Kon Paano Ginasugid sang Aton Manunuga ang Iya Mahigugmaon nga mga Promisa

Sugod sang pagtuga sa mga tawo, ang aton Manunuga nagpakigkomunikar sa tawo paagi sa mga anghel kag mga propeta. Dugang pa, ginpasulat niya ang iya mensahe kag ang iya ginpromisa nga mga pagpakamaayo. Nadalahig ang imo palaabuton sa sini nga mga promisa. Ti, sa diin naton makita subong ini nga mga promisa sang Dios?

Mabasa sa Balaan nga Kasulatan ang mensahe sang Dios para sa aton. (2 Timoteo 3:16) Paano gingamit sang Dios ang mga propeta para isulat ang iya mensahe? (2 Pedro 1:21) Ginbutang sang Dios ang iya panghunahuna sa hunahuna sang mga manunulat para isulat nila ini. Pareho ini sa isa ka negosyante nga nagapasulat sa iya sekretaryo sang iya mensahe. Kabalo kita nga ang negosyante amo ang awtor sang mensahe. Sa pareho nga paagi, bisan pa gingamit sang Dios ang mga tawo nga magsulat sang iya mensahe, sia amo ang matuod nga Awtor sang Sagrado nga Sinulatan.

ANG PULONG SANG DIOS MATIGAYON BISAN DIIN

Importante gid ang mensahe sang Dios gani gusto niya nga mabasa kag maintiendihan ini sang tanan. Subong, ang “wala sing katapusan nga maayong balita” sang Dios matigayon na sang “tagsa ka pungsod kag tribo kag hambal.” (Bugna 14:6) Bangod sang pagpakamaayo sang Dios, ang kompleto ukon ang pila ka bahin sang Sagrado nga Sinulatan matigayon na sa sobra 3,000 ka lenguahe, nga amo ang pinakamadamo nga translation sang bisan ano nga libro sa kalibutan.