Makabulig ang Tanan Para Magpabawtismo ang mga Ginatudluan sang Biblia

1-2. Sin-o ang makabulig para mag-uswag kag magpabawtismo ang ginatudluan sang Biblia?

“NANAMIAN gid ako sa akon mga natun-an sa akon pag-Bible study,” siling ni Amy, nga taga-Fiji. “Nagapati ako nga amo ini ang kamatuoran. Pero naghimo lang ako sang mga pagbag-o sa akon kabuhi sang nagpakig-upod na ako sa mga kauturan. Dayon nagdesisyon ako nga magpabawtismo.” Ang eksperiensia ni Amy nagatudlo sa aton sining importante nga kamatuoran: Mas daku ang posibilidad nga padayon nga mag-uswag kag magpabawtismo ang isa ka Bible study kon ginabuligan sia sang mga kauturan sa kongregasyon.

² Ang tanan nga manugbantala makabulig para magdesisyon ang ginatudluan sang Biblia nga mangin bahin sang kongregasyon. (Efe. 4:16) Ang isa ka payunir nga si Leilani, nga taga-Vanuatu, nagsiling: “May hulubaton nga nagasiling nga kinahanglan magbuligay ang bilog nga baryo para ang isa ka bata mangin isa ka maayo nga tawo sa ulihi. Nagapati ako nga kinahanglan man magbuligay ang bilog nga kongregasyon para mangin disipulo ang isa nga ginatudluan sang Biblia.” Kinahanglan magbuligay ang mga miembro sang pamilya, mga abyan, mga maestro, kag mga maestra para maghamtong ang isa ka bata. Kinahanglan nila sia palig-unon kag tudluan. Mabuligan man sang mga manugbantala ang mga ginatudluan sang Biblia nga mag-uswag kag magpabawtismo paagi sa ila mga laygay, pagpalig-on, kag maayo nga halimbawa.—Hulu. 15:22.

3. Ano ang natun-an mo sa ginsiling ni Ana, ni Dorin, kag ni Leilani?

³ Kon ang isa ka utod may Bible study, ngaa dapat sia magpabulig sa iban nga kauturan? Si Ana, nga isa ka espesyal payunir sa Moldova, nagsiling: “Madamo ang dapat himuon para mag-uswag ang isa ka Bible study. Mabudlayan gid ang nagatudlo sa iya kon sia lang tanan ang nagahimo sini.” Ang isa ka brother nga si Dorin, nga espesyal payunir man sa Moldova, nagsiling, “Sa masami, may masiling ang iban nga kauturan nga makatandog sa tagipusuon sang Bible study, nga wala ko gid mapensaran.” Si Leilani nagsiling man, “Kon mabatyagan sang Bible study ang pagpalangga kag pag-ulikid sang mga kauturan sa iya, marealisar niya nga katawhan gid kita ni Jehova.”—Juan 13:35.

4. Ano ang binagbinagon naton sa sini nga artikulo?

⁴ Pero, mahimo ginapamensar mo, ‘Paano ako makabulig nga mag-uswag ang ginatudluan sang Biblia kon indi man ako ang naga-Bible study sa iya?’ Binagbinagon naton kon ano ang puede naton himuon kon ginhagad kita nga mag-upod sa pag-Bible study, kag kon ano ang puede naton himuon kon magtambong na sa mga miting ang ginatudluan sang Biblia. Binagbinagon man naton kon ano ang mabulig sang mga gulang para mag-uswag kag magpabawtismo ang mga Bible study.

KON GINHAGAD KA NGA MAG-UPOD SA PAG-BIBLE STUDY

5. Ano ang imo responsibilidad kon hagaron ka sang isa ka utod nga updan sia sa iya pag-Bible study?

⁵ Ang utod nga nagatudlo sa iya Bible study amo ang may panguna nga responsibilidad nga buligan sia nga mahangpan ang Pulong sang Dios. Kon ginhagad ka sang utod nga updan sia sa pag-Bible study, responsibilidad mo nga buligan sia. (Man. 4:9, 10) Ano ang puede mo himuon para makabulig ka sa Bible study?

