Ngaa Madamo ang Nagabulagay?

“Nagkadto [kay Jesus] ang mga Fariseo nga nagatinguha sa pagtilaw sa iya kag nagasiling: ‘Tugot bala sa kasuguan nga diborsiohan sang isa ka lalaki ang iya asawa sa tanan nga sahi sang kabangdanan?’”—Mateo 19:3.

SANG una, may mga namangkot kay Jesus kon bala dapat magdugay ang pag-asawahay kag kon bala posible ini. Ginsabat niya sila: “Wala bala ninyo mabasahi nga sia nga nagtuga sa ila sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod’? Amo nga indi na sila duha, kundi isa ka unod. Gani, ang gintingob sang Dios indi pagbulagon sang tawo.”a (Mateo 19:4-6) Ginapakita sini nga katuyuan sang Dios nga indi magbulagay ang mag-asawa.

Sa madamo nga pungsod, mga 40 porsiento sang mga mag-asawa ukon sobra pa ang ‘nagabulagay’ ukon nagadiborsio. Gani, epektibo pa bala ang laygay sang Biblia sa pag-asawahay? Indi ayhan may diperensia ang kahimusan sang pag-asawahay amo nga madamo ang nagabulagay?

Binagbinaga: Ang duha ka mag-asawa nagbakal sing pareho nga modelo sang salakyan. Ginaatipan sang una nga mag-asawa ang ila salakyan kag mahalong sila magmaneho, amo nga wala ini naguba. Ang isa naman ka mag-asawa patarasak maggamit sang ila salakyan kag wala nila ini ginamentinar. Gani naguba ini kag ginpabay-an na lang. Sin-o ang balasulon? Ang salakyan bala ukon ang tag-iya? Siempre, ang tag-iya.

Amo man sini sa pag-asawahay. Bisan pa madamo ang nagabulagay, indi buot silingon nga may diperensia ini nga kahimusan. Ginapamatud-an ini sang minilyon ka madinalag-on nga pag-asawahay. Ini nga mga pag-asawahay nagahatag sing kalipay kag kalig-unan sa kada isa, sa pamilya, kag sa komunidad. Pero pareho sang salakyan, ang pag-asawahay dapat man atipanon kag mentinahon para magdugay.

Bag-o man kamo nga mag-asawa ukon bisan dugay na, epektibo gid ang laygay sang Biblia kon paano atipanon kag pabakuron ang inyo pag-updanay. Basaha ang mga halimbawa sa masunod nga mga pahina.

[Nota]