Himua nga Mas Makalilipay kag Mapuslanon ang Imo Pagtuon
Paano kita mangin malipayon sa pagtuon sa Biblia? Paano mangin mapuslanon ang aton pagtuon? Binagbinagon naton ang tatlo ka importante nga tikang nga makabulig sa aton personal nga pagtuon sang Biblia.
1 MANGAMUYO: Una, mangamuyo kita. (Sal. 42:8) Ngaa? Kay ang pagtuon sang Biblia dapat naton kabigon nga bahin sang aton pagsimba. Gani pangabayon naton si Jehova nga buksan ang aton hunahuna kag hatagan kita sang balaan nga espiritu. (Luc. 11:13) Ang madugay na nga misyonera nga si Barbara nagsiling: “Nagapangamuyo gid ako antes magbasa ukon magtuon sang Biblia. Mabatyagan ko dayon nga upod ko si Jehova kag nalipay sia sa akon ginahimo.” Ang pagpangamuyo antes magtuon magabukas sang aton hunahuna kag tagipusuon nga batunon sing bug-os ang bugana nga espirituwal nga pagkaon.
2 MAMALANDONG: Bangod kulang sa tiempo, ginapakarasan lang sang iban ang pagbasa sang Biblia. Gani indi sila makapanginpulos sa ila pagtuon. Narealisar ni Carlos, nga sobra 50 ka tuig na sa pag-alagad, nga dapat pamalandungan niya ang iya natun-an agod makabenepisyo sia sa sini. Sia nagsiling: “Diutay na lang subong ang akon ginabasa sa Biblia, mga duha ka pahina kada adlaw. Gani, may tion na ako sa pagpamalandong para matun-an ko ang importante nga leksion.” (Sal. 77:12) Kon mamalandong kita, magadalom ang aton ihibalo kag paghangop sa kabubut-on sang Dios.—Col. 1:9-11.
3 IAPLIKAR: Kon makita naton ang kapuslanan sang isa ka hilikuton, makabenepisyo pa gid kita. Amo man sini ang pagtuon sa Biblia. “Nabuligan ako sang akon pagtuon nga malandas ang matag-adlaw nga mga problema, kag napalig-on ako nga magbulig sa iban,” siling ni Gabriel, isa ka brother nga may regular nga rutina sa pagtuon. Sia nagdugang: “Ginatinguhaan ko nga iaplikar ang tanan ko nga natun-an.” (Deut. 11:18; Jos. 1:8) Huo, may bugana nga ihibalo halin sa Dios nga puede naton matun-an kag maaplikar.—Hulu. 2:1-5.
REPASUHA: Pribilehiyo gid naton nga matun-an ang ihibalo nga gin-aman ni Jehova, ang Tuburan sang tanan nga kaalam! (Roma 11:33) Gani, sa masunod mo nga pagtuon, siguraduha nga mangamuyo anay kay Jehova kag mangabay sang husto nga panghunahuna kag sang iya balaan nga espiritu. Dayon mamalandong sa imo nabasa. Padayon nga himua ini kag iaplikar sa imo matag-adlaw nga pagkabuhi ang imo natun-an. Kon himuon mo ining importante nga mga tikang, mangin mas makalilipay kag mapuslanon ang imo pagtuon sang Biblia.