Nahibaluan mo ang kamatuoran paagi sa imo pagtuon sang Biblia upod sa mga Saksi ni Jehova. Pat-od nga ang imo natun-an nakabulig sa imo nga matigayon ang maayo nga kaangtanan sa Dios kag naghatag sa imo sing paglaum para sa palaabuton nga kabuhi kag sa mga pagpakamaayo sa paraiso nga duta sa idalom sang Ginharian sang Dios. Ang imo pagtuo sa Pulong sang Dios nagbakod, kag paagi sa pagpakig-upod sa Cristianong kongregasyon, naeksperiensiahan mo na ang madamo nga pagpakamaayo. Nahangpan mo kon paano karon nagapakig-angot si Jehova sa iya katawhan.—Zac. 8:23.

Samtang nagahanda ka subong para magpabawtismo, magabenepisyo ka sa pagrepaso sang sadsaran nga mga pagpati sang Cristiano, nga dumalahan sang mga gulang sang kongregasyon. (Heb. 6:1-3) Kabay nga padayon nga pakamaayuhon ni Jehova ang tanan mo nga panikasog sa pagkilala sa iya, kag kabay nga ihatag niya sa imo ang ginsaad nga padya.—Juan 17:3.

1. Ngaa luyag mo magpabawtismo?

2. Sin-o si Jehova?

• “Si Jehova amo ang matuod nga Dios sa langit kag sa duta. Wala na sing iban pa.”—Deut. 4:39.

• “Ikaw, nga ang ngalan amo si Jehova, ikaw lamang ang Labing Mataas sa bug-os nga duta.”—Sal. 83:18.

3. Ngaa importante nga gamiton mo ang ngalan sang Dios?

• “Mangamuyo kamo sing subong sini: ‘Amay namon nga yara sa langit, pakabalaanon ang imo ngalan.’”—Mat. 6:9.

• “Ang tagsatagsa nga nagatawag sa ngalan ni Jehova maluwas.”—Roma 10:13.

4. Ano ang pila ka termino sa Biblia nga gingamit para ilaragway si Jehova?

• “Si Jehova, nga Manunuga sang pinakamalayo nga mga bahin sang duta, isa ka Dios sa wala sing katubtuban.”—Isa. 40:28.

• “Amay namon nga yara sa langit.”—Mat. 6:9.

• “Ang Dios gugma.”—1 Juan 4:8.

5. Ano ang mahatag mo kay Jehova nga Dios?

• “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.”—Mar. 12:30.

• “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.”—Luc. 4:8.

6. Ngaa luyag mo nga mangin mainunungon kay Jehova?

• “Magmaalam ka, anak ko, kag pasadyaha ang akon tagipusuon, agod masabat ko sia nga nagayaguta sa akon.”—Hulu. 27:11.

7. Kay sin-o ka nagapangamuyo, kag paagi kay sin-o ngalan ka nagapangamuyo?

• “Sa pagkamatuod nagasiling ako [si Jesus] sa inyo, ang bisan ano nga pangayuon ninyo sa Amay, ihatag niya ini sa inyo sa akon ngalan.”—Juan 16:23.

8. Ano ang pila ka butang nga mahimo mo ipangamuyo?

• “Gani, mangamuyo kamo sing subong sini: ‘Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit. Hatagi kami sang amon pagkaon para sa sini nga adlaw; kag patawara kami sang amon mga sala, subong nga ginapatawad man namon ang mga nakasala sa amon. Buligi kami agod indi kami madaug sang pagsulay, kag luwasa kami sa isa nga malauton.’”—Mat. 6:9-13.

• “May pagsalig kita sa iya, nga bisan ano ang ipangamuyo naton suno sa iya kabubut-on, magapamati sia sa aton.”—1 Juan 5:14.

9. Ngaa mahimo indi pagpamatian ni Jehova ang pangamuyo sang isa ka tawo?

• “Mangayo sila sing bulig kay Jehova, apang indi sia magsabat sa ila . . . bangod sang ginahimo nila nga malaut.”—Miq. 3:4.

• “Ang mga mata ni Jehova nagatulok sa mga matarong, kag ang iya mga dulunggan nagapamati sa ila pag-ampo, apang ginasikway ni Jehova ang mga nagahimo sang malain.”—1 Ped. 3:12.

10. Sin-o si Jesucristo?

• “Nagsabat si Simon Pedro: ‘Ikaw ang Cristo, ang Anak sang buhi nga Dios.’”—Mat. 16:16.

