“Karon nga Kilala Na Ninyo ang Dios”—Ano Na ang Inyo Ginahimo?

1. Ngaa ang piloto may ginasunod nga listahan sa pag-inspeksion antes maglupad?

ANG mga piloto nga nagapalupad sang isa sa pinakamadinalag-on nga salakyan pangkahanginan may listahan sang sobra 30 ka butang nga kinahanglan inspeksionon antes maglupad. Kon indi pagsundon sing maayo sang mga piloto ang listahan antes maglupad, mas daku ang posibilidad sang aksidente. Nahibaluan mo bala kon ano nga klase sang piloto ang nagahimo sini? Ini amo ang eksperiensiado gid nga piloto! Ang bag-uhan nga piloto mahimo magpabuyanbuyan kag magpasapayan sang iya pag-inspeksion antes maglupad.

2. Ano nga listahan ang ginarekomendar sa mga Cristiano?

² Kaangay sang piloto nga nagalikaw pirme sa katalagman, makagamit ka man sing isa ka klase sang listahan para masiguro nga ang imo pagtuo indi maaberiya sa tion nga kinahanglan mo gid ini. Bag-o ka man nabawtismuhan ukon madugay na nga nagaalagad sa Dios, importante gid ang regular nga pag-usisa sa kadalumon sang imo pagtuo kag debosyon kay Jehova nga Dios. Kon indi mo ini pag-usisaon sing maayo kag sing regular, mahimo ka mahalitan sa espirituwal. Ang Biblia nagpaandam sa aton: “Ang nagahunahuna nga nagatindog sia mag-andam nga indi sia mapukan.”—1 Cor. 10:12.

3. Ano ang kinahanglan himuon sang mga Cristiano sa Galacia?

³ Kinahanglan usisaon sang mga Cristiano sa Galacia ang kadalumon sang ila pagtuo kag apresyahon ang ila espirituwal nga kahilwayan. Paagi sa iya halad, ginbuksan ni Jesus ang kahigayunan para sa mga nagatuo sa iya nga makilala ang Dios sa tumalagsahon gid nga paagi—mahimo sila mangin anak sang Dios! (Gal. 4:9) Para makapabilin sa sinang pinakamaayo nga kaangtanan, kinahanglan isikway sang mga taga-Galacia ang mga panudlo sang mga sumalakdag sang Judaismo, nga nagapilit sa ila nga tumanon ang Mosaikong Kasuguan. Kay man, ang wala natuli nga mga Gentil nga katapo sang mga kongregasyon wala napaidalom sa Kasuguan! Ang mga Judiyo kag Gentil kinahanglan maghimo sing pag-uswag sa espirituwal. Nadalahig sa sini ang pagbaton nga indi sila mangin matarong paagi sa kahimusan sa Mosaikong Kasuguan.

UNA NGA MGA TIKANG SA PAGKILALA SA DIOS

4, 5. Ano ang ginlaygay ni Pablo sa mga taga-Galacia, kag ngaa para man ini sa aton?

⁴ Ang laygay ni apostol Pablo sa mga taga-Galacia ginrekord para sa isa ka katuyuan: agod punggan ang mga Cristiano sa bisan ano nga tion sa pagsikway sa manggad sang kamatuoran sa Biblia kag sa pagbalik sa mga butang nga ila ginbiyaan. Gin-inspirar ni Jehova ang apostol para pabakuron nga magpabilin nga malig-on indi lamang ang mga katapo sang mga kongregasyon sa Galacia kundi ang tanan Niya nga sumilimba.

⁵ Kinahanglan naton tanan dumdumon kon paano kita ginhilway sa espirituwal nga pagkaulipon kag nangin Saksi ni Jehova. Para mahimo ini, binagbinaga ining duha ka pamangkot: Nadumduman mo bala ang mga tikang nga imo ginhimo para makalipikar sa bawtismo? Nadumduman mo bala kon paano mo nakilala ang Dios, kag kon paano ka niya nakilala amo nga nabatyagan mo ang espirituwal nga kahilwayan?

6. Ano nga listahan ang aton binagbinagon?

⁶ Tanan kita nagsunod sa siam ka tikang. Ini nga mga tikang, nga kaangay sa espirituwal nga listahan, makita sa kahon nga “Mga Tikang nga Nagadul-ong sa Bawtismo kag Padayon nga Pagtubo.” Ang regular nga pagpahanumdom sa aton sining siam ka tikang magapabakod sa aton nga indi pagbalikan ang mga butang sa kalibutan. Pareho sa eksperiensiado kag mahalungon nga piloto nga nagalikaw pirme sa aksidente paagi sa pag-usisa anay sang iya listahan antes maglupad, mabuligan ka man nga makapadayon sa pag-alagad sing matutom paagi sa pagrepaso sang espirituwal nga listahan.

