Madamo ang Maluwas sa Katapusan—Mahimo Ka Man Maluwas

Ginasugiran kita sang Biblia nga may kalaglagan sa tion sang katapusan: “Magaabot ang dakung kapipit-an nga wala pa gid matabo halin sa ginsuguran sang kalibutan tubtob karon . . . Kag kon yadto nga mga adlaw wala ginpalip-ot, wala sing tawo nga maluwas.” (Mateo 24:21, 22) Pero nagsaad ang Dios sa aton nga madamo nga tawo ang maluwas: “Ang kalibutan nagataliwan . . . , apang ang isa nga nagahimo sang kabubut-on sang Dios nagapabilin sing dayon.”—1 Juan 2:17.

Kon gusto mo maluwas sa pagtaliwan sining kalibutan kag ‘magpabilin sing dayon,’ ano ang dapat mo himuon? Dapat ka bala magtipon sing materyal nga mga butang ukon maghimo sing pila ka pagpanghanda? Indi. Ginapalig-on gid kita sang Biblia nga indi amo sina ang unahon naton. Aton mabasa: “Sanglit ining tanan nga butang matunaw sa sini nga paagi, dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon, samtang ginahulat ninyo kag pirme ginadumdom ang presensia sang adlaw ni Jehova.” (2 Pedro 3:10-12) Ginapakita sang konteksto nga “ining tanan nga butang” nga tunawon nagalakip sang mga nagagahom sa sining malaut nga kalibutan kag ang tanan nga nagapili sina nga pagginahom sa baylo sang pagginahom sang Dios. Maathag nga kon magtipon kita sing materyal nga mga butang, indi ini makaluwas sa aton gikan sa sina nga kalaglagan.

Sa pagkamatuod, ang aton kaluwasan nagadepende sa pag-alagad sing bug-os kay Jehova nga Dios kag sa aton paggawi kag mga buhat nga nagapahamuot sa iya. (Sofonias 2:3) Sa baylo nga sundon ang kadam-an subong kag indi pagsapakon ang maathag nga mga tanda nga yari na kita sa sining talalupangdon nga mga tion, kinahanglan ‘pirme naton dumdumon ang presensia sang adlaw ni Jehova.’ Ipakita sa imo sang mga Saksi ni Jehova gikan sa Biblia kon paano ka maluwas sa sinang nagahilapit nga adlaw.