11. Ngaa nagkari si Jesus sa duta?

• “Ang Anak sang tawo wala nagkari agod alagdon, kundi agod mag-alagad kag ihatag ang iya kabuhi nga gawad kabaylo sang madamo.”—Mat. 20:28.

• “Dapat ko [si Jesus] man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.”—Luc. 4:43.

12. Paano mo mapakita nga nagapasalamat ka sa halad ni Jesus?

• “Napatay sia para sa tanan agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.”—2 Cor. 5:15.

13. Ano nga awtoridad ang ginhatag kay Jesus?

• “Ginhatag sa akon ang bug-os nga awtoridad sa langit kag sa duta.”—Mat. 28:18.

• “Ginbayaw sia sang Dios sa mataas gid nga posisyon kag mainayuhon nga ginhatagan sing ngalan nga labaw sa tanan nga ngalan.”—Fil. 2:9.

14. Nagapati ka bala nga ang Nagadumala nga Hubon sang mga Saksi ni Jehova amo “ang matutom kag mainandamon nga ulipon” nga gintangdo ni Jesus?

• “Sin-o gid bala ang matutom kag mainandamon nga ulipon nga gintangdo sang iya agalon sa pagdumala sa iya panimalay, sa paghatag sa ila sang ila pagkaon sa nagakaigo nga tion?”—Mat. 24:45.

15. Isa bala ka persona ang balaan nga espiritu?

• “Nagsabat ang anghel: ‘Ang balaan nga espiritu magaabot sa imo, kag ang gahom sang Labing Mataas magalikop sa imo. Bangod sina ang bata nga ibun-ag mo tawgon nga balaan, Anak sang Dios.’”—Luc. 1:35.

• “Gani, kon kamo nga mga makasasala makahibalo maghatag sing maayo nga regalo sa inyo mga anak, daw ano pa gid ang Amay sa langit! Ihatag gid niya ang balaan nga espiritu sa mga nagapangayo sa iya!”—Luc. 11:13.

16. Paano gingamit ni Jehova ang iya balaan nga espiritu?

• “Paagi sa Pulong ni Jehova natuga ang mga langit, kag paagi sa espiritu sang iya baba ang tanan nga butang sa sini.”—Sal. 33:6.

• “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo . . . tubtob sa pinakamalayo nga bahin sang duta.”—Binu. 1:8.

• “Kay una sa tanan nahibaluan ninyo nga wala sing tagna sa Kasulatan nga naghalin sa kaugalingon nga pagpatpat. Kay ang tagna wala mag-abot paagi sa kabubut-on sang tawo, kundi ang ginhambal sang mga tawo naghalin sa Dios samtang ginapahulag sila sang balaan nga espiritu.”—2 Ped. 1:20, 21.

17. Ano ang Ginharian sang Dios?

• “Sa panahon sini nga mga hari, ang Dios sang langit magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. Dugmukon sini kag laglagon ining tanan nga ginharian, kag ini lamang ang magapabilin sing dayon.”—Dan. 2:44.

18. Ano nga mga pagpakamaayo ang mabaton mo halin sa Ginharian sang Dios?

• “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bug. 21:4.

19. Paano mo nahibaluan nga malapit na lang naton mabaton ang mga pagpakamaayo halin sa Ginharian sang Dios?

• “Nagpalapit sa iya ang mga disipulo nga silahanon lang. Nagsiling sila: ‘Sugiri kami, san-o bala ini matabo, kag ano bala ang tanda sang imo presensia kag sang hingapusan sang sistema sang mga butang?’ Nagsabat si Jesus: ‘. . . Magailinaway ang mga pungsod kag subong man ang mga ginharian, kag may kakulang sa pagkaon kag mga linog sa nagkalainlain nga mga lugar. Kag ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.’”—Mat. 24:3, 4, 7, 14.

• “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, manugpasipala, indi matinumanon sa mga ginikanan, indi mapinasalamaton, indi mainunungon, indi mapinalanggaon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios, daw diosnon kon tulukon apang wala sing impluwensia ang gahom sini sa ila kabuhi.”—2 Tim. 3:1-5.

20. Paano mo mapakita nga importante ang Ginharian sa imo?

• “Padayon ninyo nga unahon ang pagpangita sa Ginharian kag sa pagkamatarong sang Dios.”—Mat. 6:33.

