Ang Sekreto nga Manuggahom sang Kalibutan Ginbuyagyag

“ANG manuggahom sini nga kalibutan tabugon,” siling ni Jesus sa mga tawo. Sang ulihi, nagsiling pa sia nga ‘ang manuggahom sang kalibutan wala sing gahom sa iya’ kag “ang manuggahom sini nga kalibutan nahukman na.” (Juan 12:31; 14:30; 16:11) Sin-o ang ginapatuhuyan ni Jesus?

Ang ginsiling ni Jesus parte sa “manuggahom sini nga kalibutan” nagapakita nga indi ang iya Amay nga si Jehova nga Dios ang iya ginapatuhuyan. Gani, sin-o “ang manuggahom sini nga kalibutan”? Paano sia “tabugon,” kag paano sia “nahukman na”?

Nagpakilala “ang Manuggahom Sini nga Kalibutan”

Pareho sa lider sang sindikato nga nagapabugal sang iya gahom, amo man ang Yawa sang ginsulay niya si Jesus, ang Anak sang Dios. Sa tapos ginpakita ni Satanas kay Jesus “ang tanan nga ginharian” sang kalibutan, ginsilingan niya sia: “Ihatag ko sa imo ini tanan nga awtoridad kag ang ila himaya, bangod natugyan ini sa akon, kag ihatag ko ini bisan kay sin-o nga luyag ko. Busa, kon maghimo ka sang isa ka buhat sang pagsimba sa akon, mangin imo ini tanan.”—Lucas 4:5-7.

Kon ang Yawa prinsipio lamang sang kalautan, pareho sa ginsiling sang iban, paano sini masulay si Jesus? Ginsulay bala si Jesus sang malain nga panghunahuna ukon handum sa tapos sia mabawtismuhan? Kon matuod ina, paano masiling nga “wala sing sala sa iya”? (1 Juan 3:5) Wala ginpanghiwala ni Jesus ang gahom sang Yawa sa mga tawo. Ginpamatud-an niya ini sang gintawag niya sia nga “manuggahom sang kalibutan,” “manugpatay,” kag “butigon.”—Juan 14:30; 8:44.

Sobra 60 ka tuig sa tapos ginsulay sang Yawa si Jesus, ginpahanumdom ni apostol Juan ang mga Cristiano parte sa daku nga impluwensia sang Yawa. Nagsiling sia nga “ang bug-os nga kalibutan yara sa gahom sang isa nga malauton.” Ining isa, suno kay Juan, “nagapatalang sa bug-os napuy-an nga duta.” (1 Juan 5:19; Bugna 12:9) Maathag nga ginapakita sang Biblia nga ang “manuggahom sang kalibutan” indi makita nga espiritu. Daw ano kadaku ang iya impluwensia sa mga tawo?

Ang Manuggahom sang Kalibutan Nagahatag sing Gahom sa Iya Kaupdanan

Sang nagsulat si apostol Pablo parte sa pagpakig-away sang mga Cristiano sang ila pagtuo, ginpakilala niya ang ila mga kaaway. “Nagapakigdumog kita,” siling niya, “indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.” (Efeso 6:12) Gani, ini nga pagpakig-away indi batok sa mga tawo, kay “indi [ini] batok sa dugo kag unod,” kundi batok sa “malaut nga mga puersa nga espiritu.”

Suno sa pinakamoderno nga mga badbad sang Biblia, ang “malaut nga mga puersa nga espiritu,” wala nagapatuhoy sa prinsipio sang kalautan, kundi sa gamhanan kag malaut nga espiritu nga mga persona. Ang iban nga bersion nagbadbad sini subong “espirituhanon nga mga kabon sang kalautan sa langitnon nga mga duug” (Ang Biblia, PBS), “espirituhanon nga mga hangaway sang kalainan sa kalangitan” (Biblia sang Katilingban sang mga Kristiano, BKK), kag “malaut kag espirituhanon nga mga kusog sa kalangitan” (Maayong Balita nga Biblia, MB). Gani, ginagamhan sang Yawa ang iban pa nga rebelde nga anghel nga nagbiya sang “ila nagakaigo nga puluy-an” sa langit.—Judas 6.

Ginapakita sang tulun-an sang Daniel sa Biblia kon paano ginakontrol sining “mga manuggahom” ang kalibutan halin pa sang una. Nangamuyo si propeta Daniel sa sulod sang tatlo ka semana para sa pareho niya nga mga Judiyo nga nagbalik sa Jerusalem halin sa Babilonia sang 537 B.C.E. Ang anghel nga ginpadala sang Dios para pabakuron ang propeta naatrasar. Ginsugid sang anghel ang rason: “Ang principe sang ginharian sang Persia nagbatok sa akon sing duha ka pulo kag isa ka adlaw.”—Daniel 10:2, 13.

Sin-o ining ‘principe sang Persia’? Maathag nga wala ginpatuhuyan sang anghel ang hari sang Persia nga si Ciro, nga nagpabor sadto kay Daniel kag sa pareho niya nga mga Judiyo. Isa pa, paano makabato ang isa ka hari nga tawo sa isa ka espiritu nga tinuga sa sulod sang tatlo ka semana, samtang isa lang ka anghel ang nagpatay sa 185,000 ka soldado sa isa ka gab-i? (Isaias 37:36) Ining ‘principe sang Persia’ mahimo nga ahente sang Yawa, ukon demonyo nga ginhatagan sing awtoridad sa pagkontrol sa Emperyo sang Persia. Nagsiling pa ang anghel sang Dios nga makig-away sia liwat sa ‘principe sang Persia’ kag sa isa pa ka demonyo, “ang principe sang Grecia.”—Daniel 10:20.