6. Kon ginhagad ka nga mag-upod sa pag-Bible study, paano mo maaplikar ang prinsipio sa Hulubaton 20:18?

⁶ Handai ang inyo pag-Bible study. Una, pamangkuta ang utod parte sa iya Bible study. (Basaha ang Hulubaton 20:18.) Mahimo mo sia pamangkuton: “Puede mo ’ko masugiran parte sa imo Bible study? Ano ang inyo pagatun-an? Ano nga punto ang gusto mo nga itudlo sa iya? Ano ang dapat ko himuon ukon ihambal samtang naga-Bible study? Ano naman ang indi ko dapat paghimuon ukon ihambal? Ano ang mabulig ko para mapalig-on ko sia nga mag-uswag?” Indi pag-isugid sang utod ang kompidensial nga mga impormasyon parte sa naga-Bible study, pero makabulig ang mga isugid niya sa imo. Ang mga sabat sa ginsambit nga mga pamangkot amo ang ginaistorya sang misyonero nga si Joy sa mga nagaupod sa iya pag-Bible study. Nagsiling sia: “Nagapalig-on ini sa nagaupod sa akon nga pamensaron kon paano sia makabulig sa Bible study, kag kon ano ang iya isiling sa tion sang pagtuon.”

7. Kon ginhagad ka nga mag-upod sa pag-Bible study, ngaa dapat mo handaan ang pagtuon?

⁷ Kon ginhagad ka nga mag-upod sa pag-Bible study, maayo gid kon handaan mo ang topiko nga pagatun-an. (Esd. 7:10) Si Dorin nga ginsambit kaina nagsiling, “Naapresyar ko gid kon nakahanda ang akon upod sa pagtuon kay makabulig gid ang iya mga komento.” Kon matalupangdan sang Bible study nga nakahanda kamo sing maayo nga duha, posible gid nga magahanda man sia. Kon ginhagad ka pero kulang ang imo tion para mahandaan sing maayo ang pagatun-an, panikasugi nga handaan ang panguna nga mga punto.

8. Ano ang himuon mo para mangin makapalig-on ang imo pangamuyo sa tion sang pag-Bible study?

⁸ Importante gid ang pangamuyo sa tion sang pag-Bible study, gani pamensara na nga daan kon ano ang imo isiling kon ikaw ang pangabayon nga mangamuyo para mangin makapalig-on ini. (Sal. 141:2) Madumduman pa ni Hanae, nga taga-Japan, ang mga pangamuyo sang sister nga nag-upod sa naga-Bible study sa iya. Nagsiling sia: “Nabatyagan ko nga suod gid sia kay Jehova, kag gusto ko nga mangin pareho sa iya. Nabatyagan ko man nga palangga niya ako kay ginasambit niya ang akon ngalan sa iya mga pangamuyo.”

9. Suno sa Santiago 1:19, ano ang himuon mo para makabulig ka kon ginhagad ka nga mag-upod sa pag-Bible study?

⁹ Buligi ang utod sa tion sang pagtuon. Ang isa ka espesyal payunir sa Nigeria, nga si Omamuyovbi, nagsiling: “Makabulig gid ang ginhagad nga utod kon nagapamati sia sing maayo sa tion sang pagtuon. Dapat nga makapalig-on ang iya mga komento, pero indi man sia dapat magsige pirme hambal. Dapat nahangpan niya nga indi sia ang may responsibilidad sa pagdumala sang pagtuon.” Gani paano mo mabal-an kon san-o ka mahambal ukon ano ang imo ihambal? (Hulu. 25:11) Magpamati sing maayo samtang nagahambal ang utod kag ang Bible study. (Basaha ang Santiago 1:19.) Paagi sa sini, mabal-an mo kon san-o ka mahambal kag kon ano ang imo ihambal. Pero dapat mo anay ini hunahunaon sing maayo antes mo ini ihambal. Kay man, indi ka dapat magsige pirme hambal, indi ka dapat magsaligbat samtang nagapaathag ang utod, kag indi mo dapat paglainon ang topiko. Pero paagi sa malip-ot nga komento, ilustrasyon, ukon pamangkot, makabulig ka nga mapaathag sing maayo ang inyo ginatun-an. Kon kaisa, mahimo magbatyag ka nga daw wala ka na sing madugang nga komento. Pero kon dayawon mo kag pasalamatan ang Bible study kag ipabatyag mo sa iya nga gusto mo gid sia buligan, daku gid ang mabulig sini sa iya pag-uswag.

