Impormasyon Tuhoy sa Dominican Republic

Pungsod Mga 66 porsiento sang isla sang Hispaniola ang Dominican Republic; ang nabilin nga bahin amo ang Haiti. Madamo diri sang kagulangan, kabukiran, katunggan, kag mga desyerto. Ang pinakamataas nga bukid diri amo ang Pico Duarte, nga 3,175 metros ang kataason. Maputi ang balas sang kalabanan nga baybayon diri, kag mabungahon ang mga nalupyakan, pareho sang Cibao Valley.

Pumuluyo Kalabanan sang pumuluyo diri may dugo sang taga-Europa kag Aprika. May pila ka gagmay nga mga grupo; ang pinakamadamo sa sini mga taga-Haiti.

Lenguahe Spanish ang opisyal nga lenguahe diri.

Palangabuhian Ang paghimo sing kalamay, kape, tabako kag ang pagmina amo ang panguna nga palangitan-an sang mga tawo. Sining karon lang, daku ang pag-uswag sang ekonomiya bangod sa turismo kag pabrika sang mga produkto.

Klima Tropikal ang klima diri, nga sa masami 25°C ang temperatura. Sobra 2,032 ka milimetro ang aberids nga ulan sa nabukid nga mga lugar sa aminhan-sidlangan kag mga 760 ka milimetro naman sa mamala nga mga rehiyon. Kon kaisa, may mga bagyo man sa sini nga isla.

Kultura Kan-on, beans, kag mga utan ang panguna nga pagkaon diri. Nagakaon man sila sang mga prutas, katumbal, pinirito nga saging, kag pagkaon halin sa dagat. Ang pila sa sini nalakip sa popular nga pagkaon nga La Bandera Dominicana (ang bandera sang Dominican Republic). Mahilig sila sa baseball, musika, kag saot, ilabi na sang merengue. Mahilig man sila sa gitara, tambor, plawta, kag marimba.