Kon Ngaa Nakalab-ot sa Aton ang Biblia

Ang Biblia nakalab-ot sa aton subong. Gani, matigayon kag mabasa mo ini. Kag kon maayo nga translation sang Biblia ang pilion mo, makasiguro ka nga ang imo ginabasa masaligan nga kopya sang orihinal nga mga sinulatan.a Pero ngaa wala madula ang Biblia bisan pa ginsulat ini sa nagakadunot nga sululatan, mapintas nga ginpamatukan, gintinguhaan nga islan ang mensahe sini, kag bisan pa grabe gid ang mga inagihan sini? Ngaa espesyal gid ini nga libro?

Madamo nga nagatuon sa Biblia ang nakasiling pareho sa apostol nga si Pablo, nga nagsulat: “Ang pagsulat sa bug-os nga Kasulatan gintuytuyan sang Dios.” (2 Timoteo 3:16) Nagapati sila nga nakalab-ot ang Biblia sa aton bangod amo ini ang espesyal nga Pulong sang Dios kag bangod ginproteksionan ini sang Dios asta subong. Si Faizal, nga ginsambit sa una nga artikulo sini nga magasin, nagtuon sa Biblia para mabal-an niya kon ano gid ang matuod. Nakibot gid sia sa iya nabal-an. Natun-an niya nga laban sa ginatudlo sang Cristiandad wala gali sa Biblia. Nanamian man sia sa katuyuan sang Dios para sa duta nga ginasugid sang Iya Pulong.

“Kumbinsido na ako subong nga ang akon Biblia regalo sang Dios,” siling niya. “Kay man, kon ang Dios makahimo sang uniberso, may gahom man sia sa paghatag sa aton sing libro kag proteksionan ini para makalab-ot sa aton. Kon indi ako magpati sa sini, daw ginlimitehan ko ang gahom sang Dios. Kag sin-o ako nga malimitehan ko ang gahom sang Labing Gamhanan?”—Isaias 40:8.