Ano ang Kingdom Hall?

Ang Kingdom Hall amo ang tawag sa simbahan sang mga Saksi ni Jehova. Linibo na karon ang mga Kingdom Hall sa bilog nga kalibutan. Kada semana, sobra sa 105,000 ka kongregasyon sang mga Saksi ni Jehova ang nagatipon sa sini nga mga Kingdom Hall.

Ang kada Kingdom Hall, may tilipunan nga ginahiwatan sing mga lektyur kag mga programa sa pagtuon sa Biblia. Ang kalabanan sini, may stage. Diri nagatindog ang ispeker nga nagadumala sa miting. May mga pulungkuan man ini para sa 100 asta 300 ka tawo. Ang iban nga Kingdom Hall may mga classroom kag opisina. Ang iban naman may gamay nga librarya nga may mga reperensia kag mga balasahon parte sa Biblia. Puede ini gamiton sang tanan sa ila pag-research.

Pero ang Kingdom Hall indi pareho sa iban nga simbahan sang nagapangangkon nga mga Cristiano. Wala diri sing mga altar, santos, ukon krus. Ngaa? Bangod ginasunod sang mga Saksi ni Jehova ang sugo sang Biblia nga ‘magpalagyo sa idolatriya.’ (1 Corinto 10:14; Juan 4:24) Ang kalabanan nga simbahan kag templo madamo sing malahalon nga mga dekorasyon. Pero ang Kingdom Hall simple, praktikal, kag ang tanan nga bahin sini magamit gid. Ang ginahatagan sing importansia indi ang bilding kundi ang mga instruksion halin sa Biblia nga ginatudlo diri.

Ngaa gintawag ini nga Kingdom Hall? Ang mga pagtinipon nga ginahiwat diri nasentro sa mga panudlo sang Biblia kag sa importante nga mensahe sini. Ini amo ang “ginharian sang Dios,” nga pirme ginawali ni Jesus. (Lucas 4:43) Gani ang ngalan nga Kingdom Hall, nga gingamit halin pa sang mga 1930, nahisanto gid sa katuyuan sini, nga amo ang pagsuportar sa matuod nga pagsimba kag mangin tilipunan sa pagwali sang “maayong balita sang ginharian.” (Mateo 24:14) Ang mga Kingdom Hall wala ginagamit sa mga party kag negosyo. Ang pagpatindog, pagmentinar, kag mga kagastuhanan sini ginasuportahan sang boluntaryo nga donasyon. Wala sing may nagapangolekta ukon nagapasa sing sibot. May ara lang kahon nga ginabutang sa isa ka lugar para sa bisan sin-o nga gusto magdonar.

Isa lang ang katuyuan sang mga Kingdom Hall sa bilog nga kalibutan, pero lainlain ang kadakuon kag desinyo sini. Ngaa? Kay nagadepende ini sa materyales, klima, kag ikasarang sang mga Saksi ni Jehova sa sina nga lugar. Ang iban nga Kingdom Hall human sa tisa ukon bricks, kahoy, kag bato. Ang iban wala sing dingding. Ang iban naman may dingding nga human sa kawayan kag may atop nga kugon ukon nipa.

Ang bisan sin-o welcome nga magpamati sa mga miting sa Kingdom Hall. (Hebreo 10:25) May mga miting para sa publiko nga ginahiwat kada semana. Ginabinagbinag diri ang mga topiko halin sa Biblia para sa mga Saksi ni Jehova kag sa mga bisita. Ginaagda ka namon nga magkadto sa Kingdom Hall sa inyo lugar.