Ginapahangop sini nga may indi makita nga “mga manuggahom sang kalibutan,” ukon mga demonyo nga ginhatagan sing awtoridad sa pagkontrol sa kalibutan sa pagpanguna sang ila lider, si Satanas nga Yawa. Pero ano ang ila katuyuan?

Ginapakilala sang Manuggahom sang Kalibutan Kon Sin-o Gid Sia

Sa tulun-an sang Biblia nga Bugna, ginasugid ni apostol Juan kon paano ginpierde ni Jesus, bilang si Miguel nga arkanghel, ang Yawa kag ang iya mga demonyo, kag kon ano ang makahalalit nga resulta sang pagtabog sa ila sa langit. Mabasa naton: “Kailo sa duta . . . bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.”—Bugna 12:9, 12.

Paano ginpakita sang Yawa ang iya daku nga kaakig? Pareho sa wala na sing paglaum nga mga kriminal nga nagapang-ulamid kag nagapanghalit, ang Yawa kag ang iya mga demonyo determinado nga ulamiron ang duta kag ang pumuluyo sini sa ila kalaglagan. Bangod nahibaluan sang Yawa nga malip-ot na lang ang iya tion, ginagamit niya ang dalagku nga negosyo, nga isa sa panguna nga mga elemento sang kalibutan nga iya ginagamhan, para pasanyugon ang pataka nga pagpamakal, nga nagaresulta sa pagkaubos sang duna nga manggad kag pagkaguba sang palibot. Gani, nabutang sa peligro ang kabuhi sang mga tawo.—Bugna 11:18; 18:11-17.

Sa umpisa pa lang sang kasaysayan sang tawo, ang handum sang Yawa nga maggahom makita na sa pulitika kag relihion. Ginapakita sa tulun-an sang Bugna ang pulitika subong mabangis nga sapat nga ginhatagan sang Yawa sing “daku nga awtoridad.” Ginasugid man sini ang makahuluya nga pag-updanay sang pulitika kag relihion, nga isa ka makangilil-ad nga espirituwal nga pagpakighilawas. (Bugna 13:2; 17:1, 2) Ang pagpamigos, inaway, kag kinagamo sang mga rasa sa sulod sang mga tinuig nagresulta sa kamatayon sang minilyon. Masiling bala nga ining makakulugmat nga mga hitabo ginhimo lang sang mga tawo? Ukon may nagakontrol sini nga indi makita nga malaut nga mga espiritu?

Maathag nga ginabuyagyag sang Biblia ang isa nga nagakontrol sa mga lider kag gamhanan nga mga pungsod. Nahibaluan man sang mga tawo ukon wala, ginailog nila ang kinaiya sang ila manuggahom kag ang ginahimo sini nga pagpanghalit. Pero asta san-o nga magaantos ang mga tawo sa paggahom sang Yawa?

Ang Kalaglagan sang Yawa

Ang mga ginhimo ni Jesus sa duta sang unang siglo nagapakita nga ang Yawa kag ang iya mga demonyo malapit na laglagon. Sang ginsugid sang iya mga disipulo kon paano nila gintabog ang mga demonyo, nagsiling sia sa ila: “Nakita ko si Satanas nga nahulog na subong sang kilat gikan sa langit.” (Lucas 10:18) Ginapakita sini nga nalipay si Jesus sa iya kadalag-an batok sa manuggahom sang kalibutan nga matabo pagbalik niya sa langit bilang si Miguel nga arkanghel. (Bugna 12:7-9) Base sa maid-id nga pagtuon sa mga tagna sang Biblia, ini nga kadalag-an natabo sa langit sang 1914 ukon wala madugay sa tapos sini.a

Sugod sina nga tuig, nahibaluan sang Yawa nga malapit na sia laglagon. Bisan pa ‘ang bug-os nga kalibutan yara sa iya gahom,’ minilyon subong ang wala nadaya sang iya mga pamaagi. Sa bulig sang Biblia, nahibaluan nila kon sin-o gid sia kag kon ano ang iya mga pahito. (2 Corinto 2:11) Nagalaum sila sa ginsiling ni Pablo sa mga Cristiano: “Ang Dios nga nagahatag sang paghidait magadugmok kay Satanas sa idalom sang inyo mga tiil sa indi madugay.”b—Roma 16:20.

Malapit na laglagon ang Yawa! Sa idalom sang mahigugmaon nga paggahom ni Jesus, himuon sang mga matarong ang duta nga paraiso. Madula na ang kapintas, dumot, kag kasakon. “Ang una nga mga butang indi na pagdumdumon,” siling sang Biblia. (Isaias 65:17) Daku gid ini nga kaumpawan para sa mga wala nagadampig sa sekreto nga manuggahom sini nga kalibutan kag sa iya awtoridad!

[Mga Nota]

[Blurb sa pahina 9]

Sa idalom sang mahigugmaon nga paggahom ni Jesus, himuon sang mga matarong ang duta nga paraiso