Lukas Sau
4 Tom qab ntawd, Yexus tawm ntawm tus Dej Yaladees mus rau lwm qhov. Vajtswv lub hwj huam dawb huv nrog nraim Yexus thiab coj nws mus tom roob moj sab qhua. 2 Nws nyob tod tau 40 hnub, Ntxwg Nyoog thiaj los ntxias nws. Thaum ntawd Yexus tsis tau noj dab tsi li. Thaum yuav dhau 40 hnub mas nws tshaib plab heev. 3 Ntxwg Nyoog thiaj hais rau nws tias, “Koj twb yog Vajtswv tus tub ne, koj kuj muab lub pob zeb no hloov ua ib lub ncuav noj.” 4 Tiam sis Yexus teb tias, “Vajtswv Txoj Lus twb hais tias, ‘Tsis yog zaub mov xwb thiaj cawm tau neeg txoj sia.’”
5 Ntxwg Nyoog ho coj Yexus mus saum ib lub roob siab siab. Nws muab tag nrho tej teb chaws hauv qab ntuj no rau Yexus saib ib muag. 6 Ces Ntxwg Nyoog txawm hais rau nws tias, “Kuv yuav pub lub hwj chim tswj teb kav chaw thiab lawv tej kev vam meej tib si rau koj, vim tej no twb yog kuv li lawm. Yog kuv xav muab rau leej twg los yeej tau. 7 Yog koj txhos caug pe kuv ib pes, tej no yuav yog koj li tag nrho.” 8 Yexus teb nws tias, “Vajtswv Txoj Lus twb hais tias, ‘Koj yuav tsum pe hawm Yehauvas* uas yog koj tus Vajtswv thiab teev tiam nws tib leeg xwb.’”
9 Ces Ntxwg Nyoog thiaj coj Yexus mus rau hauv lub nroog Yeluxalees, mus sawv saum lub tuam tsev, txheej tsev las tshav uas siab tshaj plaws. Nws hais rau Yexus tias, “Koj twb yog Vajtswv tus tub ne, koj kuj tso cev plhuav lawm hauv. 10 Vajtswv Txoj Lus twb hais tias, ‘Nws yuav kom cov tub txib saum ntuj los tsom kwm koj.’ 11 Thiab ‘lawv yuav txais nkaus koj, tsis pub koj txhais ko taw chwv av* li.’” 12 Yexus teb nws tias, “Vajtswv Txoj Lus twb hais tias, ‘Koj yuav tsum tsis txhob sim Yehauvas* uas yog koj tus Vajtswv.’” 13 Thaum Ntxwg Nyoog sim Yexus tas nws txawm mus lawm. Tiam sis nws tos kom zoo caij nyoog mam rov sim dua.
14 Yexus rov mus hauv Kalilais thiab Vajtswv lub hwj huam nrog nraim nws. Yexus lub moo nrov ncha thoob plaws cheeb tsam ntawd. 15 Yexus kuj pib qhia hauv tej tsev pe hawm thiab sawv daws qhuas nws heev.
16 Ces Yexus txawm mus rau hauv lub nroog Naxales uas nws loj hlob. Hnub Xanpataus, nws mus hauv lub tsev pe hawm li nws ib txwm mus ces nws txawm sawv ntsug yuav nyeem Vajtswv Txoj Lus. 17 Lawv thiaj muab kauj ntawv uas tus cev Vajtswv lus Yaxayas sau cev rau nws. Yexus nthuav kauj ntawv mus rau nqe uas hais tias, 18 “Vajtswv Yehauvas* lub hwj huam nrog nraim kuv. Nws xaiv kuv mus tshaj tawm txoj xov zoo rau cov neeg txom nyem. Nws txib kuv mus tshaj tawm txog kev cawm dim rau cov uas raug kaw, tshaj tawm tias cov dig muag yuav rov pom kev, mus tso cov uas raug quab yuam kom dim, 19 thiab mus tshaj tawm txog lub sij hawm uas Vajtswv Yehauvas* txaus siab rau neeg.” 20 Thaum nws nyeem tas nws muab kauj ntawv kauv cev rov qab rau tus saib xyuas cov ntawv thiab nws rov zaum. Tag nrho cov neeg hauv lub tsev pe hawm ntsia ntsoov nws. 21 Ces Yexus txawm hais rau lawv tias, “Nqe uas kuv nyeem rau nej mloog hauv Vajtswv Txoj Lus no, twb muaj tiav rau hnub no lawm.”