• “Nagsiling si Jesus sa iya mga disipulo: ‘Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos kag padayon nga magsunod sa akon.’”—Mat. 16:24.

21. Sin-o si Satanas kag ang mga demonyo?

• “Halin kamo sa inyo amay nga Yawa . . . Manugpatay sia sing tawo sugod sang nagbinutig sia tuhoy sa Dios.”—Juan 8:44.

• “Gintagbong ang daku nga dragon, ang orihinal nga man-ug, ang isa nga ginatawag Yawa kag Satanas, nga nagapatalang sa bug-os napuy-an nga duta; gintagbong sia sa duta upod ang iya mga anghel.”—Bug. 12:9.

22. Ano ang panumbungon ni Satanas kay Jehova kag sa mga nagasimba sa Iya?

• “Nagsabat ang babayi sa man-ug: ‘Mahimo namon kaunon ang bunga sang mga kahoy sa hardin. Apang tuhoy sa bunga sang kahoy nga yara sa tunga sang hardin, nagsiling ang Dios: “Indi kamo magkaon halin sa sini, indi ninyo ini pagtandugon; kay kon himuon ninyo ini, mapatay kamo.”’ Nagsiling ang man-ug sa babayi: ‘Indi kamo mapatay. Kay nakahibalo ang Dios nga sa adlaw nga magkaon kamo sini, magamuklat ang inyo mga mata kag mangin kaangay kamo sa Dios, nga nakahibalo kon ano ang maayo kag malain.’”—Gen. 3:2-5.

• “Apang nagsabat sia [si Satanas] kay Jehova: ‘Panit sa panit. Ihatag sang tawo ang tanan nga yara sa iya tungod sa iya kabuhi.’”—Job 2:4.

23. Paano mo pamatud-an nga indi matuod ang mga panumbungon ni Satanas?

• “Alagara sia [ang Dios] sing bug-os tagipusuon.”—1 Cron. 28:9.

• “Tubtob mapatay ako, indi ko pag-isikway ang akon integridad!”—Job 27:5.

24. Ngaa nagakapatay ang tawo?

• “Paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.”—Roma 5:12.

25. Ano ang kahimtangan sang patay?

• “Ang mga buhi nakahibalo nga mapatay sila, apang ang mga patay wala gid sing nahibaluan.”—Man. 9:5.

26. Ano ang paglaum sang mga patay?

• “May pagkabanhaw sang mga matarong kag mga indi matarong.”—Binu. 24:15.

27. Pila ka tawo ang mapalangit para maggahom upod kay Jesus?

• “Dayon nakita ko ang Kordero nga nagatindog sa Bukid Sion, kag kaupod niya ang 144,000 nga may ngalan niya kag ngalan sang iya Amay sa ila agtang.”—Bug. 14:1.

Sa imo pagtuon sa Biblia, nahibaluan mo ang ginapatuman ni Jehova kag kon paano sundon ang iya matarong nga mga talaksan. Para iaplikar ang imo natun-an mahimo nga madamo ka sing ginbag-o sa imo paggawi kag panimuot. Karon nga namat-od ka na nga sundon ang matarong nga mga talaksan ni Jehova, makahimo ka na sing kalahamut-an nga pag-alagad bilang ministro sang maayong balita. Ang pagrepaso sang masunod nga mga pamangkot magabulig sa imo nga hunahunaon sing maayo ang matarong nga mga ginapatuman ni Jehova kag magapahanumdom sa imo sang pila ka butang nga sarang mo himuon agod mangin isa sa iya ginakahamut-an nga alagad. Ini nga impormasyon magapatudok sa imo sang importansia sang maayo nga konsiensia sa paghimo sang tanan nga butang kag sa pagpadungog kay Jehova.—2 Cor. 1:12; 1 Tim. 1:19; 1 Ped. 3:16, 21. Kay natun-an mo na ini, pat-od nga luyag mo na nga magpasakop sa paggahom ni Jehova kag mangin bahin sang iya organisasyon. Ang mga pamangkot kag mga reperensia nga Kasulatan makabulig sa imo nga usisaon ang imo paghangop parte sa pagpasakop sa mga kahimusan ni Jehova sa kongregasyon, sa pamilya, ukon parte sa pulitika sining sistema sang mga butang. Pat-od nga mapadalom pa gid ang imo apresasyon sa mga kahimusan ni Jehova sa pagtudlo kag pagpalig-on sa iya katawhan sa espirituwal. Nagalakip ini sa mga miting sa kongregasyon nga luyag mo tambungan kag pakigbahinan suno sa ginatugot sang imo kahimtangan. Binagbinagon man sa sini nga bahin ang importansia sang regular nga pagpakigbahin sa hilikuton nga pagbantala sang Ginharian, pagbulig sa iban nga makilala si Jehova kag mahibaluan ang iya mga ginahimo para sa katawhan. (Mat. 24:14; 28:19, 20) Dayon, ipatudok sini sa imo hunahuna nga serioso kaayo ang imo dedikasyon kay Jehova nga Dios kag ang imo bawtismo. Makapat-od ka nga ginaapresyar ni Jehova ang imo sinsero nga pagbaton sa iya ginapakita sa imo nga wala tupong nga kaayo.

