Paano ang Cristianong Panudlo Makaapektar sa Komunidad?

GINBINAGBINAG sa nagligad nga mga artikulo kon ngaa wala nagaentra sa pulitika ang matuod nga mga Cristiano. Pero paano nila mapakita nga interesado sila nga pauswagon ang ila komunidad? Ang isa ka paagi amo ang pagsunod sa sugo ni Jesus: “Busa lakat kamo kag maghimo sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo.”—Mateo 28:19, 20.

Naangot ang pagsunod sa sugo ni Jesus nga “maghimo sang mga disipulo” sa iya ginsiling nga mangin kaangay sa asin kag kapawa sa kalibutan. (Mateo 5:13, 14) Paano? Kag ano ang epekto sina sa mga tawo?

Ang Mensahe sang Cristo—Nagapreserbar kag Nagapasanag

Ang asin nagapreserbar. Amo man sini ang epekto sang mensahe nga ginsugo ni Jesus sa iya mga sumulunod. Ginaamligan sang mga nagabaton kag nagaaplikar sang mga panudlo ni Jesus ang ila kaugalingon sa moral nga pagkadunot nga lapnag subong. Paano? Nalikawan nila ang mga buhat nga makahalit sa ila lawas, pareho sang pagpanigarilyo. Napakita man nila ang gugma, paghidait, pagbatas, kaayo, kag pagkamaayo. (Galacia 5:22, 23) Bangod sina nga mga kinaiya nangin mapuslanon gid sila sa komunidad. Daku ang nabulig sang mga Cristiano sa ila komunidad bangod ginapaambit nila ining nagapreserbar nga mensahe sa iban.

Kamusta naman ang pagpaanggid sa kapawa? Pareho sang bulan nga nagasilak bangod sang kapawa halin sa adlaw, ang mga sumulunod ni Jesus nagapasilak man sang “kapawa” halin kay Jehova nga Dios. Nagasilak sila paagi sa pagwali sang makapasanag nga mensahe kag sa paghimo sing maayo.—1 Pedro 2:12.

Ginpadaku pa gid ni Jesus ang pagkaanggid sang kapawa kag sang pagkadisipulo sang nagsiling sia: “Ang mga tawo nagasindi sang suga kag nagabutang sini sa ibabaw sang tulungtungan, indi sa idalom sang sulukban, kag nagaiwag ini sa tanan nga yara sa balay. Sing kaanggid paiwaga ang inyo kapawa sa atubangan sang mga tawo.” Makita gid sang tanan ang nagasiga nga suga kon ibutang ini sa tulungtungan. Sing kaanggid, dapat makita man sang tanan ang pagwali kag maayo nga mga buhat sang matuod nga mga Cristiano. Ngaa? Si Jesus nagsiling nga ang mga nakakita sing maayo nga mga buhat magahimaya indi sa mga Cristiano, kundi sa Dios.—Mateo 5:14-16.

Responsibilidad sang Tanan

Sang si Jesus nagsiling, “Kamo ang kapawa sang kalibutan” kag “paiwaga ang inyo kapawa,” ginapatuhuyan niya ang tanan niya nga disipulo. Ang sugo ni Jesus indi matuman sang pila lamang ka indibiduwal sa lainlain nga relihion. Sa baylo, ang tanan nga tumuluo amo “ang kapawa.” Ang pito ka milyon ka Saksi ni Jehova nga nagaistar sa sobra 235 ka pungsod, nagapati nga responsibilidad sang tanan nga bisitahan ang iban para ipaambit ang mensahe nga luyag ni Jesus nga iwali sang iya mga sumulunod.

Ano ang tema sang mensahe sang mga Saksi ni Jehova? Sang ginsugo ni Jesus ang iya mga sumulunod nga magwali, wala niya sila ginsilingan nga iwali ang pagbag-o sa katilingban ukon pulitika, ang pagsimpon sang Simbahan kag Gobierno, ukon ang iban pa nga ideolohiya. Kundi, gintagna niya: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod.” (Mateo 24:14) Gani, sa pagsunod sa sugo ni Jesus, ang matuod nga mga Cristiano subong padayon nga nagawali sa iban parte sa Ginharian sang Dios—ang lamang nga gobierno nga makatapos sang malaut nga kalibutan ni Satanas kag makapaluntad sang matarong nga bag-ong kalibutan.

Kon nagabasa sang mga Ebanghelyo, may duha ka talalupangdon nga butang sa ministeryo ni Jesus ang may labot sa mga ginahimo sang matuod nga mga Cristiano subong. Binagbinagon ini sa masunod nga artikulo.

[Blurb sa pahina 8]

Ngaa ginpaanggid sa asin ang mensahe sang Cristo?

[Blurb sa pahina 9]

Ngaa ang mensahe sang Cristo kaangay sang suga sa madulom nga lugar?