Lukas Sau
2 Lub sij hawm ntawd Xixas* Aukatas sam hwm kom cov pej xeem thoob plaws tej teb chaws uas Loos kav* mus rau npe. 2 (Zaum no yog thawj zaug uas rau npe rau thaum Khilenias ua tswv xeev kav Xilias.) 3 Tag nrho ib tsoom pej xeem nyias thiaj mus rau npe hauv nyias lub nroog. 4 Yog li ntawd, Yauxej thiaj tawm hauv lub nroog Naxales uas nyob cheeb tsam Kalilais mus rau teb chaws Yudias. Nws mus rau hauv Npelehees uas yog Daviv lub nroog rau qhov nws yog Daviv xeeb ntxwv. 5 Thaum ntawd nws twb yuav Maivliag lawm. Nws coj Maivliag nrog nws mus rau npe thiab. Maivliag tab tom suab me nyuam, twb yuav txog caij so. 6 Thaum nkawd tseem nyob hauv Npelehees, Maivliag txawm yug me nyuam. 7 Nws yug tau nws tus me tub uas yog nws thawj tug me nyuam. Maivliag muab tej kaj ntaub los qhwv thiab muab tus me tub tso pw hauv ib lub dab zaub vim tsis muaj chaw rau lawv so.
8 Nyob thaj tsam ntawd, kuj muaj ib co neeg yug yaj pw zov yaj tom teb, thaum tsaus ntuj. 9 Vajtswv Yehauvas* ib tug tub txib saum ntuj txawm tshwm los rau lawv pom. Vajtswv Yehauvas* lub hwj chim ci ntsa iab nyob puag ncig lawv ua rau lawv ntshai kawg li. 10 Tiam sis tus tub txib saum ntuj hais rau lawv tias, “Tsis txhob ntshai! Kuv los tshaj tawm ib txoj xov zoo uas yuav ua rau ib tsoom neeg zoo siab xyiv fab kawg li. 11 Hnub no tus cawm seej twb los yug rau hauv Daviv lub nroog lawm. Nws yog tus Khetos, nws yog tus Tswv. 12 Nej yuav pom ib tug me nyuam mos liab qhwv tej kaj ntaub, pw hauv ib lub dab zaub. Thaum nej pom li no, nej yuav paub tias yog nws.” 13 Txawm muaj ib pab tub txib saum ntuj coob cuag li pab tub rog tshwm plaws nrog tus tub txib saum ntuj ntawd. Lawv qhuas Vajtswv tias, 14 “Cia li qhuas Vajtswv tus uas nyob saum ntuj. Thiab hauv ntiaj teb, thov kom cov neeg uas Vajtswv txaus siab tau nrog nws sib raug zoo.”
15 Thaum cov tub txib saum ntuj rov mus lawd, cov neeg yug yaj ib leeg txawm hais rau ib leeg tias, “Peb cia li sawv kev mus rau Npelehees mus saib tej uas Vajtswv Yehauvas* twb qhia rau peb lawd.” 16 Lawv txawm sawv kev tsees mus, lawv thiaj mus pom Maivliag thiab Yauxej thiab tus me nyuam mos liab pw hauv lub dab zaub. 17 Thaum lawv pom tej no, lawv thiaj qhia zaj uas tus tub txib saum ntuj qhia rau lawv txog tus me nyuam no. 18 Txhua tus uas hnov tej uas cov neeg yug yaj tau hais yeej xav tsis thoob li. 19 Tiam sis Maivliag khaws txhua yam uas lawv tau hais rau hauv nruab siab, thiab xav twj ywm seb tej ntawd txhais li cas tiag. 20 Thaum cov neeg yug yaj rov mus tom teb, lawv qhuas thiab ua Vajtswv tsaug rau tej uas lawv tau hnov thiab tau pom. Txhua yam muaj tseeb raws li tej uas Vajtswv qhia rau lawv lawd.
21 Thaum tus me tub muaj yim hnub, tau muab nws ua kev cai txiav* thiab muab nws hu ua Yexus. Tus tub txib saum ntuj tau muab nws tis npe li no ua ntej xeeb nws.
22 Thaum txog sij hawm rau nkawd ua kev cai ntxuav raws li Mauxes Txoj Kev Cai, nkawd coj tus me tub mus pem Yeluxalees thiab coj nws mus rau Vajtswv Yehauvas* kom qhia tias nws yeej yog Vajtswv ntiag tug. 23 Ua li no thiaj muaj raws li tau sau tseg hauv Vajtswv Yehauvas* Txoj Kev Cai tias, “Txhua tus tub hlob yuav tsum muab cob* rau Vajtswv Yehauvas.”* 24 Nkawd thiaj muab tsiaj fij raws li Vajtswv Yehauvas* Txoj Kev Cai. Nkawd muab “ib nkawg nquab taug los sis ob tug rhaws nquab nyeg.”