1. Ano ang Cristianong talaksan para sa pag-asawahay? Ano ang lamang Makasulatanhon nga rason sa pagdiborsio?

• “Wala bala ninyo mabasahi nga sa ginsuguran gintuga niya sila nga lalaki kag babayi kag nagsiling: ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag sila nga duha mangin isa ka unod’? Gani indi na sila duha, kundi isa ka unod. Gani, ang gintingob sang Dios, indi pagbulagon sang tawo. . . . Ang bisan sin-o nga magdiborsio sang iya asawa kag magpangasawa sang iban nagapanghilahi, luwas lang kon ang iya asawa naghimo sing seksuwal nga imoralidad.”—Mat. 19:4-6, 9.

2. Ngaa ang nagapuyopuyo dapat magpakasal sing legal? Kon ikaw minyo, sigurado ka bala nga legal ang imo kasal kag ginakilala sang gobierno?

• “Padayon nga ipahanumdom sa ila nga magpasakop kag mangin matinumanon sa mga panguluhan kag mga awtoridad.”—Tito 3:1.

• “Dapat padunggan sang tanan ang pag-asawahay kag ang bana kag asawa dapat mangin matutom sa isa kag isa, kay hukman sang Dios ang mga nagahimo sang seksuwal nga imoralidad kag ang mga makihilahion.”—Heb. 13:4.

3. Ano ang imo papel sa pamilya?

• “Anak ko, pamatii ang disiplina sang imo amay, kag indi pagsikwaya ang pagtudlo sang imo iloy.”—Hulu. 1:8.

• “Ang bana amo ang ulo sang iya asawa subong nga ang Cristo amo ang ulo sang kongregasyon . . . Mga bana, padayon nga higugmaa ang inyo asawa, subong nga ang Cristo naghigugma man sang kongregasyon.”—Efe. 5:23, 25.

• “Mga amay, indi ninyo pagpaakiga ang inyo mga anak, kundi padayon sila nga padakua sa disiplina kag laygay ni Jehova.”—Efe. 6:4.

• “Kamo nga mga anak, mangin matinumanon kamo sa inyo mga ginikanan sa tanan nga butang, kay kalahamut-an ini sa Ginuo.”—Col. 3:20.

• “Kamo nga mga asawa, magpasakop kamo sa inyo bana.”—1 Ped. 3:1.

4. Ngaa dapat naton tahuron ang kabuhi?

• “Ang Dios . . . nagahatag sa tanan nga tawo sang kabuhi kag sang ginhawa kag sang tanan nga butang. . . . Paagi sa iya, may kabuhi kita kag nagahulag kag nagaluntad.”—Binu. 17:25, 28.

5. Ngaa indi kita dapat magpatay sang tawo, lakip ang wala pa mabun-ag nga lapsag?

• “Kon may mag-away nga mga tawo kag mahalitan nila ang nagabusong nga babayi kag nagbun-ag sia sing alang-alang. . . kon mapatay ang isa sa ila [ang babayi ukon lapsag], dapat ang ibayad kabuhi sa kabuhi.”—Ex. 21:22, 23.

• “Nakita mo na ako sang wala pa ako mabun-ag; nasulat sa imo libro ang tanan ko nga bahin sang mga adlaw nga ginhimo ini sang wala pa nagluntad ang bisan isa sini.”—Sal. 139:16.

• “Ginadumtan ni Jehova . . . [ang] mga kamot nga nagapaagay sing dugo nga wala sing sala.”—Hulu. 6:16, 17.

6. Ano ang sugo sang Dios parte sa dugo?

• “Indi kamo magkaon sing nakuga nga mga sapat, kag maglikaw kamo sa dugo.”—Binu. 15:29.

