Pamangkot sang mga Bumalasa . . .
Makatalaka Bala ang Kabuhi nga Wala Katapusan sa Paraiso?
▪ Ginasugid sang Biblia ang paglaum nga mahimo kita mabuhi sing wala katapusan sa Paraiso sa duta. (Salmo 37:29; Lucas 23:43) Makatalaka bala ang kabuhi sa sini nga kahimtangan?
Maayo gid ini nga pamangkot. Natun-an sang mga researcher nga kon matak-an sing sobra ang isa ka tawo, mahimo sia mabalaka, masubuan, kag dali madisgrasya. Mahimo madali matak-an ang mga tawo nga nagabatyag nga wala sing katuyuan ang ila kabuhi ukon ginakapoy sa ila adlaw-adlaw nga hilikuton. Wala bala sing katuyuan ang kabuhi sa Paraiso? Indi bala makalilipay ang mga hilikuton didto?
Una, dumduma nga ang nagtanyag sang kabuhi nga wala katapusan amo ang Awtor sang Biblia, si Jehova nga Dios. (Juan 3:16; 2 Timoteo 3:16) Ang gugma amo ang panguna nga kinaiya sang Dios. (1 Juan 4:8) Ginahigugma gid kita ni Jehova kag ginahatagan sang tanan nga maayo nga mga butang.—Santiago 1:17.
Nahibaluan sang aton Manunuga nga para mangin malipayon kita, kinahanglan naton ang mapuslanon nga mga hilikuton. (Salmo 139:14-16; Manugwali 3:12) Sa Paraiso, ang mga tawo indi pareho sang robot nga wala nagabatyag sing kalipay sa ila ginaobra. Sa baylo, makabenepisyo sila sa ila ginahimo, pati na ang ila mga hinigugma. (Isaias 65:22-24) Matak-an ka pa bala kon ang imo ginaobra makalilipay, makahalangkat, kag ginahimo mo adlaw-adlaw?
Binagbinaga man nga indi pagtugutan ni Jehova nga Dios ang bisan sin-o lang nga mag-istar sa Paraiso. Ihatag lamang niya ang kabuhi nga wala katapusan sa mga nagailog sa iya Anak nga si Jesus. (Juan 17:3) Sang diri si Jesus sa duta, nalipay sia sa paghimo sang kabubut-on sang iya Amay. Paagi sa iya ginsiling kag ginhimo, gintudluan niya ang iya mga sumulunod nga may daku nga kalipay sa paghatag sangsa pagbaton. (Binuhatan 20:35) Kon mangin Paraiso liwat ang duta, ang tanan magatuman sa duha ka pinakadaku nga sugo—ang paghigugma sa Dios kag paghigugma sa isigkatawo. (Mateo 22:36-40) Imadyina nga kaupod mo ang mga tawo nga nagahigugma sa imo kag sa ila trabaho! Sa banta mo, makatalaka bala mag-upod sa ila?
Ano pa ang mangin kahimtangan sa Paraiso? Kada adlaw, makatuon kita sing bag-o nga mga butang parte sa aton Manunuga. Madamo na sang nadiskobrehan ang mga researcher parte sa mga tinuga ni Jehova. (Roma 1:20) Pero sa kabilugan, diutay pa lang ang aton nahibaluan. Matuod gihapon ang ginsiling sang matutom nga tawo nga si Job parte sa mga tinuga sang Dios linibo na ka tuig ang nagligad. ‘Ini sila mga higad lamang sang mga dalanon sang Dios,’ siling ni Job, “kag daw ano ka diotay nga hutik nga mabatian ta sa iya! Apang ang daguub sang iya gahum sin-o bala ang makahangup?”—Job 26:14.
Bisan pa mabuhi kita sing wala katapusan, indi naton mahibaluan ang tanan parte kay Jehova kag sa iya mga tinuga. Suno sa Biblia, ginbutang sang Dios sa aton tagipusuon ang handum nga mabuhi sing wala katapusan. Pero nagsiling man ini nga ‘indi naton matungkad ang binuhatan nga ginhimo sang Dios kutub sa ginsuguran bisan tubtub sa katapusan.’ (Manugwali 3:10, 11) Sa banta mo, makatalaka bala ang pagtuon sing bag-o nga mga butang parte sa aton Manunuga?
Bisan subong, ang mga tawo nga masako sa hilikuton nga makabulig sa iban kag nagahimaya sa Dios wala gawa ginatak-an. Kon amo man sini ang himuon naton, indi gid kita matak-an bisan pa mabuhi kita sing wala katapusan.
[Picture Credit Lines sa pahina 27]
Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)