Lukas Sau
8 Tsis ntev tom qab ntawd, Yexus mus tshaj tawm txoj xov zoo txog Vajtswv txoj kev kav* thoob plaws tej nroog thiab tej zej zog. Nws 12 tug tub txib kuj nrog nws mus thiab. 2 Tsis tas li ntawd xwb, kuj muaj qee leej poj niam uas yav tas los raug dab thiab muaj mob uas Yexus kho zoo, nrog lawv mus thiab. Cov poj niam ntawd yog Maivliag tus hu ua Madalas uas yav nram ntej Yexus ntiab xya tus dab tawm, 3 Yau-anas uas yog Khuxam tus poj niam, Khuxam yog tus saib xyuas Helauj tsev, Xuxanas thiab tseem muaj dua coob tus poj niam. Lawv tau siv lawv tej nyiaj txiag thiab qhov txhia chaw los txhawb Yexus lawv.
4 Muaj neeg coob coob tuaj nrog cov uas tuaj hauv tej nroog tuaj cuag Yexus. Nws txawm hais ib zaj lus piv txwv rau lawv tias, 5 “Muaj ib tug yawg tawm mus tseb noob. Thaum nws tseb, muaj ib co poob rau hauv txoj kev ces neeg muab tsuj thiab noog muab khaws noj tag lawm. 6 Muaj ib co poob rau saum cov av uas muaj pob zeb tiv. Thaum tuaj kaus, txawm qhuav tag lawm rau qhov av tsis noo. 7 Muaj ib co ho poob rau hauv cov pos ces pos hlob tuaj laum tuag tas lawm. 8 Muaj dua ib co poob rau hauv thaj av zoo thiaj loj hlob txhawv tau 100 npaug.” Thaum nws hais tej no tag lawd nws txawm hais nrov nrov tias, “Leej twg muaj pob ntseg, cia li mloog.”
9 Tiam sis Yexus cov thwj tim nug nws seb zaj lus piv txwv txhais li cas. 10 Yexus thiaj teb tias, “Vajtswv pub nej paub txog nws txoj kev kav* uas tau muab npog cia lawm. Tiam sis lwm cov kuv ua lus piv txwv qhia lawv xwb kom lawv saib tas saib thiab los lawv tsis pom, lawv mloog tas mloog thiab los lawv tsis nkag siab. 11 Zaj lus piv txwv txhais li no, lub noob yog Vajtswv txoj lus. 12 Cov noob uas poob rau hauv txoj kev yog cov hnov Vajtswv txoj lus tiam sis Dab Ntxwg Nyoog los txeeb txoj lus ntawd hauv lawv lub siab mus lawm, lawv thiaj tsis ntseeg, thiaj cawm tsis tau lawv. 13 Cov noob uas poob rau saum cov av uas muaj pob zeb tiv yog cov uas hnov dheev txog Vajtswv txoj lus es zoo siab hlo txais yuav. Tiam sis tej cag ntsia av tsis tob. Lawv ntseeg ib ntus xwb. Thaum lawv raug sim lawv cia li tso tseg lawm. 14 Cov noob uas poob rau hauv cov pos yog cov uas hnov Vajtswv txoj lus tiam sis vim tej kev txhawj xeeb, kev lom zem, thiab nyiaj txiag hauv lub neej rub lawv thiab muab Vajtswv txoj lus laum lawm, lawv thiaj tsis loj hlob. 15 Cov noob uas poob rau hauv thaj av zoo yog cov uas muaj lub siab zoo. Thaum lawv hnov Vajtswv txoj lus, lawv txawm khaws nkaus cia rau nruab siab. Lawv thiaj ua lub siab ntev thev thiab txi txiv.
16 “Tsis muaj leej twg taws teeb es yuav muab tawb khwb rau, los sis yuav muab tso rau hauv qab txag. Tiam sis tsuas muaj muab txawb rau saum tus ncej teeb kom cov uas tuaj hauv tsev thiaj pom kev. 17 Yam uas muab zais cia yuav muab nthuav rau sawv daws pom, thiab yam uas muab npog cia zoo zoo lawd yuav muab qhia rau sawv daws paub, tsis npog mus ib txhis. 18 Yog li ntawd, ua tib zoo mloog rau qhov tus uas twb paub lawm Vajtswv tseem yuav muab tsav ntxiv rau nws. Tiam sis tus uas tsis paub, txawm nws paub me ntsis xwb los, Vajtswv tseem yuav muab tshem mus.”