7. Ngaa dapat naton higugmaon ang aton masigka-Cristiano?

• “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:34, 35.

8. Agod indi malaton ang makalalaton ukon makamamatay nga balatian: (a) Ngaa ang tawo nga may amo sini nga balatian indi dapat magpakita sing dayag nga pagpalangga, subong sang paghakos kag paghalok sa iban? (b) Ngaa indi dapat maglain ang iya buot kon may pila nga magdesisyon nga indi sia pag-agdahon sa ila balay? (c) Ngaa ang isa nga mahimo nalatnan sang makalalaton nga balatian dapat boluntaryo nga magpa-blood test antes sia mangaluyag? (d) Ngaa dapat pahibaluon sang isa nga may makalalaton nga balatian ang koordenitor sang hubon sang mga gulang antes sia magpabawtismo?

• “Dapat wala kamo sing bisan ano nga utang kay bisan sin-o, luwas lang sa utang nga maghigugmaanay kamo. . . . ‘Higugmaa ang imo isigkatawo subong sang imo kaugalingon.’ Ang tawo nga may gugma wala nagahimo sing malain sa iya isigkatawo.”—Roma 13:8-10.

• ‘Pangitaa ninyo indi lamang ang inyo personal nga kaayuhan, kundi ang iya man sang iban.’—Fil. 2:4.

9. Ngaa ginapaabot ni Jehova nga patawaron naton ang iban?

• “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo.”—Col. 3:13.

10. Ano ang dapat mo himuon kon ginpasipalahan ukon gintunto ka sang isa ka utod?

• “Kon ang imo utod nakasala sa imo, kadtui sia kag sugiri sang iya sala nga kamohanon lang. Kon magpamati sia sa imo, nadaug mo ang imo utod. Apang kon indi sia magpamati sa imo, mag-upod ka sang isa ukon duha pa agod ang tanan nga ginsiling mapamatud-an sang duha ukon tatlo ka saksi. Kon indi sia magpamati sa ila, isugid mo sa kongregasyon. Kon indi sia magpamati bisan sa kongregasyon, kabiga sia nga kaangay sang tawo sang mga pungsod kag kaangay sang manugsukot sing buhis.”—Mat. 18:15-17.

11. Ano ang pagtamod ni Jehova sa masunod nga mga sala?

▪ Seksuwal nga imoralidad

▪ Pagsimba sa mga imahen

▪ Homoseksuwalidad

▪ Pagpangawat

▪ Sugal

▪ Pagpahubog

• “Indi kamo magtalang. Ang mga nagahimo sang seksuwal nga imoralidad, mga nagasimba sa mga diosdios, mga makihilahion, mga lalaki nga nagapasugot sa homoseksuwal nga mga buhat, mga lalaki nga nagahimo sang homoseksuwalidad, mga kawatan, mga makagod, mga palahubog, mga nagatamay sa iban, kag mga manugkilkil indi makapanubli sang Ginharian sang Dios.”—1 Cor. 6:9, 10.

12. Parte sa seksuwal nga imoralidad, nga nagalakip sa tanan nga sahi sang pagpakigsekso sa iban nga indi mo tiayon, ano ang dapat mo himuon?

• “Palagyo kamo sa seksuwal nga imoralidad!”—1 Cor. 6:18.

13. Ngaa dapat kita maglikaw sa wala ginreseta nga paggamit sing makapaadik ukon makaapekto sa hunahuna nga mga bulong?

• “Ipresentar ninyo ang inyo lawas nga isa ka halad nga buhi, balaan kag kalahamut-an sa Dios. Sa sini nga paagi magahimo kamo sing sagrado nga pag-alagad nga ginagamit ang inyo ikasarang sa pagpangatarungan. Untati na ninyo ang pagpadihon sa mga dalanon sang katawhan sini nga sistema sang mga butang, kundi bag-uha na ninyo ang inyo panghunahuna, agod mapamatud-an ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.”—Roma 12:1, 2.

14. Ano ang pila ka demonyohanon nga buhat nga ginadumili sang Dios?

• “Wala sing bisan sin-o sa inyo nga . . . nagapamakot, nagahimo sing madyik, nagapamakot pasad sa mga panimad-on, babaylan, nagapanglumay, nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay.”—Deut. 18:10, 11.

