LEKSION 25
Ano ang Katuyuan sang Dios Para sa Aton?
Ang Biblia nagsiling nga ang kabuhi sang tawo ‘malip-ot kag puno sing kagamo.’ (Job 14:1) Amo gid man bala sini ang gusto sang Dios para sa aton? Kon indi, ano gid ang katuyuan niya para sa aton? Matabo gid bala ini? Binagbinaga ang makapaumpaw nga mga sabat sang Biblia.
1. Ano nga klase sang kabuhi ang gusto ni Jehova para sa aton?
Gusto ni Jehova nga hatagan niya kita sing pinakamaayo nga kabuhi. Sang gintuga niya si Adan kag si Eva, ginpaistar niya sila sa matahom nga paraiso, ang hardin sang Eden. Dayon “ginpakamaayo sila sang Dios, kag nagsiling ang Dios sa ila: ‘Magpanganak kamo kag magdamo, pun-a ninyo ang duta kag dumalahan ini.’” (Genesis 1:28) Gusto ni Jehova nga magpanganak sila, himuon nga paraiso ang bilog nga duta, kag atipanon nila ang mga sapat. Katuyuan niya nga mangin perpekto ang tanan nga tawo kag mabuhi sing wala katapusan.
Bisan pa indi amo sina ang sitwasyon subong,a wala nagbag-o ang katuyuan sang Dios. (Isaias 46:10, 11) Gusto niya gihapon nga ang matinumanon nga mga tawo magkabuhi sing wala katapusan sa perpekto nga kahimtangan.—Basaha ang Bugna 21:3, 4.
2. Paano mangin malipayon ang aton kabuhi subong?
Gintuga kita ni Jehova nga may “espirituwal nga kinahanglanon,” amo ini ang aton handum nga makilala kag masimba sia. (Basaha ang Mateo 5:3-6.) Gusto ni Jehova nga mangin abyan naton sia, ‘maglakat kita sa tanan niya nga dalanon, higugmaon sia, kag alagaron sia sing bug-os tagipusuon.’ (Deuteronomio 10:12; Salmo 25:14) Kon himuon naton ini, mangin malipayon gid kita bisan pa may mga problema. Kon ginasimba naton si Jehova may katuyuan gid ang aton kabuhi.
USISAA PA GID
Hibaluon naton ang parte sa daku nga gugma nga ginpakita ni Jehova sang gintuga niya ang duta para sa aton kag kon ano ang ginatudlo sang iya Pulong parte sa katuyuan sang kabuhi.
3. Kanami gid sang katuyuan ni Jehova para sa mga tawo
Tan-awa ang VIDEO, dayon binagbinaga ang masunod nga pamangkot.
Ngaa gintuga sang Dios ang aton matahom nga planeta?
Basaha ang Manugwali 3:11, dayon binagbinaga ini nga pamangkot:
Ano ang ginatudlo sini sa imo parte kay Jehova?
4. Wala nagbag-o ang katuyuan ni Jehova
Basaha ang Salmo 37:11, 29 kag Isaias 55:11, dayon binagbinaga ini nga pamangkot:
Ngaa masiling naton nga wala nagbag-o ang katuyuan ni Jehova para sa aton?
Ang balay nga naguba puede pa kay-uhon. Ang duta ginguba man sang madamo nga tawo, pero kay-uhon ini sang Dios para istaran sang mga nagapalangga sa iya
5. May katuyuan ang aton kabuhi kon ginasimba naton si Jehova
Malipay gid kita kon mahibaluan naton ang katuyuan sang kabuhi. Tan-awa ang VIDEO, dayon binagbinaga ang masunod nga pamangkot.
Ano ang nabenepisyo ni Terumi sang natun-an niya ang katuyuan sang kabuhi?
Basaha ang Manugwali 12:13, dayon binagbinaga ini nga pamangkot:
Madamo sing ginhimo si Jehova para sa aton, gani ano ang dapat naton ibalos sa iya?
KON PAMANGKUTON KA: “Ano ang katuyuan sang kabuhi?”
Ano ang isabat mo?
SUMARYO
Gusto ni Jehova nga magkabuhi kita sing wala katapusan sa perpekto nga kahimtangan diri sa duta. Kon simbahon naton sia sing bug-os tagipusuon, may katuyuan gid ang aton kabuhi—bisan subong pa lang.
Rebyu
Ano ang katuyuan sadto ni Jehova para kay Adan kag kay Eva?
Ngaa makasiling kita nga wala nagbag-o ang katuyuan sang Dios para sa mga tawo?
Ano ang himuon mo para may katuyuan ang imo kabuhi?
DUGANG NGA IMPORMASYON
Basaha ang mga ebidensia nga matuod gid ang hardin sang Eden.
“Ang Hardin sang Eden—Matuod Bala Ini?” (Ang Lalantawan, Enero 1, 2011)
Hibalua kon ngaa makasiguro kita nga ang duta magapabilin asta san-o.
Usisaa ang ginasiling sang Biblia kon paano mo mahibaluan ang katuyuan sang kabuhi.
Tan-awa kon paano narealisar sang isa ka tawo nga abi niya ara na sa iya ang tanan pero may kulang pa gali.
a Matun-an sa masunod nga leksion kon ano ang rason.