10. Paano posible nga makabulig sa ginatudluan sang Biblia ang imo mga eksperiensia?

¹⁰ Isugid ang imo eksperiensia. Kon sa banta mo makabulig sa ginatudluan sang Biblia ang imo mga eksperiensia, puede mo masugid sa iya kon paano mo natun-an ang kamatuoran, kon paano mo nasarangan ang mga problema, kag kon paano ka ginbuligan ni Jehova. (Sal. 78:4, 7) Posible nga makapalig-on gid ini sa iya. Mahimo nga mapabakod sini ang iya pagtuo kag mapalig-on sia sini nga padayon nga mag-uswag kag magpabawtismo. Posible nga makabulig ini sa iya nga masarangan ang iya problema. (1 Ped. 5:9) Nadumduman sang isa ka payunir nga si Gabriel, nga taga-Brazil, kon ano ang nakabulig sa iya sang gina-Bible study sia. Nagsiling sia: “Sang ginsugid sang mga kauturan ang ila mga eksperiensia, nahangpan ko nga nabal-an ni Jehova ang aton mga problema. Kag kon nasarangan nila ini, masarangan ko man ini.”

KON MAGTAMBONG NA SA MGA MITING ANG BIBLE STUDY

11-12. Ngaa dapat naton abiabihon ang Bible study kon magtambong na sia sa mga miting?

¹¹ Para magdesisyon ang Bible study nga magpabawtismo, dapat regular sia nga magtambong sa mga miting sang kongregasyon kay makabulig ini sa iya nga mag-uswag. (Heb. 10:24, 25) Siempre, agdahon gid sia sang nagatudlo sang Biblia sa iya nga magtambong sa miting. Kon magtambong na sia, tanan kita may mabulig gid para padayon sia nga magtambong sa Kingdom Hall. Ano ang dapat naton himuon?

¹² Abiabiha ang Bible study. (Roma 15:7) Kon mabatyagan sang Bible study nga nalipay kita nga nagtambong sia, posible gid nga mapalig-on sia nga padayon nga magtambong sa mga miting sa Kingdom Hall. Sinsero sia nga kamustaha kag ipakilala sia sa iban, pero himua ini sa paagi nga indi man sia masaw-ahan. Indi paghunahunaa nga bahala na ang utod nga naga-Bible study sa iya nga asikasuhon sia kay basi wala pa nakaabot ang utod ukon may mga responsibilidad sia sa Kingdom Hall. Pamatii sia sing maayo kag ipabatyag sa iya nga nagaulikid ka sa iya. Ano ang posible nga resulta kon abiabihon mo sia? Binagbinaga ang eksperiensia ni Dmitrii. Mga pila pa lang ka tuig sia nga nabawtismuhan kag ministeryal nga alagad na sia subong. Parte sa iya una nga pagtambong sa miting, nagsiling sia: “Ara ako sa gua sang Kingdom Hall kag ginakulbaan ako. Nakita ako sang isa ka brother kag gin-updan niya ako pasulod. Wala ko gid ginpaabot nga madamo ang magaabiabi sa akon. Nanamian gid ako sa pag-abiabi sa akon kag nahunahuna ko nga tani adlaw-adlaw may miting. Subong ko pa lang gid ini naeksperiensiahan.”

13. Ano ang posible nga epekto sa Bible study sang imo maayo nga halimbawa?

¹³ Mangin maayo nga halimbawa. Ang imo maayo nga halimbawa makabulig sa Bible study nga magpati nga matuod kita nga mga Cristiano. (Mat. 5:16) Si Vitalii, nga isa na subong ka payunir sa Moldova, nagsiling: “Naobserbahan ko ang paagi sang pagkabuhi sang mga kauturan sa kongregasyon, nahangpan ko ang ila mga opinyon, kag nakita ko ang ila maayo nga mga paggawi. Nagkumbinsi ini sa akon nga ang mga Saksi ni Jehova amo ang matuod nga relihion.”