15. Kon ang isa makahimo sing mabug-at nga sala kag luyag niya nga kahamut-an liwat ni Jehova, ano ang dapat niya himuon gilayon?

• “Gintu-ad ko sa imo ang akon sala; wala ko gintabunan ang akon kasaypanan. Nagsiling ako: ‘Itu-ad ko ang akon mga paglapas kay Jehova.’”—Sal. 32:5.

• “May nagamasakit bala sa inyo? Magtawag sia sang mga gulang sang kongregasyon, kag magpangamuyo sila para sa iya, nga nagahaplas sa iya sang lana sa ngalan ni Jehova. Ang pangamuyo nga may pagtuo magaayo sa isa nga nagamasakit, kag si Jehova magapabakod sa iya. Kag kon nakahimo sia sang mga sala, patawaron sia.”—Sant. 5:14, 15.

16. Kon nakahibalo ka nga may nahimo nga mabug-at nga sala ang isa ka utod, ano ang dapat mo nga himuon?

• “Kon ang isa ka tawo makasala bangod nabatian niya ang panawagan sa publiko sa pagtestigo kag saksi sia ukon nakita niya ukon nabatian niya ang tuhoy sini, apang wala niya ginsugid ini, manabat sia tungod sini nga sala.”—Lev. 5:1.

17. Kon ginpahibalo nga ang isa indi na Saksi ni Jehova, paano naton sia pakig-angutan?

• “Untatan ninyo ang pagpakig-upod kay bisan sin-o nga utod nga nagahimo sang seksuwal nga imoralidad ukon makagod ukon nagasimba sa mga diosdios ukon nagatamay sa iban ukon palahubog ukon manugkilkil. Indi kamo makig-upod sa ila bisan sa pagkaon.”—1 Cor. 5:11.

• “Kon may magkadto sa inyo nga wala nagadala sini nga panudlo, indi ninyo sia pagbatuna sa inyo balay kag indi sia pagtamyawa.”—2 Juan 10.

18. Ngaa ang imo suod nga mga abyan dapat mga nagahigugma kay Jehova?

• “Ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang mapahamak.”—Hulu. 13:20.

• “Indi kamo magpadaya. Ang pagpakig-upod sa malain nga mga tawo nagapalain sang mapuslanon nga mga batasan.”—1 Cor. 15:33.

19. Ngaa ang mga Saksi ni Jehova neutral sa pulitika?

• “Indi sila bahin sang kalibutan, subong nga ako [si Jesus] indi bahin sang kalibutan.”—Juan 17:16.

20. Ngaa dapat mo tumanon ang gobierno?

• “Ang tagsa ka tawo dapat magpasakop sa mas mataas nga mga awtoridad, kay wala sing awtoridad nga indi halin sa Dios; ginbutang sang Dios ang mga awtoridad sa ila nagkalainlain nga palangakuan.”—Roma 13:1.

21. Kon may ginapahimo ang kasuguan sang tawo nga supak sa kasuguan sang Dios, ano ang dapat mo himuon?

• “Dapat namon tumanon ang Dios subong manuggahom sa baylo sang mga tawo.”—Binu. 5:29.

22. Kon nagapili sang trabaho, ano nga mga kasulatan ang makabulig sa imo nga magpabilin nga indi bahin sang kalibutan?

• “Ang pungsod indi na makig-away sa iban nga pungsod, kag indi na sila magtuon sa pagpakig-away.”—Miq. 4:3.

• “Gua kamo sa iya [ang Babilonia nga Daku], katawhan ko, kon indi ninyo luyag makig-ambit sa iya mga sala, kag kon indi ninyo luyag magbaton sang bahin sang iya mga kalalat-an.”—Bug. 18:4.

23. Ano nga sahi sang kalingawan kag pagliwaliwa ang imo pilion, kag ano nga sahi ang imo isikway?

• “Ginadumtan niya [ni Jehova] ang nagahigugma sa kasingki.”—Sal. 11:5.

• “Kangil-ari ninyo ang malaut; magpanguyapot kamo sing malig-on sa maayo.”—Roma 12:9.

• “Padayon ninyo nga hunahunaa ang bisan ano nga butang nga matuod, serioso, matarong, matinlo, hiligugmaon, dungganon, maayo, kag dalayawon.”—Fil. 4:8.

24. Ngaa ang mga Saksi ni Jehova wala nagapakig-upod sa pagsimba sang iban nga relihion?

• “Indi mahimo nga magkaon kamo sa ‘lamesa ni Jehova’ kag sa lamesa sang mga demonyo.”—1 Cor. 10:21.

