Ang Kalipay sang Simple nga Kabuhi

GINKASAL sanday Daniel kag Miriam sang Septiembre 2000 kag nag-istar sila sa siudad sang Barcelona, Espanya. “Normal lang ang amon kabuhi,” siling ni Daniel. “Maayo ang amon trabaho gani makakaon kami sa malahalon nga mga restawran, makalagaw sa iban nga pungsod, kag makabakal sing manami nga mga bayo. Regular man kami nga nagabantala.” Pero may natabo nga pagbag-o.

Sang kombension sang 2006, natandog gid si Daniel sa isa ka pamulongpulong nga may pamangkot: “Ginahimo bala naton ang tanan para mabuligan ang mga ‘tawo sa bibi sang kamatayon’ nga makalakat sa dalan padulong sa kabuhi nga wala sing katapusan?” (Hulu. 24:11) Ginpadaku sini ang responsibilidad nga isugid ang mensahe sang Biblia nga makaluwas sing kabuhi. (Binu. 20:26, 27) “Pamatyag ko ginaistorya ako ni Jehova,” hinumdom ni Daniel. Ginsambit man sa pamulongpulong nga mas malipayon kita kon pasangkaron naton ang aton ministeryo. Nahibaluan ni Daniel nga matuod ini. Payunir na sadto si Miriam kag nalipay gid sia sa madamo nga pagpakamaayo.

Si Daniel nagsiling: “Nagdesisyon ako nga maghimo sing daku nga pagbag-o.” Gani, ginbuhinan niya ang iya oras sa trabaho, nagpayunir, kag gin-istoryahan nila ni Miriam nga mas mangin malipayon pa gid sila kon mag-alagad sila sa lugar nga nagakinahanglan sing dugang nga manugbantala sang Ginharian.

MGA KABUDLAYAN SANG PRIMERO—DAYON MAKALILIPAY NGA BALITA

Sang Mayo 2007, naghalin sanday Daniel kag Miriam sa ila trabaho kag nagkadto sila sa pungsod sang Panama, nga nakadtuan na nila sang una. Ang ila bag-o nga teritoryo sa Bocas del Toro Archipelago sa Caribbean Sea madamo sing isla, kag mga Ngabe ang kalabanan nga nagaistar diri. Ginbulubanta nanday Daniel kag Miriam nga iguigo ang ila sinuptan para makatener sila sing mga walo ka bulan sa Panama.

Nagabiyahe sila paagi sa baruto kag bisikleta. Madumduman pa nila ang ila una nga pagbisikleta, nga mga 32 ka kilometro sa taklaron nga mga bakulod kag nagatagiti ang init. Diutayan lang malipong si Daniel sa kakapoy. Pero, ginaabiabi gid sila sang mga Ngabe nga maistorya nila, ilabi na sang makatuon sila sang pila ka panamyaw sa tumandok nga lenguahe. Wala magdugay, 23 na ang ila ginatudluan sa Biblia.

Pero sang maubos ang ila sinuptan, nasubuan gid sila. Si Daniel nagsiling: “Nagahibi kami sa paghunahuna nga mabalik na kami sa Espanya. Nasubuan gid kami nga biyaan ang amon mga ginatudluan sa Biblia.” Pero isa ka bulan ang nagligad, nakabaton sila sing makalilipay nga balita. Si Miriam nagsiling: “Gin-agda kami nga mangin espesyal payunir. Nalipay gid kami nga makapabilin sa amon asaynment!”

ANG NAGAPAHALIPAY GID SA ILA

Sang 2015, bangod sang mga pagbag-o sa organisasyon, gin-asayn sanday Daniel kag Miriam nga regular payunir. Ano na ang himuon nila? Nagsalig sila sa promisa sang Salmo 37:5: “Itugyan kay Jehova ang imo dalanon; magsalig ka sa iya, kag buligan ka niya.” Nakakita sila sing trabaho nga makasuportar sa ila pagpayunir, kag nagaalagad sila subong sa isa ka kongregasyon sa probinsia sang Veraguas, Panama.

Si Daniel nagsiling: “Antes kami maghalin sa Espanya, indi kami sigurado kon bala masarangan namon magkabuhi sing simple. Subong, simple na ang amon kabuhi. Kon ano man ang wala kami, indi ini importante.” Ano ang nagapahalipay gid sa ila? Nagsiling sila, “Indi matupungan ang kalipay sa pagbulig sa mga mapainubuson nga makatuon parte kay Jehova!”