Ano ang Pagtamod ni Jesus sa Pulitika?

ANG mga manunulat sang Ebanghelyo naglaragway sang pila ka hitabo sa ministeryo ni Jesus may kaangtanan sa pulitika. Halimbawa, wala madugay sa tapos sia mabawtismuhan sa edad nga 30, gintanyagan sia sang Yawa nga mangin manuggahom sang kalibutan. Sang nagaministeryo na sia, luyag sia himuon sang mga tawo nga hari. Sang ulihi, ginhaylo sia sang mga tawo nga mangin aktibista. Ano ang reaksion ni Jesus? Binagbinagon naton ini.

Manuggahom sang kalibutan. Ang mga Ebanghelyo nagasiling nga gintanyagan sang Yawa si Jesus nga maggahom sa “tanan nga ginharian sang kalibutan.” Pamensara kon daw ano kuntani kadaku nga kaayuhan ang mahimo niya kon sia ang naggahom! Sin-o nga pulitiko ang makapangindi sa sini nga tanyag? Pero ginpangindian ini ni Jesus.—Mateo 4:8-11.

Hari. Madamo sa kadungan ni Jesus ang naghandum gid sang isa ka manuggahom nga makasolbar sang ila mga problema sa ekonomiya kag pulitika. Bangod nagdayaw ang mga tawo sa abilidad ni Jesus, luyag nila nga mag-entra sia sa pulitika. Ano ang iya reaksion? Ang manunulat sang Ebanghelyo nga si Juan nagsiling: “Sang mahibaluan ni Jesus nga buot na sila magpalapit kag piliton sia nga mangin hari, naglikaw sia liwat pakadto sa bukid nga nagaisahanon lamang.” (Juan 6:10-15) Maathag nga indi luyag ni Jesus nga madalahig sa pulitika.

Aktibista. Talupangda kon ano ang natabo pila ka adlaw antes patyon si Jesus. Ang mga disipulo sang mga Fariseo, nga gusto mangin independiente sa Emperyo sang Roma, upod sa mga Herodian, nga mga miembro sang pulitikal nga partido nga pabor sa Roma, nakighambal kay Jesus. Gusto nila nga piliton sia nga magpili sang dampigan. Namangkot sila kon dapat bala magbayad ang mga Judiyo sang buhis sa Roma.

Ginsulat ni Marcos ang sabat ni Jesus: “‘Ngaa ginatilawan ninyo ako? Dalhi ako sang denario agod tan-awon ko.’ Nagdala sila sang isa ka denario. Kag nagsiling sia sa ila: ‘Kay sin-o dagway kag ngalan ini?’ Nagsiling sila sa iya: ‘Kay Cesar.’ Nian si Jesus nagsiling: ‘Ibayad ninyo kay Cesar ang mga butang nga iya ni Cesar, apang sa Dios ang mga butang nga iya sang Dios.’” (Marcos 12:13-17) Ang libro nga Church and State—The Story of Two Kingdoms nagkomento kon ngaa amo sini ang sabat ni Jesus: “Nangindi sia nga mangin pulitiko nga mesias kag gin-athag gid niya ang kinatuhayan sang Cesar kag sang Dios.”

Nagakabalaka man si Jesus sa mga problema pareho sang kaimulon, korapsion, kag inhustisya. Ginapakita sang Biblia nga natandog gid sia sa makaluluoy nga kahimtangan sang mga tawo. (Marcos 6:33, 34) Pero wala naghimo sing tikang si Jesus para dulaon ang mga inhustisya sa kalibutan, bisan pa ginpilit kuntani sia sang iban nga mag-entra sa kontrobersial nga mga isyu sadto.

Maathag nga ginapakita sini nga mga halimbawa nga nangindi si Jesus nga mag-entra sa pulitika. Kamusta naman ang mga Cristiano subong? Ano ang dapat nila himuon?