• “‘Magbulag kamo,’ siling ni Jehova, ‘kag untati ninyo ang pagtandog sa indi matinlo nga butang’; ‘kag batunon ko kamo.’”—2 Cor. 6:17.

25. Ano nga mga prinsipio ang makabulig sa imo kon bala makigbahin ka sa isa ka selebrasyon ukon indi?

• “Nakig-upod sila sa mga pungsod kag gin-ilog nila ang ila mga paggawi. Padayon sila nga nagsimba sa ila mga diosdios, kag nangin siod ini sa ila.”—Sal. 106:35, 36.

• “Ang mga patay wala gid sing nahibaluan.”—Man. 9:5.

• “Indi sila bahin sang kalibutan, subong nga ako indi bahin sang kalibutan.”—Juan 17:16.

• “Tuman na ang panahon nga ginhimo ninyo ang kabubut-on sang mga pungsod sang nagahimo kamo sang matampalason nga mga paggawi, indi mapunggan nga mga kailigbon, sobra nga pag-inom, magansal nga kinalipay, paindisanay sa pag-inom, kag makangilil-ad nga pagsimba sa mga diosdios.”—1 Ped. 4:3.

26. Paano ang mga halimbawa sa Biblia makabulig sa imo nga indi magselebrar sang birthday?

• “Ang ikatlo nga adlaw amo ang kaadlawan sang Paraon, kag naghanda sia sing sinalusalo para sa tanan niya nga alagad, kag ginpagua niya ang pangulo sang mga manugtagay kag ang pangulo sang mga panadero sa atubangan sang iya mga alagad. Ginbalik niya ang pangulo sang mga manugtagay sa iya palangakuan bilang manugtagay . . . Apang ginpabitay niya sa usok ang pangulo sang mga panadero.”—Gen. 40:20-22.

• “Sang ginsaulog ang kaadlawan ni Herodes, ang anak nga babayi ni Herodias nagsaot kag nalipay gid si Herodes gani nagsumpa sia sa iya nga ihatag ang bisan ano nga pangayuon niya. Sa sugyot sang iya iloy, nagsiling sia: ‘Ihatag sa akon ang ulo ni Juan nga Manugbawtismo nga nabutang sa bandehado.’ Gani nagsugo sia nga pugutan sing ulo si Juan sa bilangguan.”—Mat. 14:6-8, 10.

27. Ngaa luyag mo sundon ang panuytoy sang mga gulang?

• “Mangin matinumanon sa mga nagapanguna sa inyo kag mangin mapinasakupon, kay ginabantayan nila kamo subong nga sila ang manabat, agod himuon nila ini nga may kalipay kag wala nagapanghayhay, kay makahalit ini sa inyo.”—Heb. 13:17.

28. Ngaa importante sa imo kag sa imo pamilya nga magtalana sang tion para regular nga basahon kag tun-an ang Biblia?

• “Kundi nagakalipay sia sa kasuguan ni Jehova, kag ginabasa niya sa mahinay nga tingog ang Iya kasuguan adlaw kag gab-i. Mangin kaangay sia sang kahoy nga gintanom sa higad sang sapa, isa ka kahoy nga nagapamunga suno sa panahon sini, ang mga dahon sini wala nagakalaya. Kag ang tanan nga ginahimo niya magamadinalag-on.”—Sal. 1:2, 3.

29. Ngaa luyag mo tambungan kag pakigbahinan ang mga miting?

• “Ipahayag ko ang imo ngalan sa akon mga kauturan; dayawon ko ikaw sa tunga sang kongregasyon.”—Sal. 22:22.

• “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.”—Heb. 10:24, 25.

30. Ano ang pinakaimportante nga hilikuton nga ginhatag ni Jesus sa aton?

• “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila . . . . Tudlui ninyo sila nga tumanon ang tanan nga ginsugo ko sa inyo.”—Mat. 28:19, 20.

31. Kon nagahatag kita sang donasyon para sa hilikuton sang Ginharian ukon nagabulig sa kauturan, ano nga panimuot ang ginakahamut-an ni Jehova?

• “Padunggi si Jehova paagi sa imo hamili nga mga butang.”—Hulu. 3:9.

• “Maghimo ang kada isa suno sa ginpamat-od niya sa iya tagipusuon, indi sing paganot ukon napilitan, kay ginahigugma sang Dios ang nagahatag sing malipayon.”—2 Cor. 9:7.

