Padayon nga Ipangamuyo ang Pagpakamaayo sang Dios

Ginhatagan sang Dios ang mga tawo sing espesyal nga regalo—maistorya naton sia kag masugid ang aton ginabatyag paagi sa pangamuyo. Ang propeta nga si David nagpangamuyo: “O Manugpamati sang pangamuyo, ang tanan nga sahi sang tawo magapalapit sa imo.” (Salmo 65:2) Pero paano kita magpangamuyo para pamatian kita kag pakamaayuhon sang Dios?

MAGPANGAMUYO HALIN SA TAGIPUSUON KAG MANGIN MAPAINUBUSON

Sa imo personal nga mga pangamuyo, puede mo mapautwas sa Dios ang imo matuod gid nga ginabatyag. (Salmo 62:8) Gusto gid mabatian sang Labing Gamhanan ang aton hugot nga mga pangamuyo.

IHAMBAL ANG PERSONAL NGA NGALAN SANG DIOS

Madamo ang titulo sang Dios, pero isa lang ang iya personal nga ngalan. “Ako si Jehova. Amo ina ang akon ngalan.” (Isaias 42:8) Makita ang ngalan nga Jehova sing mga 7,000 ka beses sa Balaan nga Kasulatan. Madamo nga propeta ang nagtawag sa Dios sa iya personal nga ngalan. Si Abraham nagsiling: ‘Kabay pa Jehova, tuguti pa ako sa paghambal sa imo.’ (Genesis 18:30) Gani dapat man naton ihambal ang ngalan sang Dios, nga Jehova, kon nagapangamuyo kita.

MAGPANGAMUYO SA IMO LENGUAHE

Naintiendihan sang Dios ang aton ginahunahuna kag ginabatyag bisan ano pa ang aton lenguahe. Ang iya Pulong nagapasalig sa aton: “Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.”—Binuhatan 10:34, 35.

Pero para pakamaayuhon kita sang Dios, indi lang pagpangamuyo ang kinahanglan. Sa masunod nga mga artikulo, binagbinagon naton kon ano pa gid ang dapat naton himuon.