19 Lub sij hawm ntawd, Yexus niam thiab nws cov kwv tuaj ntawm nws. Tiam sis muaj neeg coob coob lawv mus tsis tau rau ntawm nws. 20 Yog li, thiaj muaj neeg los hais rau Yexus tias, “Koj niam thiab koj cov kwv nyob sab nraud xav pom koj.” 21 Yexus thiaj teb lawv tias, “Kuv niam thiab kuv cov kwv yog cov nyob ntawm no uas hnov Vajtswv txoj lus thiab ua raws li ntawd.”
22 Muaj ib hnub Yexus thiab nws cov thwj tim nce rau hauv nkoj ces nws hais rau lawv tias, “Cia peb caij nkoj hla mus rau sab hiav txwv tim ub.” Ces lawv txawm caij nkoj mus lawm. 23 Tiam sis thaum lawv tab tom caij nkoj mus, Yexus pw tsaug zog lawm. Ua ciav txawm muaj cua daj cua dub hlob heev los ntsawj hiav txwv. Dej ntas los nyab lub nkoj, ua rau lub nkoj yuav tog. 24 Lawv thiaj mus tsa Yexus thiab hais tias, “Xib Hwb, Xib Hwb, peb twb yuav tuag tam sim no!” Nws txawm sawv tsees los txwv kiag nag xob nag cua thiab tej nthwv dej ces cua txawm tu nrho thiab dej txawm tus yees lawm. 25 Ces Yexus hais rau lawv tias, “Ua cas nej tsis tso siab li?” Tiam sis lawv ntshai thiab xav tsis thoob li. Lawv ib leeg thiaj hais rau ib leeg tias, “Tus no yog leej twg tiag? Txawm cua thiab dej los mloog nws lus tib si.”
26 Lawv thiaj mus nres nkoj rau ntawm ntug hiav txwv uas nyob Kalilais sab tim ub hauv cheeb tsam Kelaxees. 27 Thaum Yexus tawm hauv nkoj los rau tim ntug, nws txawm ntsib ib tug yawg raug dab uas nyob tom nroog tuaj. Tus yawg ntawd tsis hnav ris tsho tau ntev lawm thiab nws nyob tom toj ntxas xwb, tsis yog nyob hauv ib lub tsev. 28 Thaum nws pom Yexus, nws txawm quaj qw txhos caug ntua ntawm Yexus xub ntiag thiab hais nrov nrov tias, “Yexus, Vajtswv tus uas loj dua ntais Leej Tub, koj tuaj ua dab tsi ntawm no? Kuv thov koj tsis txhob rau txim rau kuv.” 29 (Nws hais li ntawd rau qhov Yexus tab tom ntiab kom dab tawm hauv tus yawg ntawd mus. Dab twb tswj tus yawg ntawd ntau zaus lawm, thiaj muaj neeg zov thiab muab saw hlau, muab khawb hlau khi tas khi thiab. Txawm li ntawd los nws muab ntiag tu tas huv si, thiab dab muab nws yuam mus rau tej chaw uas tsis muaj neeg nyob.) 30 Yexus nug nws tias, “Koj lub npe hu li cas?” Nws teb tias, “Hu ua Coob,”* rau qhov muaj dab coob coob nyob hauv nws. 31 Cov dab pheej thov kom Yexus txhob ntiab lawv mus rau hauv lub qhov tob tob.* 32 Lub sij hawm no muaj ib pab npua coob coob tab tom nrhiav noj saum ntav toj. Cov dab thov kom Yexus tso cai rau lawv nkag hauv pab npua ces Yexus thiaj cia lawv mus. 33 Cov dab thiaj tawm plaws hauv tus txiv neej nkag rau hauv pab npua, ua rau pab npua dhia nrov ntwg mus poob tsag tsua tuag tas rau hauv hiav txwv. 34 Thaum cov tswv yug npua pom li ntawd, lawv thiaj dhia loo mus qhia tej no rau hauv nroog thiab tom tej zej zog tib si.