ANG MGA KILALA SANG DIOS PADAYON NGA NAGATUBO SA ESPIRITUWAL

7. Ano nga sulundan ang kinahanglan naton sundon, kag ngaa?

⁷ Ang listahan sang piloto nagapahanumdom sa iya nga may mga buluhaton nga dapat niya himuon sing maayo antes maglupad. Regular man naton nga mausisa ang aton kaugalingon kag ang mga buluhaton nga aton ginahimo sugod sang nabawtismuhan kita. Si Pablo nagsulat kay Timoteo: “Padayon nga sunda ang sulundan sang makapapagros nga mga pulong nga nabatian mo sa akon nga may pagtuo kag gugma may kaangtanan kay Cristo Jesus.” (2 Tim. 1:13) Ining “makapapagros nga mga pulong” masapwan sa Pulong sang Dios. (1 Tim. 6:3) Subong nga ang sketch sang isa ka artist nagahatag sa aton sing kabug-usan nga laragway, ang ‘sulundan sang kamatuoran’ nagahatag sa aton sing masangkad nga ideya para hangpon kag sundon ang ginapatuman sang Dios sa aton. Tan-awon naton karon ang mga tikang nga nagadul-ong sa aton pagpabawtismo agod mahibaluan kon bala ginasunod gid naton ang sulundan sang kamatuoran.

8, 9. (a) Ngaa dapat kita padayon nga magtubo sa ihibalo kag pagtuo? (b) Iilustrar ang kapuslanan sang espirituwal nga pagtubo kag kon ngaa dapat nagapadayon ini.

⁸ Ang una sa aton listahan amo ang pagkuha sing ihibalo. Bangod sini, mapalambo naton ang pagtuo. Pero dapat kita padayon nga magtubo sa ihibalo kag pagtuo. (2 Tes. 1:3) Ang pagtubo nagadalahig sa sunodsunod nga mga pagbag-o. Ang tinaga nga “magtubo” nagakahulugan sing pagtaas kag pagdaku. Gani pagkatapos sang bawtismo, dapat padayon kita nga magtubo sa espirituwal, para indi kita magkunol.

⁹ Mapaanggid naton ang aton espirituwal nga pagtubo sa pagtubo sang isa ka kahoy. Ang kahoy mahimo nga mangin daku katama, ilabi na kon madalom ang gamot sini kag nakapangalapkap sing maayo. Halimbawa, ang pila ka dalagku nga sedro sa Lebanon mahimo magtaas pareho sa 12 ka panalgan nga bilding, kag may mabakod kag nagapangalapkap sing maayo nga mga gamot. Ang sirkumperensia sang puno sini nagalab-ot sa 12 metros. (Amb. 5:15) Pagkatapos makabuylo sa pagtubo ang kahoy, nagatubo gihapon ini pero indi na hilmunon. Pagligad sang mga tuig, nagadaku ang puno kag ang gamot nagapaidalom kag nagapangalapkap pa gid, amo nga mas nagapag-on ang kahoy. Amo man sini sa espirituwal nga pagtubo sang isa ka Cristiano. Sang magsugod kita sa pagtuon sing Biblia, mahimo nga madasig kita sa pagtubo sa espirituwal kag dayon nagpabawtismo. Nalipay sa sini nga pag-uswag ang aton mga kaupod sa kongregasyon. Mahimo pa gani kita makalipikar subong payunir ukon sa iban pa nga pribilehiyo. Pagkasunod nga mga tuig, ang aton espirituwal nga pagtubo mahimo nga halos indi na hilmunon. Apang kinahanglan naton magtubo sa pagtuo kag ihibalo para mangin “isa ka hamtong nga tawo, sa talaksan sang kataason sang kabug-usan ni Cristo.” (Efe. 4:13) Gani daw kasubong lang nga nag-uswag kita halin sa salingsing pakadto sa mabakod kag daku nga kahoy, buot silingon nangin isa ka hamtong nga Cristiano.

10. Ngaa ang pagtubo importante bisan sa hamtong nga mga Cristiano?

¹⁰ Pero ang aton pagtubo indi dapat mag-untat. Ang aton ihibalo kinahanglan magsangkad kag ang aton pagtuo kinahanglan magdalom. Sa amo, mas makapanggamot kita sa duta sang Pulong sang Dios. (Hulu. 12:3) Sa Cristianong kongregasyon, madamo nga kauturan ang nakahimo sini. Halimbawa, ang isa ka utod nga nagaalagad subong gulang sa sulod sang sobra na 30 ka tuig nagsiling nga nagatubo gihapon sia sa espirituwal. Sia nagsiling: “Ang akon apresasyon sa Biblia nagatubo pa gid. Pirme ako makakita sing bag-o nga mga kahigayunan sa pag-aplikar sang mga prinsipio kag kasuguan sa Biblia sa lainlain nga paagi. Ang akon apresasyon sa ministeryo padayon man nga nagatubo.”

