “payunir” nagapatuhoy sa mga tawo nga nagakadto sa mga lugar para umpisahan ang isa ka hilikuton nga pagasundan sang iban. Si Jesus pareho sang isa ka payunir nga nagkadto diri sa duta para sa pagministeryo agod makatigayon ang mga tawo sing kaluwasan. (Mateo 20:28) Subong, ginailog man sia sang iya mga sumulunod paagi sa paggamit sang ila daku nga tion sa ‘paghimo sang mga disipulo.’ (Mateo 28:19, 20) Ang iban sa ila nagaalagad subong payunir.

Ang payunir isa ka bug-os tion nga ebanghelisador. Ang tanan nga mga Saksi ni Jehova manugbantala sang maayong balita. Pero, ginpasimple sang iban ang ila kabuhi para makaalagad sing 70 ka oras kada bulan subong mga regular payunir. Madamo ang nagatrabaho sing part-time para mahimo ini. Ang iban naman ginapadala subong mga espesyal payunir sa mga lugar nga diutay lang ang manugbantala sang Ginharian. Nagaalagad sila sing 130 ka oras ukon sobra pa kada bulan. Ang mga payunir kontento sa simple nga pagkabuhi nga nagasalig nga amanan sila ni Jehova sang ila mga kinahanglanon. (Mateo 6:31-33; 1 Timoteo 6:6-8) Kon ang iban indi makaalagad subong regular ukon espesyal payunir, puede sila maka-auxiliary payunir nga nagabantala sing 30 ukon 50 ka oras kada bulan.

Ang payunir ginapahulag sang iya gugma sa Dios kag sa mga tawo. Pareho kay Jesus, nakita namon nga madamo nga tawo ang kinahanglan makahibalo parte sa Dios. (Marcos 6:34) Ang amon mga natun-an sa Biblia makabulig sa mga tawo nga matigayon ang matuod nga paglaum sa palaabuton. Ang gugma sa mga tawo amo ang nagapahulag sa isa ka payunir nga gamiton ang iya tion kag kusog para buligan ang iban nga mahibaluan ang maayong balita. (Mateo 22:39; 1 Tesalonica 2:8) Bangod sini, nagabakod ang iya pagtuo, nagasuod sia sa Dios, kag nangin mas malipayon.—Binuhatan 20:35.

• Ano ang payunir?

• Ano ang nagapahulag sa iban nga magpayunir?

Madugay na nga kilala ang mga Saksi ni Jehova sa ila teokratiko nga edukasyon. Ang mga nagabantala sang Ginharian sing bug-os tion nagabaton sing pinasahi nga paghanas para ‘matuman nila sing bug-os ang ila ministeryo.’—2 Timoteo 4:5.

Paagi sa Pioneer Service School. Pagkatapos sang una nga tuig nga pag-alagad sing bug-os tion sang isa ka regular payunir, hanason sia sa sini nga eskwelahan sa sulod sang anom ka adlaw nga mahimo hiwaton sa malapit nga Kingdom Hall. Ginabuligan sini ang mga payunir nga mangin suod pa gid kay Jehova, mangin mas epektibo sa tanan nga aspekto sang ministeryo, kag makapadayon sa ila matutom nga pag-alagad.

Paagi sa School for Kingdom Evangelizers. Ining eskwelahan nga nagalawig sing duha ka bulan gindesinyo para hanason ang eksperiensiado nga mga payunir nga handa magbiya sa ila lugar para mag-alagad kon diin sila kinahanglanon. Daw subong bala nga nagasiling sila, “Yari ako! Ipadala ako!” bilang pag-ilog sa pinakabantog nga Ebanghelisador nga nag-alagad sa duta, si Jesucristo. (Isaias 6:8; Juan 7:29) Mahimo nagalakip ini sang pagpasimple nila sang ila kabuhi. Ayhan mamag-o sila sa kultura, klima, kag pagkaon. Ukon ayhan kinahanglan pa sila magtuon sing bag-o nga lenguahe. Ini nga eskwelahan nagabulig sa di-minyo nga mga brother kag sister kag mga mag-asawa, nga nagaedad sing 23 asta 65, nga palambuon ang espirituwal nga mga kinaiya kag mga ikasarang nga kinahanglanon sa ila asaynment para mas magamit pa gid sila ni Jehova kag sang iya organisasyon.

Paagi sa Watchtower Bible School of Gilead. Sa Hebreo, ang “Gilead” nagakahulugan sing “Saksi nga Tinumpok.” Halin sang ginsugdan ang Gilead sang 1943, ang kapin sa 8,000 ka naggradwar sa sini nga eskwelahan nga ginpadala subong mga misyonero madinalag-on nga nakapanaksi “tubtob sa ukbong sang duta.” (Binuhatan 13:47) Halimbawa, pag-abot sang mga naggradwar sa Peru, wala pa sing kongregasyon sa pungsod. Pero subong may ara na ini sing sobra 1,000. Sang nag-abot ang mga misyonero sa Japan, wala pa napulo ang Saksi sa pungsod. Pero subong sobra na ini 200,000. Ang lima ka bulan nga paghanas sa Gilead nagalakip sang maid-id nga pagtuon sa Pulong sang Dios. Ang mga espesyal payunir ukon misyonero sa latagon, mga nagaalagad sa mga sanga talatapan, ukon mga manugtatap sang sirkito amo ang ginahanas sing maid-id sa sini nga eskwelahan para makabulig sila sa pagpabakod kag pagpauswag sang hilikuton sa bug-os nga kalibutan.

• Ano ang katuyuan sang Pioneer Service School?

• Para kay sin-o gindesinyo ang School for Kingdom Evangelizers?