Maayong Balita Para sa Tanan nga Tawo

Ang pagkabanhaw ni Jesus naghatag sa iya mga disipulo sing kaisog kag kakugi. Si apostol Pablo naglakbay sa kabilugan sang Asia Minor kag Mediteraneo agod organisahon ang mga kongregasyon kag pabakuron ang mga Cristiano sa pag-atubang sang pagsulay kag masingki nga paghingabot. Bisan pa sining mga kabudlayan, naglapnag ang Cristianismo.

Si Pablo mismo ginpriso sang ulihi. Pero bisan yara sia sa prisuhan, nagsulat sia sing mga pagpalig-on kag laygay sa Cristiano nga mga kongregasyon. Nagpaandam pa gani sia parte sa mas daku nga problema, ang apostasya. Paagi sa bulig sang balaan nga espiritu sang Dios, nahantop na sing abanse ni Pablo nga ang “mapiguson nga mga lobo” nga magasulod sa tunga nila magahambal sang “tiko nga mga butang” kag “ipahilayo ang mga disipulo kag pasundon sa ila.”—Binuhatan 20:29, 30.

Sang katapusan sang una nga siglo, nagsugod ang apostasya. Sa sina nga tion, ginhatagan sang nabanhaw nga si Jesus si apostol Juan sing Bugna, isa ka simbuliko nga pagpakita sing palaabuton. Pareho sang ginsulat ni Juan, indi mapunggan sang mga nagapamatok ukon sang butig nga mga manunudlo ang katumanan sang orihinal nga katuyuan sang Dios sa duta kag sa katawhan. Ang “tagsa ka pungsod kag tribo kag hambal kag katawhan” makabati sang maayong balita parte sa Ginharian sang Dios. (Bugna 14:6) Ipasag-uli ang Paraiso sa duta, kag mangin bahin sa sini ang bisan sin-o nga luyag maghimo sang kabubut-on sang Dios!

“Maayong balita” bala ini para sa imo? Kon amo, magtuon sing dugang sa mensahe sang Dios nga makita sa Biblia kag kon paano ka makabenepisyo sa karon kag sa palaabuton.

Mabasa mo ang Biblia sa Internet sa www.jw.org/hil. Sa sina nga Web site, mahimo mo man usisaon ang mga brosyur nga Ang Biblia—Ano ang Mensahe Sini? kag Maayong Balita Halin sa Dios! subong man ang libro nga Ano Gid ang Ginatudlo sang Biblia? upod sa iban pa nga publikasyon nga nagabinagbinag kon ngaa masaligan naton ang Biblia kag kon paano naton maaplikar ang praktikal nga mga laygay sini para sa aton kag sa aton pamilya. Ukon magpamangkot sa mga Saksi ni Jehova para sa dugang nga impormasyon.

​—Base sa Binuhatan, Efeso, Filipos, Colosas, Filemon, 1 Juan, Bugna.