14. Paano makabulig ang imo halimbawa sa isa ka Bible study nga mag-uswag?

¹⁴ Antes mabawtismuhan ang isa ka Bible study, dapat niya anay iaplikar ang iya mga natun-an. May mga tion nga indi ini mahapos himuon. Pero kon makita niya nga ginaaplikar mo ang mga prinsipio sa Biblia kag nakabulig gid ini sa imo, posible gid nga mapalig-on sia nga ilugon ang imo mga ginahimo. (1 Cor. 11:1) Binagbinaga ang eksperiensia ni Hanae nga ginsambit kaina. Nagsiling sia: “Nakita ko sa mga kauturan kon paano ko iaplikar ang akon mga natun-an. Nakita ko sa ila kon ano ang mga puede ko himuon para mapalig-on ko ang iban, para mapatawad ko ang mga nakasala sa akon, kag para mapakita ko ang gugma. Pirme gid maayo nga mga komento ang ginasiling nila parte sa iban. Gusto ko gid sila ilugon.”

15. Base sa Hulubaton 27:17, ngaa dapat naton panikasugan nga makig-abyan sa Bible study nga nagatambong na sa mga miting?

¹⁵ Panikasugi nga mangin abyan mo ang Bible study. Kon padayon na nga nagatambong sa mga miting ang Bible study, padayon man nga ipabatyag sa iya nga nagaulikid ka sa iya. (Fil. 2:4) Kilalaha pa gid sia sing maayo. Puede mo ihambal sa iya nga nalipay ka gid nga ginapanikasugan niya nga iaplikar ang iya mga natun-an. Puede mo man sia pamangkuton parte sa iya pagtuon, pamilya, kag trabaho. Pero maghalong sa imo mga pamangkot kay basi tam-an na ini ka personal. Kon pirme kamo nagaistorya, mahimo magsuod kamo nga duha. Ang imo pagpakig-abyan sa iya makabulig sa iya nga mag-uswag kag magpabawtismo. (Basaha ang Hulubaton 27:17.) Nadumduman ni Hanae, nga isa na ka regular payunir subong, ang iya eksperiensia sang nagtambong na sia sa mga miting. Nagsiling sia: “Madamo ako sing nangin abyan sa kongregasyon. Bangod sini, gusto ko gid nga magtambong pirme sa mga miting. Bisan gani kapoy ako, nagatambong gid ako. Nalipay gid ako kon kaupod ko ang akon bag-o nga mga abyan, kag nakabulig ini sa akon nga untatan ang pagpakig-upod sa mga tawo nga wala nagaalagad kay Jehova. Gusto ko gid nga mangin suod kay Jehova kag sa mga kauturan. Gani nagdesisyon ako nga magpabawtismo.”

16. Ano pa ang puede mo himuon para mabatyagan sang Bible study nga bahin sia sang kongregasyon?

¹⁶ Kon makita mo nga nagahimo sang pagbag-o kag nagauswag ang Bible study, ipabatyag sa iya nga bahin sia sang kongregasyon. Mahimo mo ini kon mangin maabiabihon ka sa iya. (Heb. 13:2) Nadumduman ni Denis, nga nagaalagad subong sa Moldova, ang iya eksperiensia sang gina-Bible study sia. Nagsiling sia: “Pila ka beses nga gin-agda kami sang akon asawa sa mga tipontipon sang mga kauturan. Ginsugiran nila kami kon paano sila ginbuligan ni Jehova. Nagpalig-on gid ini sa amon. Bangod sini, nagdesisyon kami nga alagaron si Jehova kag kumbinsido kami nga mangin maayo ang amon kabuhi kon himuon namon ini.” Kon mangin isa na ka manugbantala ang Bible study, puede mo sia hagaron nga updan ka sa pagbantala. Si Diego, nga isa ka manugbantala sa Brazil, nagsiling: “Madamo nga kauturan ang naghagad sa akon sa pagbantala. Bangod sini, mas nakilala ko pa gid sila. Madamo gid ako sing natun-an sa ila, kag nakabulig ini sa akon nga mangin suod pa gid kay Jehova kag kay Jesus.”