25 Ua ciav muaj ib tug txiv neej hauv Yeluxalees hu ua Xime-oos. Nws yog ib tug neeg ncaj ncees uas paub ntshai Vajtswv. Nws tos ntsoov hnub uas Vajtswv yuav nplig haiv neeg Ixayees siab, thiab lub hwj huam dawb huv nrog nraim nws. 26 Vajtswv twb siv lub hwj huam dawb huv qhia nws paub lawm tias ua ntej nws tuag nws yuav pom tus Khetos uas yog tus Vajtswv Yehauvas* xaiv tseg. 27 Lub hwj huam txawm coj nws tuaj rau hauv lub tuam tsev. Thaum nkawd ob niam txiv tab tom coj tus me tub Yexus tuaj ua kev cai raws li Mauxes Txoj Kev Cai tau qhia tseg, 28 nws thiaj puag nkaus tus me tub thiab qhuas Vajtswv tias, 29 “Tus Tswv uas kav ib puas tsav yam, nim no koj tus tub qhe pom tus me tub uas koj cog tseg lawm ces koj tus qhev zoo siab qe muag lawm. 30 Kuv lub qhov muag twb pom tias koj yuav cawm cov tib neeg dim li cas. 31 Koj ua tej no tab meeg ib tsoom tib neeg sawv daws. 32 Nws yuav yog lub teeb ci rau lwm haiv neeg pom kev, thiab nws yuav yog koj haiv neeg Ixayees txoj kev kaj ci ntsa iab.” 33 Tus me tub niam thiab txiv xav tsis thoob rau tej uas nws hais txog tus me tub ntawd. 34 Tsis tas li ntawd, Xime-oos foom koob hmoov rau lawv thiab hais rau Maivliag uas yog tus me tub niam tias, “Tus me tub no yuav ua rau cov neeg Ixayees coob leej ntog thiab coob leej sawv. Txawm muaj txuj ci qhia tias Vajtswv yeej nrog nraim nws los, luag yuav tawm tsam nws. 35 Yuav muaj li no thiaj qhia tias neeg lub siab xav li cas tiag. (Yog li Maivliag, yuav mob koj siab npaum li rab ntaj chob.)”
36 Kuj muaj ib tug poj niam cev Vajtswv lus hu ua Anam. Nws yog Fanu-ees uas yog xeem Asaws tus ntxhais. Nws yuav txiv tau xya lub xyoos xwb. Nim no nws twb laus heev lawm. 37 Nws ua poj ntsuam los txog tav no, nws muaj 84 xyoos lawm. Tsis muaj ib hnub uas nws yuav tsis tuaj hauv lub tuam tsev li. Nws niaj hnub niaj hmo tuaj pe hawm Vajtswv, tsis hais ua kev cai yoo mov thiab taij thov Vajtswv. 38 Tib lub sij hawm ntawd nws txawm mus rau ntawm Maivliag thiab Yauxej nkawd thiab ua Vajtswv tsaug. Nws qhia txog tus me tub ntawd rau txhua tus uas tos ntsoov hnub uas Vajtswv yuav cawm Yeluxalees dim.
39 Thaum Maivliag thiab Yauxej nkawd ua txhua yam raws li Vajtswv Yehauvas* Txoj Kev Cai lawd, nkawd mam li rov qab mus rau hauv nkawd lub nroog Naxales, nyob cheeb tsam Kalilais. 40 Tus me nyuam loj hlob zoo muaj zog npho, thiab nws muaj tswv yim zuj zus tuaj. Vajtswv yeej txaus siab rau nws.
41 Yexus niam thiab txiv niaj xyoo mus ua Kev Cai Hla Dhau nram lub nroog Yeluxalees. 42 Thaum nws muaj 12 xyoos, lawv mus rau Yeluxalees mus ua kev cai ib yam li lawv ib txwm mus. 43 Thaum dhau lub sij hawm ua kev cai lawd, lawv txawm sawv kev rov mus tsev. Tus me tub Yexus tseem nyob hauv Yeluxalees, tiam sis nws niam nws txiv tsis paub. 44 Nkawd xav tias Yexus nrog pab neeg uas nrog lawv tuaj mus ua ke lawm. Thaum lawv twb mus ib hnub ke lawd, nkawd mam tig los nrhiav seb puas yog Yexus nrog tej txheeb ze thiab tej phooj ywg lawm. 45 Tiam sis tsis pom Yexus nrog leej twg li, nkawd thiaj rov qab mus rau Yeluxalees mus ua tib zoo nrhiav seb nws nyob qhov twg. 46 Tom qab peb hnub, nkawd mam nrhiav tau Yexus hauv lub tuam tsev. Nws tab tom nrog cov xib hwb zaum ua ke. Nws mloog lawv qhia thiab nws nug lawv txog ntau yam. 47 Cov uas hnov Yexus teb xav tsis thoob li, ua cas nws yuav txawj teb thiab nkag siab tob ua luaj. 48 Thaum nws niam nws txiv pom dheev nws, nkawd xav tsis thoob li. Nws niam thiaj hais rau nws tias, “Me tub, ua cas koj ua li no rau wb? Koj txiv wb twb nrhiav koj ib qho dhau ib qho, wb txhawj koj kawg li.” 49 Tiam sis Yexus teb nkawd tias, “Ua cas neb ho nrhiav kuv? Neb tsis paub tias kuv yuav tsum nyob hauv kuv Txiv lub tsev no lod?” 50 Tiam sis nkawd tsis nkag siab qhov uas nws teb nkawd li.
51 Tom qab ntawd Yexus thiaj nrog nkawd rov mus rau lub nroog Naxales. Nws yeej hwm nkawd thiab mloog nkawd lus li qub. Nws niam cim ntsoov tej no rau nruab siab tib si. 52 Yexus hlob zoo heev thiab tsuas muaj tswv yim zuj zus tuaj xwb. Vajtswv thiab tib neeg puav leej txaus siab rau nws.