PATUBUA ANG IMO KAANGTANAN SA DIOS

11. Paano naton makilala sing maayo si Jehova pagligad sang tion?

¹¹ Ang aton pagtubo nagadalahig man sa pagpakigsuod kay Jehova subong aton Abyan kag Amay. Gusto niya nga mabatyagan naton nga ginabaton niya kita. Luyag niya nga mahibaluan naton nga ginahigugma kag ginaamligan niya kita pareho sang isa ka bata nga nagabatyag nga ginahigugma kag ginaamligan kon ginahakos sia sang iya mahigugmaon nga ginikanan. Nabatyagan man ini naton kon kaupod naton ang matuod kag matutom nga abyan. Subong sang imo nahangpan, ini nga kaangtanan kay Jehova wala nagtubo sa sulod lang sang isa ka gab-i. Kinahanglan pa magligad ang tion para makilala naton sia kag mahigugma. Gani para makilala naton sing maayo si Jehova, mangin determinado sa paghinguyang sing tion sa pagbasa sang iya Pulong kada adlaw. Basaha man ang tagsa ka isyu sang Ang Lalantawan kag Magmata! kag ang iban pa nga base sa Biblia nga publikasyon.

12. Ano ang kinahanglan naton himuon para makilala ni Jehova?

¹² Ang mga abyan sang Dios nagatubo man sa espirituwal paagi sa sinsero nga mga pangamuyo kag maayo nga pagpakig-upod. (Basaha ang Malaquias 3:16.) Ang “mga dulunggan [ni Jehova] nagapamati sa ila pag-ampo.” (1 Ped. 3:12) Kaangay sang mahigugmaon nga ginikanan, ginapamatian gid ni Jehova ang aton pagpangayo sing bulig paagi sa pangamuyo. Gani dapat kita “magpadayon sa pagpangamuyo.” (Roma 12:12) Indi kita makapabilin nga hamtong nga Cristiano kon wala ang bulig sang Dios. Ang pag-ipit sa sining sistema mabudlay gid pamatukan kag atubangon kon sa aton lamang kusog. Kon mag-untat kita sa pagpangamuyo, ginasikway naton ang kusog nga handa pirme ihatag sang Dios sa aton. Kontento ka na bala sa kalidad sang imo mga pangamuyo, ukon nakita mo nga kinahanglan mo pa ini pauswagon?—Jer. 16:19.

13. Ngaa ang pagpakig-upod sa masigka-Cristiano importante sa pagtubo sa espirituwal?

¹³ Si Jehova nahamuot sa mga “nagadangup sa iya”; gani bisan nakilala na naton ang Dios, luyag naton nga magpadayon sa pagpakig-upod sing regular sa kongregasyon sang mga nakakilala sa iya. (Nah. 1:7) Lapnag sa kalibutan ang pagluya sing buot, gani maalamon nga makig-upod kita sa aton makapalig-on nga mga kauturan. Ano ang mga benepisyo sini? Makaupod mo sa kongregasyon ang mga indibiduwal nga magapahulag sa imo sa “gugma kag sa maayong mga buhat.” (Heb. 10:24, 25) Ang gugma nga ginsulat ni Pablo sa mga Hebreo nagapatuhoy sa paghiliutod, nga isa ka katilingban sang mga sumilimba nga may pareho sing hunahuna, ukon isa ka kongregasyon. Mapakita ini nga gugma paagi sa pagpakig-upod sa iban nga Cristiano. Regular nga markahi sa imo listahan ang pagtambong sa mga miting kag pagpakigbahin sa sini.

