Ang Mas Maayo nga Palaabuton!

“Sa diotay pa nga tion, kag ang malauton wala na . . . Apang ang mapainubuson magapanubli sang duta, kag magakalipay sila sa kabuganaan sang paghidait.” —SALMO 37:10, 11.

MAHIMO nga gusto mo gid nga matuman ang tagna nga ginsambit sa ibabaw. May mabakod nga mga pamatuod nga madali na lang ini matuman.

Ginbinagbinag sang nagligad nga mga artikulo ang pila lamang ka tagna sang Biblia nga nagapamatuod nga yara na kita sa “katapusan nga mga adlaw.” (2 Timoteo 3:1-5) Paagi sa paggiya sang Dios, gintagna sang mga manunulat sang Biblia ini nga mga hitabo para makatigayon kita sing paglaum. (Roma 15:4) Ang katumanan sini nga mga tagna nagakahulugan nga madali na lang madula ang aton mga problema subong.

Ano ang matabo pagkatapos sang katapusan nga mga adlaw? Magagahom ang Ginharian sang Dios sa tanan nga katawhan. (Mateo 6:9) Binagbinaga ang ginasiling sang Biblia parte sa duta pag-abot sina nga tion:

● Wala na sing gutom. “May bugana nga uyas sa duta; sa putokputokan sang kabukiran magahapayhapay ini.”—Salmo 72:16.

● Wala na sing balatian. “Ang pumuluyo indi magsiling, ‘Nagamasakit ako.’”—Isaias 33:24.

● Mangin matahom ang duta. “Ang kamingawan kag ang duta nga kigas magakasadya, ang desierto magakalipay kag magapamulak; subong sang rosa.”—Isaias 35:1.

Pila lamang ini sang makalilipay nga mga tagna sang Biblia nga madali na lang matuman. Mahimo mo pamangkuton ang mga Saksi ni Jehova kon ngaa nagasalig gid sila nga may mas maayo nga palaabuton.