‘Magdala Kita sing Dulot kay Jehova’

KON may isa nga naghimo sa imo sing maayo, paano mo ginapakita ang imo apresasyon? Binagbinaga kon paano ginpakita sang mga pangulo sang kasuldadusan sa Israel ang ila pagpasalamat matapos ang ila pagpakig-away sa mga Midianhon. Natabo ang inaway sa tapos makasala ang Israel bangod sa Baal sang Peor. Ginbuligan sang Dios ang iya katawhan nga magdaug, kag ang ila mga inagaw ginbahinbahin nila sa 12,000 ka soldado kag sa bug-os nga Israel. Suno sa sugo ni Jehova, naghatag ang mga soldado sang bahin sa mga saserdote, kag ang iban nga mga Israelinhon naghatag man sing bahin sa mga Levinhon.—Num. 31:1-5, 25-30.

Apang, ang mga pangulo sang kasuldadusan luyag maghatag sing dugang pa. “Ang imo mga alagad nag-isip sang kadamuon sang mga lalaki nga hangaway nga yari sa idalum sang amon pagtatap, kag wala sing nakulang nga isa ka tawo sa amon,” siling nila kay Moises. Gani, nagdala sila sang mga bulawan kag nanuhaytuhay nga huluyason subong dulot kay Jehova. Sa kabug-usan, ang bulawan nga mga huluyason nagabug-at sing kapin sa 190 kilos.—Num. 31:49-54.

Sa karon, madamo man ang napahulag nga magpasalamat kay Jehova sa iya ginhimo. Dugang pa, indi lamang ang dedikado nga mga alagad sang Dios ang nagahimo sini. Binagbinaga ang halimbawa sang isa ka drayber sa bus nga nagasugat dul-ong sa istadyum sang mga delegado sa internasyonal nga kombension sa Bologna, Italya, sang 2009. Bangod kalmado sia kag mahinalungon sa pagmaneho, luyag sang mga pasahero nga pasalamatan sia. Ginhatagan nila sia sing thank-you card kag tip kag sang libro nga Ano Gid ang Ginatudlo Sang Biblia? Bangod sina, ang drayber nagsiling: “Nalipay ako nga batunon ang kard kag ang libro, pero iuli ko ang kuarta kay luyag ko iamot ini agod magpadayon ang inyo hilikuton. Bisan pa indi ako Saksi ni Jehova, luyag ko mag-amot kay nakita ko nga ang inyo hilikuton ginahimo ninyo bangod sa gugma.”

Kon luyag mo pasalamatan si Jehova sa iya ginhimo para sa imo, ang isa ka paagi amo ang pag-amot para sa bug-os kalibutan nga hilikuton sang mga Saksi ni Jehova. (Mat. 24:14) Nalista sa kaupod nga kahon ang mga paagi sa paghatag nga ginapili sang iban.