32. Ano nga mga kabudlayan ang mapaabot sang mga Cristiano?

• “Malipayon ang mga ginahingabot tungod sa pagkamatarong, kay ila ang Ginharian sang langit. Malipayon kamo kon ginapakahuy-an kamo kag ginahingabot kag ginabutangbutangan sang tanan nga sahi sang kalautan tungod sa akon. Magkasadya kamo kag magkalipay, kay daku ang inyo padya sa langit, bangod amo man sina ang paghingabot nila sa mga manalagna nga nauna sa inyo.”—Mat. 5:10-12.

33. Ngaa isa ka pinasahi nga pribilehiyo nga mabawtismuhan bilang isa ka Saksi ni Jehova?

• “Sang makita ko ang imo pulong, ginkaon ko ini; naghugyaw kag nagkalipay ang akon tagipusuon tungod sang imo pulong, kay gintawag ako sa imo ngalan, O Jehova nga Dios.”—Jer. 15:16.

Ang mga bawtismo masami ginahiwat sa mga asembleya kag mga kombension sang mga Saksi ni Jehova. Sa katapusan nga bahin sang pamulongpulong sa bawtismo, ang mga kandidato sa bawtismo pangabayon sang humalambal sa pagtindog kag sa pagsabat sing mabaskog sa masunod nga mga pamangkot:

1. Ginhinulsulan mo na bala ang imo mga sala, gindedikar ang imo kaugalingon kay Jehova, kag ginbaton ang iya kahimusan sa kaluwasan paagi kay Jesucristo?

2. Nahangpan mo bala nga ang imo pagpabawtismo nagapakilala sa imo bilang isa sa mga Saksi ni Jehova nga nagapakig-upod sa organisasyon ni Jehova?

Ang sabat nga huo sa sining mga pamangkot isa ka dayag nga pagpahayag sang mga kandidato sa bawtismo nga nagatuo sila sa gawad kag bug-os nila nga gindedikar ang ila kaugalingon kay Jehova. (Roma 10:9, 10) Luyag sang mga kandidato sa bawtismo nga mapangamuyuon nga hunahunaon sing abanse ining mga pamangkot agod makasabat sila nahisanto sa ila personal nga kombiksion.

Nadedikar mo na bala ang imo kaugalingon kay Jehova sa pangamuyo, nga nagapromisa nga sia lamang ang imo pagasimbahon kag himuon nga pinakaimportante sa imo kabuhi ang paghimo sang iya kabubut-on?

Kumbinsido ka na gid bala nga dapat ka magpabawtismo sa pinakaposible nga kahigayunan?

Ano ang nagakaigo nga panapton sa bawtismo? (1 Tim. 2:9, 10; Juan 15:19; Fil. 1:10)

Dapat ang aton pamayo nagapakita sang “kaugdang kag maligdong nga hunahuna” para ipakita nga kita “nagasimba sa Dios.” Gani, ang mga balawtismuhan indi dapat magsuksok sang indi maugdang nga inugpaligo ukon bayo nga may mga pasayod ukon eslogan. Dapat ang ila bayo mahipid, matinlo, maayo tulukon, kag nagakaigo sa okasyon.

Paano dapat maggawi ang isa kon ginabawtismuhan sia? (Luc. 3:21, 22)

Ang bawtismo ni Jesus nagapahamtang sang halimbawa para sa Cristianong mga bawtismo karon. Nahangpan niya nga ang bawtismo isa ka serioso nga tikang, kag nakita ini sa iya panimuot kag mga buhat. Gani, indi ini ang lugar para sa paglahoglahog, paghampang, paglangoy, ukon iban pa nga paggawi nga nagadula sang pagkaserioso sang okasyon; ukon makunyag sing daku ang isa ka bag-o nga Cristiano nga daw nagdaug sia. Walay sapayan nga ang bawtismo isa ka makalilipay nga okasyon, dapat ipakita ina nga kalipay nga may dignidad.

Paano ang regular nga pagtambong sa mga miting kag pagpakig-upod sa kongregasyon makabulig sa imo para ikabuhi ang imo dedikasyon kay Jehova?

Sa tapos sang imo bawtismo, ngaa kinahanglan nga huptan mo ang isa ka maayo nga iskedyul sang personal nga pagtuon kag regular nga pagpakigbahin sa ministeryo?