PAANO MAKABULIG ANG MGA GULANG?

17. Paano makabulig ang mga gulang sa mga Bible study?

¹⁷ Magpain sang tion para sa mga Bible study. Mga gulang, ipabatyag ninyo sa mga Bible study nga palangga ninyo sila kag nagaulikid kamo sa ila kay makabulig ini sa ila nga mag-uswag kag magpabawtismo. Maayo gid kon istoryahon ninyo pirme ang mga Bible study kon nagatambong sila sa mga miting. Kon madumduman ninyo ang ila ngalan ilabi na gid kon nagakomento sila, mabatyagan nila nga nagaulikid kamo sa ila. Puede ka bala makapain sang tion para maupdan mo ang isa ka manugbantala sa iya Bible study? Indi paghunahunaa nga gamay lang ang epekto sini sa ginatudluan sang Biblia. Ang matuod, posible nga daku gid ang epekto sini sa iya. Ang isa ka payunir nga sister nga si Jackie, nga taga-Nigeria, nagsiling: “Madamo sa akon mga Bible study ang daw indi makapati nga isa ka gulang ang nag-upod sa akon sa amon pagtuon. Ang isa ko ka Bible study nagsiling: ‘Wala gid ina ginahimo sang amon nga pastor. Ang mga manggaranon lang ang iya ginabisitahan, kag kadtuan lang niya sila kon bayaran nila sia!’” Ini nga Bible study nagatambong na subong sa mga miting.

18. Paano maaplikar sang mga gulang ang Binuhatan 20:28?

¹⁸ Hanasa kag palig-una ang mga nagatudlo sang Biblia. Mga gulang, may importante kamo nga responsibilidad nga buligan ang mga kauturan para mangin epektibo sila sa ila pagbantala kag pagtudlo sang Biblia sa iban. (Basaha ang Binuhatan 20:28.) Kon gin-updan mo ang isa ka utod sa iya Bible study pero nahuya sia nga sia ang magdumala sang pagtuon, hambala sia nga puede man nga ikaw lang anay ang magdumala. Si Jackie, nga ginsambit kaina, nagsiling: “Pirme ako ginapamangkot sang mga gulang parte sa akon mga Bible study. Kon nabudlayan ako parte sa akon pag-Bible study, nagahatag sila sang mga panugda.” Madamo sang mahimo ang mga gulang para palig-unon ang mga kauturan sa ila ginahimo nga pagtudlo sang Biblia sa iban. (1 Tes. 5:11) Nagsiling pa gid si Jackie: “Kanami gid sang akon pamatyag kon ginapalig-on ako sang mga gulang kag ginasilingan nila ako nga ginaapresyar gid nila ang akon mga pagpanikasog. Makapaumpaw gid ang ila mga ginasiling. Daw pareho lang nga nag-inom ako sang mabugnaw nga tubig sa mainit nga tiempo. Nadugangan ang akon kompiansa bangod sang ila mga pagdayaw kag pagpasalamat, kag nangin mas malipayon pa gid ako sa akon ginahimo nga pag-Bible study sa iban.”—Hulu. 25:25.

19. Ngaa makabatyag kita tanan sang kalipay?

¹⁹ Bisan pa wala kita sing Bible study subong, makabulig kita gihapon sa mga Bible study sang iban para mag-uswag sila kag magpabawtismo. Makabulig kita sa utod nga nagadumala sang pagtuon kon maghanda kita sang makapalig-on nga mga komento. Pero likawan naton nga magsige pirme hambal. Panikasugan naton nga mangin abyan ang mga Bible study kon nagatambong sila sa Kingdom Hall, kag mangin maayo kita nga halimbawa sa ila. Mapalig-on naman sang mga gulang ang mga Bible study paagi sa pagpain sang tion para istoryahon sila. Kag mapalig-on sang mga gulang ang mga utod nga nagatudlo sang Biblia paagi sa paghanas, pagdayaw, kag pagpasalamat sa ila. Kon may ginhimo kita para mapalig-on ang isa ka Bible study nga palanggaon si Jehova kag mag-alagad sa iya, malipay gid kita bisan gamay lang ang aton nabulig.