Ngaa 1919?

Maathag nga ginapakita sang tagna sa Biblia kag sang kasaysayan nga si Jesus nagsugod sa paggahom sa langit bilang Hari sang 1914, kag tanda ini sang pag-umpisa sang katapusan nga mga adlaw sang sistema ni Satanas diri sa duta. Ano ang ginhimo ni Jesus sang nangin Hari na sia? Ginhilway bala niya dayon ang iya mga alagad sa duta sa pagkabihag sa Babilonia nga Daku? Gintangduan bala niya ang iya “matutom kag mainandamon nga ulipon” sang 1914 kag ginsugdan ang daku nga hilikuton sang pag-ani?—Mat. 24:45.

Wala. Tandai nga si apostol Pedro gingiyahan sa pagsulat nga ang paghukom “magasugod sa balay sang Dios.” (1 Ped. 4:17) Si propeta Malaquias nagtagna man parte sa tion nga si Jehova magakadto sa Iya balay sang pagsimba upod “ang mensahero sang katipan,” ang Anak sang Dios. (Mal. 3:1-5) Tion ina sang pagpuro kag pagtilaw. Ginpamatud-an bala sang kasaysayan ini nga tagna?

Huo! Ang mga tuig halin sang 1914 asta sa una nga bahin sang 1919 mabudlay nga tion sang pagtilaw kag pagpuro sa mga Estudyante sang Biblia, nga nakilala sang ulihi nga mga Saksi ni Jehova. Sang 1914, madamo sa katawhan sang Dios sa duta ang napaslawan sang wala mag-abot ang ila ginapaabot nga katapusan sang sistema. Sang 1916, nagdugang pa gid ang ila kapaslawan sang napatay si Charles T. Russell, ang nagapanguna sadto sa katawhan sang Dios. Ang pila nga loyalista gid kay Brother Russell nagkontra kay Joseph F. Rutherford, ang nagbulos kay Russell sa pagpanguna. Nagbinahinbahin sila kag halos mabungkag ang organisasyon sang 1917. Dayon sang 1918, bangod sa sugyot sang mga klero, si Brother Rutherford kag ang pito sa iya mga kaupod ginkasuhan, sala nga ginpamatbatan, kag ginpriso. Ginsira ang headquarters sa Brooklyn. Maathag nga wala pa mahilway ang katawhan sang Dios sa Babilonia nga Daku.

Pero ano ang natabo sang 1919? Gulpi lang nagbag-o ang tanan! Sa una nga bahin sang tuig, ginhilway si Rutherford kag ang iya mga kaupod. Kag nanghikot sila gilayon! Dayon nagplano sila nga maghiwat sang kombension, kag ginsugdan nila ang bag-o nga magasin nga The Golden Age (Magmata! subong). Ini nga magasin para sa pagbantala sa publiko. Isa pa, sa kada kongregasyon, may gintangdo nga manugtatap nga magaorganisar kag magapanguna sa ministeryo. Sina man nga tuig, ginbalhag ang Bulletin (Ang Aton Cristianong Pagkabuhi kag Pagministeryo—Workbook Para sa Miting subong) para maorganisar pa gid ang pagbantala nga hilikuton.

Ano ang ginapakita sini? Maathag nga ginhilway sang Cristo ang iya katawhan sa pagkaulipon sa Babilonia nga Daku. Gintangduan niya ang iya matutom kag mainandamon nga ulipon kag ginsugdan ang hilikuton sang pag-ani. Sugod sa sinang importante nga tuig sang 1919, madasig ang pag-uswag sang hilikuton.