Nag-entra Bala sa Pulitika ang mga Cristiano sang Unang Siglo?

▪ Antes magpalangit si Jesus, ginhatagan niya ang iya mga disipulo sing maathag nga instruksion kon paano nila tumanon ang ila ministeryo. Pero wala sia sing ginsiling parte sa pulitika. (Mateo 28:18-20) Gani, ginsunod sang iya mga disipulo ang prinsipio nga ginsiling anay ni Jesus: “Ibayad ninyo kay Cesar ang mga butang nga iya ni Cesar, apang sa Dios ang mga butang nga iya sang Dios.”—Marcos 12:17.

Paano ina nga prinsipio nakabulig sa mga disipulo ni Jesus nga indi mangin bahin sang kalibutan? Paano nila mahibaluan kon ano ang mga butang nga para sa Gobierno, ukon kay Cesar, kag ang para sa Dios?

Gintamod ni apostol Pablo nga supak sa prinsipio nga ginsiling ni Jesus ang pag-entra sa pulitika. “Handa si Pablo nga gamiton ang iya pagka-Romano para maghingyo sang proteksion sa gobierno, pero wala sia nag-entra sa mga isyu sa pulitika sang iya panahon,” siling sang Beyond Good Intentions—A Biblical View of Politics.

Ano nga mga giya ang ginhatag ni apostol Pablo sa mga Cristiano pareho niya? Ang amo gihapon nga libro nagsiling: “Sa iya mga sulat sa mga tumuluo sa dalagku nga siudad pareho sang Corinto, Efeso, kag bisan sa Roma wala sia nagsambit parte sa ginamo sa pulitika.” Nagsiling pa ini nga libro nga si Pablo “nagsugo nga magpasakop sa gobierno, pero wala niya ginsambit sing detalyado sa iya mga sulat ang bisan isa lang ka patakaran para sa lokal nga simbahan nga suportahan ang mga institusyon sang gobierno.”—Roma 12:18; 13:1, 5-7.

Istrikto nga gintuman sang mga Cristiano nga nagkabuhi mga dinekada pagkatapos sang kamatayon ni Pablo ang ila obligasyon sa Dios kag sa Gobierno. Ginarespeto gihapon nila ang ara sa puesto pero wala sila nagapasilabot sa mga hilikuton sang pulitika. Ang Beyond Good Intentions nagsiling parte sa mga tumuluo: “Bisan pa nagapati sila nga may obligasyon sila nga tahuron ang gobierno, ang mga Cristiano sang una wala nag-entra sa mga hilikuton sang pulitika.”

Pero nagbag-o ang kahimtangan mga 300 ka tuig sa tapos napatay si Jesus. Ang teologo nga si Charles Villa-Vicencio nagsiling: “Sang nagbag-o ang kahimtangan sa pulitika sa idalom ni Constantino, madamo nga Cristiano ang nag-entra sa mga hilikuton sang gobierno kag army kag nagbaton sang puesto sa gobierno.” (Between Christ and Caesar) Ano ang resulta? Pagkatapos sang ikap-at nga siglo C.E., ang kombinasyon sang relihion kag pulitika amo ang nangin relihion sang Emperyo sang Roma.

Madamo nga relihion subong nga nagapangangkon nga nagasunod kay Jesus ang nagapalig-on gihapon sa ila mga miembro nga mag-entra sa pulitika. Pero ini nga mga relihion wala nagasunod kay Jesus ukon sa halimbawa sang mga Cristiano sang unang siglo.