22 Ces lawv qhuas Yexus heev thiab xav tsis thoob tias ua cas nws yuav qhia raug siab ua luaj. Lawv thiaj hais zom zaws tias, “Tus no twb yog Yauxej tus tub los tsis yog na?” 23 Yexus thiaj hais rau lawv tias, “Nej yeej yuav hais cov lus no rau kuv tias, ‘Koj twb yog tus kws kho mob, kho koj tus kheej zoo tso. Peb hnov tias koj ua txuj ci ntau kawg li hauv lub nroog Khapena-us. Lub nroog no twb yog koj lub. Cia li ua txuj ci rau peb pom thiab.’” 24 Yexus thiaj hais rau lawv tias, “Kuv hais ncaj qha rau nej tias, tsis muaj ib tug cev Vajtswv lus uas nws lub zej lub zos yuav tos txais nws. 25 Tiam sis kuv hais tseeb rau nej tias, tiam Eliyas nyob muaj poj ntsuam coob heev nyob teb chaws Ixayees. Thaum ntawd ntuj qhuav tau peb xyoos thiab rau lub hlis. Muaj kev tshaib kev nqhis thoob plaws teb chaws. 26 Txawm li ntawd los, Vajtswv tsis txib Eliyas mus pab ib tug poj ntsuam twg hauv lub teb chaws ntawd li. Eliyas tsuas mus pab tus poj ntsuam hauv Xalefas uas nyob teb chaws Xaidoos xwb. 27 Thiab tiam Elisas nyob, muaj coob tus neeg mob ruas hauv teb chaws Ixayees. Tiam sis Elisas tsis kho lawv ib tug li. Nws tsuas kho Na-amas uas yog neeg Xilias xwb.” 28 Cov neeg uas hnov Yexus qhia tej no hauv lub tsev pe hawm txawm npau taws heev. 29 Lawv sawv daws sau nthwv los muab Yexus thawb puav mus rau sab nraum lub nroog. Vim lawv lub nroog ua rau saum hauv tsua, lawv thiaj puav Yexus mus rau ntawm phab tsua yuav muab nws thawb rau hauv qab tsuas. 30 Tiam sis Yexus txeem ntiag phua plhawv lawv mus lawm.
31 Nws txawm mus rau tom lub nroog Khapena-us uas nyob cheeb tsam Kalilais. Hnub Xanpataus nws mus qhia cov tib neeg. 32 Thaum lawv hnov Yexus qhia ua rau lawv qhuas heev, rau qhov nws qhia raws li Vajtswv lub tswv yim.* 33 Txawm muaj ib tug txiv neej raug dab tuaj hauv lub tsev pe hawm thiab. Nws cia li qw nrov nrov tias, 34 “Yexus uas yog neeg Naxales, koj tseem tuaj ua dab tsi ntawm no thiab? Koj tuaj rhuav tshem peb lod? Kuv paub koj yog leej twg lawm, koj twb yog Vajtswv tus tub qhe dawb huv ntag!” 35 Tiam sis Yexus txwv kiag tias, “Tsis yoom hais lus, cia li tawm plaws hauv tus neeg no mus!” Tus dab thiaj ua rau tus yawg ntawd vau hlo rau hauv av tab meeg sawv daws. Ces tus dab txawm cia li tawm plaws mus lawm, tsis ua mob rau nws. 36 Thaum sawv daws pom li no, lawv xav tsis thoob li, ib leeg thiaj qhuas rau ib leeg tias, “Ua cas nws tej lus muaj hwj chim tas npaum? Txawm tej dab los mloog nws hais tib si! Dab cia li tawm kiag lawm.” 37 Yexus lub moo thiaj nrov ncha mus thoob teb thoob chaw.
38 Thaum nws tawm hauv lub tsev pe hawm mus, nws mus rau tom Ximoos tsev. Thaum ntawd Ximoos niam tais ua npaws hnyav heev, lawv thiaj thov Yexus pab nws. 39 Yexus txawm mus sawv ntawm Ximoos niam tais thiab ua rau tus npaws tu nrho. Tam sim ntawd Ximoos niam tais thiaj sawv tsees los ua zaub ua mov rau lawv noj.
40 Thaum hnub yuav poob qho, sawv daws coj lawv cov neeg muaj mob ntau yam tuaj cuag Yexus. Nws thiaj cev tes npuab txhua tus, lawv tej mob cia li zoo hlo lawm. 41 Yexus kuj ntiab coob tus dab tawm hauv cov neeg ntawd mus. Thaum cov dab yuav tawm mus, lawv qw nrov nrov tias, “Koj yog Vajtswv tus Tub.” Tiam sis Yexus txwv tsis pub cov dab ntawd hais ib los li, rau qhov lawv yeej paub tias nws yog tus Khetos.
42 Thaum kaj ntug, Yexus txawm mus rau ib qho chaw uas tsis muaj tib neeg. Tiam sis cov neeg coob coob txawm nrhiav Yexus, thiab lawv caum nws qab mus txog qhov ntawd thiab. Lawv tsis xav cia nws ncaim lawv mus li. 43 Tiam sis Yexus hais rau lawv tias, “Kuv yuav tsum mus tshaj tawm txog Vajtswv txoj kev kav* rau lwm lub nroog thiab, rau qhov Vajtswv txib kuv los ua tes hauj lwm no ntag.” 44 Yexus thiaj mus tshaj tawm hauv tej tsev pe hawm uas nyob teb chaws Yudias.