ZAJ KAWM 17

Yexus Zoo Li Cas Tiag?

Zoo Yam Phau Ntawv

Thaum peb kawm txog tej uas Yexus tau hais thiab tau ua thaum nws tseem nyob hauv ntiaj teb no, ces peb pom nws tej yeeb yam zoo uas ua rau peb xav nrog nws thiab nws Leej Txiv Yehauvas sib raug zoo. Ib co yeeb yam zoo ntawd yog dab tsi? Thiab peb xyaum tau Yexus li cas hauv peb lub neej?

1. Yexus coj zoo nkaus li nws Leej Txiv li cas?

Thaum Yexus nyob saum ntuj ceeb tsheej, nws yeej nrog nraim thiab saib ntsoov nws Leej Txiv ua ub ua no tau qas txhiab qas vam xyoo. Twb yog vim li ntawd, Yexus txoj kev xav thiab nws tus yam ntxwv thiaj zoo nkaus li nws Leej Txiv ntag. (Nyeem Yauhas 5:19.) Vim Yexus xyaum tau nws Leej Txiv tus yam ntxwv zoo heev nws thiaj hais tau tias: “Tus uas pom kuv, tus ntawd twb pom Leej Txiv lawm.” (Yauhas 14:9) Thaum koj yim huab kawm txog Yexus tus yam ntxwv ces koj yuav yim huab paub Yehauvas zoo. Piv txwv li no, qhov uas Yexus mob siab txog tib neeg kuj qhia tias Yehauvas mob siab txog koj thiab.

2. Yexus tau ua li cas los qhia tias nws hlub Yehauvas?

Yexus hais tias: “Kuv ua ib puas tsav yam raws li Leej Txiv kom kuv ua, neeg ntiajteb thiaj paub hais tias kuv hlub Leej Txiv.” (Yauhas 14:31) Thaum nyob hauv ntiaj teb no, Yexus tau qhia tias nws hlub nws Leej Txiv npaum li cas. Txawm nyuaj npaum li cas los nws yeej ua txhua yam raws li nws Leej Txiv txib kom nws ua. Tsis tag li ntawd, vim Yexus hlub nws Leej Txiv kawg nkaus li, Yexus thiaj xav qhia txog nws Leej Txiv rau txhua tus paub thiab pab kom lawv muaj kev sib raug zoo nrog nws Leej Txiv.—Yauhas 14:23.

3. Yexus tau ua li cas los qhia tias nws hlub tib neeg?

Phau Vajlugkub hais tias Yexus hlub noob neej kawg nkaus li. (Pajlug 8:31) Nws qhia nws txoj kev hlub thaum nws hais lus txhawb lwm tus thiab ua siab dawb paug pab tib neeg. Qhov uas nws ua txuj ci tsis yog qhia txog nws lub hwj chim xwb tiam sis kuj qhia tias nws mob siab txog tib neeg thiab. (Malakaus 1:40-42) Nws ua siab dawb siab zoo rau tib neeg thiab tsis xaiv ntsej xaiv muag. Nws tej lus yeej nplig tau thiab pub tau kev vam khom rau cov uas muaj lub siab mos siab muag uas mloog nws lus. Vim Yexus hlub noob neej txhua tus, nws thiaj yeem raug kev txom nyem thiab kev ploj kev tuag. Tiam sis nws haj yam hlub cov uas ua lub neej raws li nws tej lus qhia.—Nyeem Yauhas 15:13, 14.

KAWM NTXIV

Kawm ntxiv txog Yexus tus yam ntxwv. Thiab xav seb yuav ua li cas peb thiaj paub hlub lwm tus thiab ua tau siab dawb siab zoo li nws.

4. Yexus hlub nws Leej Txiv

Yexus tus qauv pab kom peb paub hlub Vajtswv. Nyeem Luka 6:12 thiab Yauhas 15:10; 17:26. Tom qab nyeem cov nqe Vajlugkub no ib nqes twg tas, tham txog lo lus no:

Peb xyaum tau Yexus li cas es thiaj qhia tias peb hlub Yehauvas?

Yexus thov Vajtswv. — Yexus hlub nws Leej Txiv saum ntuj ceeb tsheej thiab nrog nws sib txuas lus tsis tseg

5. Yexus mob siab cov uas txom nyem

Yexus mob siab txog lwm tus tshaj nws tus kheej. Txawm tias nws sab thiab lim npaum li cas los nws tseem muab nws lub sij hawm thiab lub dag lub zog mus pab tib neeg. Nyeem Malakaus 6:30-44, thiab tham txog cov lus no:

Nyob rau hauv zaj no, Yexus tau ua tej twg los qhia tias nws txhawj txog lwm tus?—Saib nqe 31, 34, 41, thiab 42.
Vim li cas Yexus thiaj xav pab tib neeg?—Saib nqe 34.
Vim Yexus coj raws nkaus li Yehauvas tus yam ntxwv, ho qhia koj li cas txog Yehauvas?
Peb ua tau tej twg los qhia tias peb mob siab txog lwm tus li Yexus?

Yexus muab tsib lub mov ci thiab ob tug ntses me me los ua txuj ci faib rau ntau txhiab leej noj. Cov thwj tim muab cov zaub mov faib rau cov txiv neej, poj niam, thiab me nyuam.

6. Yexus yog ib tug neeg siab dawb siab zoo

Txawm Yexus tsis muaj pes tsawg los, nws tseem ua siab dawb siab zoo. Nws kuj txhawb kom peb ua neeg siab dawb siab zoo thiab. Nyeem Tes Haujlwm 20:35, thiab tham txog lo lus no:

Raws li Yexus tau hais, yuav ua li cas peb thiaj muaj kev zoo siab?

Saib zaj YEEB YAJ KIAB, thiab tham txog lo lus no.

YEEB YAJ KIAB: “Thaum Yus Pub Rau Luag Yus Zoo Siab Heev Dua”—Saib Ib Vuag (4:00)

Txawm peb tsis muaj ntau tsav ntau yam los, peb tseem pub tau tej twg rau lwm tus?

Koj puas paub?

Phau Vajlugkub qhia kom peb tuav Yexus lub npe thov Yehauvas. (Nyeem Yauhas 16:23, 24) Thaum peb thov li ntawd, peb qhia tias peb ris txiaj ntsig rau tej uas Yexus tau ua los pab kom peb ua tau Yehauvas cov phooj ywg.

IB TXHIA HAIS TIAS: “Vajtswv yeej tsis quav ntsej txog peb tej kev txom nyem kiag li.”