35 Ces tib neeg txawm tawm mus saib seb tau muaj li cas. Thaum lawv mus txog ntawm Yexus, lawv pom tus yawg uas raug dab zaum ntawm Yexus ko taw, hnav khaub ncaws thiab meej pem lawm mas lawv ntshai kawg li. 36 Cov uas pom tej xwm txheej no thiaj piav tias Yexus kho tus yawg raug dab ntawd li cas. 37 Muaj neeg coob heev txawm tuaj hauv cheeb tsam Kelaxees tuaj thov kom Yexus tawm hauv lawv cheeb tsam mus rau qhov lawv ntshai kawg li. Yexus thiaj nce nkoj yuav rov mus. 38 Tus yawg uas Yexus ntiab dab tawm pheej thov yuav nrog Yexus mus. Tiam sis Yexus tsis kam thiab hais rau nws tias, 39 “Cia li mus tsev, mus qhia txhua leej txhua tus txog qhov uas Vajtswv tau pab koj lawd.” Nws thiaj rov mus thiab qhia thoob plaws lub nroog txog qhov uas Yexus tau pab nws.
40 Thaum Yexus rov los rau hauv cheeb tsam Kalilais, cov neeg coob coob zoo siab tos txais nws rau qhov lawv tos ntsoov nws. 41 Ua ciav muaj ib tug yawg npe hu ua Yailas txawm los cuag Yexus. Tus yawg no yog ib tug thawj saib xyuas lub tsev pe hawm. Nws los txhos caug ntua ntawm Yexus ko taw thov kom Yexus mus tom nws tsev 42 rau qhov nws tus ntxhais uas muaj 12 xyoos mob hnyav heev yuav tuag. Nws tsuas muaj tib tug ntxhais ntawd xwb.
Thaum Yexus tab tom mus, pab neeg coob coob nrog nws mus sib txiv qev. 43 Lub sij hawm ntawd, muaj ib tug poj niam uas nchuav cev tau 12 lub xyoos uas tsis muaj leej twg kho tau li. 44 Nws thiaj lawv Yexus qab, nam zog mus kov Yexus tw tsho. Tam sim ntawd nws lub cev txawm tus kiag lawm.* 45 Yexus thiaj nug tias, “Leej twg kov kuv?” Lawv tsis muaj leej twg lees li, Petus thiaj teb tias, “Xib Hwb, cov neeg coob coob no sib txiv qev dai lias koj xwb los sav.” 46 Tiam sis Yexus hais tias, “Yeej muaj neeg kov kuv tiag, rau qhov kuv hnov hwj chim tawm hauv kuv mus lawm.” 47 Thaum tus poj niam pom tias Yexus paub lawm, nws thiaj tshee na los txhos caug ntua ntawm Yexus. Nws hais tab meeg sawv daws tias yog vim li cas nws thiaj kov Yexus. Thiab nws piav tias thaum nws kov Yexus, nws tus mob zoo hlo tam sid. 48 Yexus thiaj hais rau nws tias, “Me ntxhais’e, twb yog koj ntseeg koj thiaj zoo. Cia li mus, txhob txhawj lawm.”
49 Thaum Yexus tab tom hais lus, muaj neeg tuaj tom Yailas tsev tuaj hais rau Yailas tias, “Koj tus ntxhais tuag lawm, tsis txhob tab kaum Xib Hwb lawm.” 50 Thaum Yexus hnov li no, nws thiaj hais rau Yailas tias, “Tsis txhob ntshai, cia li ntseeg xwb. Nws yeej yuav ciaj.” 51 Thaum Yexus mus txog tom Yailas tsev, nws tsis pub leej twg nrog nws mus hauv, tsuas yog Petus, Yauhas, Yakaunpaus, thiab tus me ntxhais leej niam leej txiv xwb. 52 Tiam sis cov tib neeg quaj tus me ntxhais ntsuag qees.* Yexus thiaj hais tias, “Txhob quaj, nws tsaug zog xwb, nws tsis tuag.” 53 Lawv txawm pib luag Yexus zom zaws vim lawv paub tias tus me ntxhais twb tuag lawm. 54 Ces Yexus txawm tuav nkaus tus me ntxhais tes thiab hais tias, “Me ntxhais’e, sawv tsees!” 55 Ces tam sim ntawd tus me ntxhais txawm rov muaj sia thiab sawv tsees los. Yexus thiaj kom muab mov rau nws noj. 56 Nws niam nws txiv zoo siab tshaj plaws li, tiam sis Yexus tsis pub nkawd qhia tej no rau leej twg paub.