14. Ngaa kinahanglan ang padayon nga paghinulsol kag pagbag-o?

¹⁴ Nagsugod ang aton pagka-Cristiano sang naghinulsol kita kag nagbag-o, ukon nagbiya sa aton mga sala. Pero ang paghinulsol dapat magpadayon. Subong di-himpit nga mga tawo, ang sala nga yara sa sulod naton kaangay sa nagabalulon nga man-ug nga handa mamuntog. (Roma 3:9, 10; 6:12-14) Kinahanglan kita magbantay, kag indi pagbalewalaon ang aton mga kasaypanan. Maayo lang kay si Jehova mabinatason sa aton samtang nagapanikasog kita sa pagpamatok sa aton mga kaluyahon kag nagahimo sing mga pagbag-o. (Fil. 2:12; 2 Ped. 3:9) Makabulig gid kon kontrolon naton ang paggamit sang aton tion kag mga pagkabutang, kag isikway ang maiyaiyahon nga mga tulumuron. Ang isa ka sister nagsulat: “Ginpadaku ako sa kamatuoran, pero nagdaku ako nga may lain nga pagtamod parte kay Jehova. Grabe gid ang kahadlok ko sa iya sadto, kag nagapati ako nga indi ko gid sia mapahamut-an.” Sang ulihi, nagluya sia sa espirituwal bangod sang mga kapaslawan. “Natabo ina indi bangod nga wala ko ginahigugma si Jehova,” padayon niya, “kundi bangod wala ko sia makilala sing maayo. Pero pagkatapos sang hanuot nga mga pangamuyo, nagbag-o ako.” Nagsiling pa sia: “Nabatyagan ko nga daw isa ako ka bata nga ginadapit ni Jehova, nga ginabuligan niya nga makalampuwas sa tagsa ka problema, kag mainayuhon nga nagapakita sa akon sang dapat ko himuon.”

15. Ano ang ginatan-aw ni Jesus kag sang iya Amay?

¹⁵ “Padayon nga ihambal sa mga tawo” ang maayong balita. Amo ini ang ginsiling sang anghel sang Dios kay Pedro kag sa iban pa nga apostoles pagkatapos sang milagruso nga paghilway sa ila sa bilangguan. (Binu. 5:19-21) Huo, ang aton pagpakigbahin sa ministeryo kada semana nalakip sa aton listahan. Ginatan-aw ni Jesus kag sang iya Amay ang aton pagtuo kag pagministeryo. (Bug. 2:19) Subong sang ginsiling sang gulang nga ginsambit kaina, ang pagministeryo dapat mangin daku nga bahin sa aton kabuhi.

16. Ngaa maayo nga pamalandungan ang aton dedikasyon kay Jehova?

¹⁶ Pamalandungi ang imo dedikasyon. Ang pinakahamili naton nga ginapanag-iyahan ang aton kaangtanan kay Jehova. Kilala niya kon sin-o ang iya. (Basaha ang Isaias 44:5.) Usisaa sing maayo ang kalidad kag kadalumon sang imo kaangtanan sa Dios. May kaangtanan sini, dumduma ang importante nga petsa sang imo bawtismo. Magapahanumdom man ini sa imo nga ang imo bawtismo nagasimbulo sang imo pinakaimportante nga desisyon.

MAGPABILIN NGA SUOD KAY JEHOVA PAAGI SA PAGBATAS

17. Ngaa kinahanglan naton ang pagbatas para makapabilin nga suod kay Jehova?

¹⁷ Sa iya sulat sa mga taga-Galacia, ginpadaku ni Pablo nga kinahanglan ang pagbatas. (Gal. 6:9) Importante man ini sa isa ka Cristiano subong. Makaatubang ka sing mga pagtilaw, pero si Jehova magabulig sa imo. Padayon nga mangabay sing balaan nga espiritu. Makabatyag ka sing paumpaw samtang ginaislan ni Jehova sing kalipay ang imo kasubo, kag sing kalinong ang imo kabalaka. (Mat. 7:7-11) Hunahunaa ini: Kon ginakabalak-an ni Jehova ang mga pispis, daw ano pa gid ayhan ikaw nga nagahigugma sa iya kag naghatag sang imo kabuhi para sa iya? (Mat. 10:29-31) Ano man nga kabudlayan ang imo maatubang, indi gid magbalik kag mangampo. Dalayawon gid nga manggad ang matigayon naton bangod kilala kita ni Jehova!

18. Bangod “kilala na [nimo] ang Dios,” ano ang gusto mo nga himuon?

¹⁸ Gani, kon bag-o mo lang nakilala ang Dios kag nagpabawtismo, ano na ang imo ginahimo? Padayuna ang pagkilala kay Jehova kag pagtubo sa espirituwal. Kag kon madugay ka na nga nabawtismuhan, kamusta ka na? Kinahanglan mo man padayunon ang pagpadalom kag pagpasangkad sang imo ihibalo parte kay Jehova. Kabay pa nga indi naton pagbalewalaon ang aton kaangtanan sa iya. Sa baylo, dapat naton repasuhon pirme ang aton espirituwal nga listahan para masiguro nga padayon nga nagatubo ang aton kaangtanan sa aton mahigugmaon nga Amay, Abyan, kag Dios—si Jehova.—Basaha ang 2 Corinto 13:5, 6.